लिपमोटर बी १० टप भेरियन्टको मूल्य घट्यो, अब रु. ५४ लाख ९९ हजारमा उपलब्ध

काठमाडौं, जेठ २४

नेपालका लागि लिपमोटर (Leapmotor) गाडीहरूको आधिकारिक वितरक शांग्रिला मोटर्स ले लिपमोटर बी१० को टप भेरियन्टको मूल्य घटाएको घोषणा गरेको छ। नयाँ कर संरचना लागू भएसँगै कम्पनीले २०२६ मोडलको बी१० टप भेरियन्टको मूल्य हालको करिब रु. ६० लाखबाट घटाएर रु. ५४ लाख ९९ हजार कायम गरेको जनाएको छ।

शांग्रिला मोटर्सका निर्देशक जय गोल्छाले मूल्य समायोजनले नेपाली ग्राहकहरूलाई अत्याधुनिक प्रविधियुक्त विद्युतीय एसयुभी अझ सहज रूपमा उपलब्ध गराउने विश्वास व्यक्त गरे। उनका अनुसार कम्पनीको लक्ष्य उच्चस्तरीय इलेक्ट्रिक मोबिलिटीलाई थप पहुँचयोग्य बनाउनु हो।

लिपमोटर बी१० आधुनिक प्रविधि, प्रिमियम आराम तथा उच्च कार्यक्षमताको संयोजन भएको इलेक्ट्रिक एसयुभी हो। यसमा करिब ६९.९ किलोवाट आवरको एलएफपी ब्याट्री, १६० किलोवाटको मोटर तथा ४२० किलोमिटरसम्मको डब्लुएलटिपी रेन्ज उपलब्ध रहेको कम्पनीले जनाएको छ। साथै, युरो एनक्याप ५ स्टार सुरक्षा रेटिङ, उन्नत चालक सहायता प्रणाली, स्मार्ट ककपिट तथा फास्ट चार्जिङ सुविधा यसका प्रमुख विशेषताहरू हुन्।

लिपमोटर विश्वव्यापी अटोमोबाइल समूह ‘स्टेलान्टिस’को रणनीतिक साझेदारीमा विस्तार भइरहेको विद्युतीय सवारी ब्रान्ड हो। कम्पनीले विश्वका विभिन्न बजारहरूमा आफ्नो उपस्थिति विस्तार गर्दै आएको छ र नेपालमा यसको आधिकारिक वितरण शांग्रिला मोटर्समार्फत भइरहेको छ।

कम्पनीका अनुसार नयाँ मूल्यले नेपाली इभी बजारमा प्रतिस्पर्धा थप बढाउने र विद्युतीय सवारी अपनाउन चाहने ग्राहकहरूलाई आकर्षित गर्ने अपेक्षा गरिएको छ।