सद्भाव थिएटर–नेपालको प्रस्तुतिमा नयाँ बानेश्वर, थापागाउँस्थित ‘एक थिएटर नेपाल’मा नाटक ‘माण्डवी’को मञ्चन सुरु भएको छ। राम के.ए.सी.को लेखन तथा निर्देशनमा तयार पारिएको यो नाटक असोज १ गतेदेखि १४ गतेसम्म प्रदर्शन हुनेछ।

मंगलबार बाहेक प्रत्येक दिन साँझ ५:३० बजे र शनिबार अतिरिक्त शो दिउँसो १:०० बजे पनि नाटक हेर्न सकिनेछ।

‘माण्डवी’ नाटकले तीव्र गतिमा दौडिरहेको आधुनिक जीवनशैली र त्यसले मानव सम्बन्धमा पारेको प्रभावलाई मुख्य विषय बनाएको छ।

प्रविधि, करियर, जागिर, पैसा र सम्पत्तिको दौडधुपमा मानिसले कसरी आफैँलाई बिर्सँदै गएको छ र यसको असर उसकै जीवन तथा सम्बन्धमा कसरी परिरहेको छ भन्ने कुरा नाटकमा जीवन्त रूपमा प्रस्तुत गरिएको छ।
नाटकले मानिसले गुमाउँदै गएको समय, सम्बन्ध र आत्मीयतालाई पुनः खोज्नुपर्ने आवश्यकतामाथि जोड दिएको छ।
भावनाहरूको शुद्धीकरण, सम्बन्धहरूको पुनर्जागरण, आत्म-साक्षात्कार, पूर्वाग्रहको त्याग तथा अरूको अस्तित्वलाई स्वीकार गर्ने क्षमता विकास गर्नुपर्ने सन्देश यसले दिन्छ। ‘माण्डवी’लाई वर्तमान समयको प्रतिनिधि पात्रका रूपमा उभ्याउँदै नेपाली समाजका अदृश्य अन्तर्विरोध, मोह, स्वतन्त्रता, जीवन-दर्शन, सत्य र मिथ्यालाई मञ्चमा उतारिएको छ।

निर्देशक राम के.ए.सी.का अनुसार ‘माण्डवी’ केवल एउटा पात्र वा नाटक मात्र नभएर समकालीन मानव जीवनको वास्तविक प्रतिबिम्ब हो, जसले दर्शकलाई आफ्ना सम्बन्ध र अस्तित्व जोगाउनेबारे सोच्न बाध्य बनाउँछ।

नाटकमा निलीमा पाण्डे, एवन राज उप्रेती, सन्तोष बिष्ट, रुषा श्रेष्ठ, संस्कृति वन, तीर्सना राई, भिष्मराज जोशी र किरण चापागाईं लगायतका कलाकारहरूको जीवन्त अभिनय रहेको छ।

रसुवा लगायत नेपालका विभिन्न स्थानमा बाढीपहिरोबाट भएको जनधनको क्षतिपछि पीडितको सहयोगका लागि तमु धिँ यूकेले १०० किलोमिटर ट्रेल वाक आयोजना गरेको छ।

तमु धिँ यूकेका एडभाइजर सन्तकुमार गुरुङको संयोजनमा भएको ट्रेल वाकमा उपाध्यक्ष कमल गुरुङसहित एडभाइजरहरू तार्कजङ गुरुङ, क्याप्टेन रेज्ट लाछ्या गुरुङ र शारदा गुरुङ सहभागी थिए। करिब एक साताको मेहनतपछि १० वटा चेकपोइन्ट पार गर्दै ट्रेल वाक पूरा गरिएको र यसबाट करिब ५ हजार ८ सय पाउन्ड रकम संकलन भएको जनाइएको छ।

ट्रेल वाकका क्रममा तमु धिँ यूके अध्यक्ष जुमकाजी गुरुङले विभिन्न चेकपोइन्टमा पुगेर सहभागीलाई हौसला प्रदान गरेका थिए। गुरखा मिडियाका निर्देशक तथा फोटोग्राफर मिलन तमुले पहिलो दिनको गतिविधिको भिडियो तथा तस्बिर संकलन गरेका थिए।

संकलित रकमसँगै नेपाली मेलाको बचत, विभिन्न इकाइ तथा तमु धिँसँग आबद्ध संस्थाहरू र व्यक्तिहरूबाट प्राप्त सहयोगसमेत एकीकृत गरी बाढीपहिरो पीडितका लागि नेपाल पठाइनेतमु धिँ यूकेले जनाएको छ।

तमु धिँ यूकेअध्यक्ष जुमकाजी गुरुङ र आर्थिक संयोजकसमेत रहेका उपाध्यक्ष कमल गुरुङसहितको टोली सेप्टेम्बर २० मा नेपाल आएर सहयोग रकम हस्तान्तरण गर्नुका साथै क्षतिग्रस्त क्षेत्रमा राहत वितरण गर्ने कार्यक्रम रहेको छ।

सामाजिक यथार्थ, मानवीय सम्बन्ध र रहस्यलाई एउटै कथाभित्र जोडेर तयार गरिएको नेपाली फिल्म **‘रातो घेरा–द रेड सर्कल’**को छायांकन सकिएको छ। दयाहाङ राई र मिरुना मगरको मुख्य अभिनय रहेको फिल्मको इन्डक्ल्याप काठमाडौंको बानेश्वरस्थित मण्डला थिएटरमा गरिएको हो।

निर्देशक अनिल बुढा मगरको निर्देशनमा बनेको फिल्म सत्य घटनामा आधारित रहेको निर्माण पक्षले जनाएको छ। सामाजिक र भावनात्मक कथालाई रहस्यको तहसँग जोड्दै फिल्मले मानवीय सम्बन्धका जटिलता, संवेदना र जीवनका विभिन्न पाटोलाई पर्दामा प्रस्तुत गर्ने प्रयास गरेको छ।

फिल्ममा दयाहाङ र मिरुनासँगै सुनिल पोखरेल, भोला राज सापकोटा, माओत्से गुरुङ, कविता आले, रजनी गुरुङ, शेखर चापागाईँ, डीबी गुरुङलगायत कलाकारको अभिनय छ। फिल्ममा नयाँ तथा अनुभवी कलाकारको ठूलो टोलीलाई एकसाथ प्रस्तुत गरिएको निर्माण पक्षले जनाएको छ।

जीवन गुरुङ, कविता गुरुङ, भोजेन्द्र गुरुङ (भोज) र सरुन शेरचन निर्माता रहेको फिल्ममा सुमन गुरुङ र खेम राना सह–निर्माताका रूपमा छन्।

राजु स्याङताङको कथा तथा पटकथा रहेको फिल्मलाई शिशिर बिसंखेले खिचेका हुन्। मनोज थापा मगर र सागर आलेको संगीत, श्रवण मुकारुङ र शिव हमालका गीत तथा मनोज थापा मगरकै पाश्र्व संगीत फिल्ममा समेटिएको छ। गीतमा सागर आले र शान्तिश्री परियारको स्वर रहेको छ भने प्रदीप लामा र जुना सुन्दासको अभिनयसमेत देख्न सकिनेछ।

निर्माता जीवन गुरुङका अनुसार फिल्मलाई कथावस्तुसँगै प्राविधिक र दृश्य प्रस्तुतिका हिसाबले पनि स्तरीय बनाउने प्रयास गरिएको छ।

काफिया फिल्म्सले वितरण गर्ने ‘रातो घेरा–द रेड सर्कल’ आगामी २०८३ मंसिर १८ गतेदेखि देशभर प्रदर्शनमा आउनेछ। सत्य घटनामा आधारित कथा, दयाहाङ–मिरुनाको जोडी र बलियो कलाकार तथा प्राविधिक टोलीका कारण फिल्मप्रति दर्शकको चासो बढ्ने अपेक्षा निर्माण पक्षको छ।