entertainment
चलचित्र जुनकिरीको फर्स्ट लुक सार्वजनिक
दीप गुरुङको निर्देशनमा बनेको चलचित्र ‘जुन-किरी’ को फर्स्ट लुक पोस्टर सार्वजनिक गरिएको छ।
वि.सं. २०८३ सालमा प्रदर्शन हुने जानकारीसहित सार्वजनिक पोस्टरमा सुन्दर हिमाली परिवेशसँगै मुख्य कलाकार सुरज तमु र लक्ष्मी गुरुङलाई देखाइएको छ। चलचित्र गुरुङ समुदायको ऐतिहासिक घाँटू परम्परा र संस्कृतिमा आधारित रहने निर्माण पक्षले जनाएको छ।
‘दीप फिल्म्स प्रोडक्सन’को ब्यानरमा निर्माण भइरहेको चलचित्रको छायाङ्कन गोरखाको सिरानचोकस्थित ऐतिहासिक धार्मिक स्थल नाथ मण्डली तथा काठमाडौँका विभिन्न स्थानमा गरिएको छ।
कथाकार भरत राईका अनुसार चलचित्रले काठमाडौँमा संघर्षरत एक फोटोग्राफर र घाँटू नाचसँग जोडिएको उसको यात्रालाई प्रस्तुत गर्नेछ।
चलचित्रमा सुरज तमु, लक्ष्मी गुरुङ, कविता आले, अनिल सुब्बा, डीबी गुरुङ लगायत कलाकारको अभिनय रहेको छ। कथा भरत राई र सुरज तमुको, पटकथा केर डी. कोइँच लिम्बु तथा छायाङ्कन योगेश दाहालको रहेको छ।
निर्देशक दीप गुरुङको यो दोस्रो फिचर फिल्म हो। यसअघि उनले गुरुङ संस्कृतिमै आधारित चलचित्र ‘नैना’ निर्देशन गरिसकेका छन्।
You must be logged in to post a comment Login