अर्जुन गाहा/नेपाल फोटो लाइब्रेरी

पोखराको सेती नदीमाथि अब बन्नेछन् दुई नयाँ आधुनिक पुल। पृथ्वीचोक बसपार्क र पोखरा रंगशाला गेट जोड्ने गरी निर्माण भइरहेको यो पुल पोखराको यातायात पूर्वाधारमा नयाँ पहिचान थप्ने योजनाका रूपमा अघि बढाइएको छ।

पोखरा–मुग्लिन सडक आयोजना अन्तर्गत एसियाली विकास बैंकको सहयोगमा निर्माण भइरहेको यो केबल–स्टेड सिग्नेचर पुल नेपालकै नमुना अत्याधुनिक पुलमध्ये एक हुने अपेक्षा गरिएको छ।

भ्याटसहित एक अर्ब सात करोड रुपैयाँ लागत रहेको पुल निर्माणको जिम्मा रसुवा कन्स्ट्रक्सनले लिएको छ। हाल सञ्चालनमा रहेको पुलको दायाँ र बायाँ छुट्टाछुट्टै दुई नयाँ पुल निर्माण गरिँदै छन्। दुवै पुल १९०–१९० मिटर लामा हुनेछन्।

२०७९ भदौमा तीन वर्षभित्र निर्माण सम्पन्न गर्ने गरी सम्झौता भए पनि डिजाइन स्वीकृति र निर्माणस्थल खाली गराउने काममा ढिलाइ हुँदा २०८० कात्तिकदेखि मात्रै निर्माण सुरु भएको थियो।

हालसम्म करिब ७० प्रतिशत काम सम्पन्न भएको आयोजनाको निर्माण अवधि थप गरी २०८३ फागुनभित्र सक्ने लक्ष्य राखिएको छ।

निर्माण सम्पन्न भएपछि सेती नदीमाथिको आवागमनलाई थप सहज बनाउनुका साथै पोखराको सहरी पूर्वाधारमा आधुनिक संरचना थपिनेछ। आकर्षक बनावट र आधुनिक प्रविधिमा आधारित यी पुल पोखराको नयाँ पहिचानसमेत बन्न सक्नेछन्।

काठमाडौंको बुढानीलकण्ठस्थित एक घरबाट प्रहरीले २१ किलो ७५० ग्राम सुन बरामद गरेको छ । र काठमाडौं उपत्यका अपराध अनुसन्धान कार्यालयले शुक्रबार पत्रकार सम्मेलन गरी सुनसहित पक्राउ परेका तीन चिनियाँ नागरिकलाई सार्वजनिक गरेको छ ।

पक्राउ पर्नेमा २७ वर्षीय हान फेइ, ३७ वर्षीय वाङ जियानझेन र ४७ वर्षीय झोउ लोङक्विन रहेका छन्।

प्रहरीका अनुसार उनीहरूले भाडामा लिएको घरलाई सुन प्रशोधन गर्ने स्थानका रूपमा प्रयोग गर्दै आएका थिए। प्रहरीले उक्त घरबाट सुन गाल्ने मेसिनसमेत बरामद गरेको छ ।

बरामद सुनमध्ये १० किलो ९९७ ग्राम तयारी अवस्थामा रहेको ठोस सुन र १० किलो ७५२ ग्राम अर्धठोस सुन रहेको प्रहरीले जनाएको छ।

घटनाबारे थप अनुसन्धान भइरहेको छ।

पछिल्लो समय काठमाडौंका मुख्य सडकमा ट्राफिक जाम बढ्दै गएको छ।

विशेषगरी बिहान र साँझ कार्यालय समयमा सडकमा सवारीको चाप अत्यधिक हुने गरेको छ।

न्युरोड, सहिदगेट, माइतीघर, थापाथलीदेखि कुपन्डोल र पुल्चोकसम्मका मुख्य सडकमा लामो समयसम्म सवारीसाधनको लाइन देखिन्छ।

चाडपर्व नजिकिँदै गर्दा काठमाडौं उपत्यकामा सवारीसाधनको चाप अझ बढ्ने देखिन्छ।

साँझ परेपछि काठमाडौँमा देखिएको सवारी चापको दृश्य।