काठमाडौँमा नयाँ नेपाली नाटक “अतिरञ्जन को मनोरञ्जन” मञ्चन भइरहेको छ। मण्डला थिएटर नेपाल मा चैत १८, २०८२ (एप्रिल १, २०२६) देखि वैशाख १३, २०८३ (एप्रिल २६, २०२६) सम्म प्रदर्शन हुने यो नाटकका लेखक संयोग गुरागाईं तथा निर्देशक सागर खाती कामी हुन्।

नाटकले “अति कहिले अति हुन्छ?” भन्ने मूल प्रश्न उठाउँदै मनोरञ्जनको सीमा, अतिरञ्जनको प्रभाव र यथार्थबीचको सम्बन्धबारे गहिरो विमर्श प्रस्तुत गर्छ। अतिरञ्जन केवल शैली हो कि सत्य व्यक्त गर्ने माध्यम बन्न सक्छ भन्ने प्रश्नमार्फत दर्शकलाई सोच्न बाध्य बनाउने प्रयास गरिएको छ। निर्देशकका अनुसार, यो नाटकले दर्शकको सोच, रोजाइ र निर्णय प्रक्रियामाथि पुनर्विचार गर्न प्रेरित गर्छ।

नाटकमा सोमनाथ खनाल, सन्दीप श्रेष्ठ, स्वप्निल घिमिरे, रोशन अधिकारी, यशोदा गुरुङ, सनम श्रेष्ठ, चक्र बिष्ट, रिजन लामा, इन्द्रबहादुर राई, समीर भट्टराई, अमृत सुनार, रोशन मुर्मु, मृदुल ढकाल, सुस्मिता कार्की, तरुण देउवा, सायुज्य भण्डारी, भाष्कर बुढा, निमिष कट्टेल र सौरभ चालिसे लगायतका कलाकारहरूको अभिनय रहेको छ।

नाटक हरेक दिन (सोमबार बाहेक) साँझ ५:३० बजे र शनिबार दिउँसो १:३० तथा साँझ ५:३० बजे मञ्चन हुँदै आएको छ। हालसम्म नाटकले दर्शक तथा समीक्षकबाट सकारात्मक प्रतिक्रिया बटुल्दै, सोच्न बाध्य पार्ने सशक्त प्रस्तुति बनेको छ।

काठमाडौंको थापागाउँ स्थित मण्डला नाटकघरमा नाटक चरणदास चोरको नियमित मञ्चन सुरु भएको छ।

प्रख्यात भारतीय रंगकर्मी हबीब तन्वीर द्वारा लिखित नाटकलाई नेपाली परिवेशमा राजन खतिवडा र आशन्त शर्मा ले रुपान्तरण गरेका छन्। नाटकको निर्देशन मिलन कार्की ले गरेका हुन्।

लोकशैली, हास्य र व्यङ्ग्यको प्रयोग गरिएको “चरणदास चोर” सामाजिक विषयवस्तुमा आधारित नाटक हो। कथामा एक चोर भए पनि सधैं सत्य बोल्ने वाचा गरेको पात्र चरणदासको जीवनमार्फत समाजभित्र रहेको भ्रष्टाचार, पाखण्ड र शक्तिको दुरुपयोगलाई व्यङ्ग्यात्मक शैलीमा प्रस्तुत गरिएको छ। नाटकले मनोरञ्जनसँगै दर्शकलाई समाजका मूल्य, सत्य र नैतिकताबारे सोच्न प्रेरित गर्ने सन्देश बोकेको छ।

नाटकमा बिश्व बिजय बि.क., बिनय पन्त, बिनिता गिरी, अनुस्का कार्की, लक्ष्मण खत्री, जितन राई, पार्बता भुसाल, दुर्गा पौडेल, सरिता नेपाली, टेकबहादुर खाती, रिजन थिङ्ग लामा, प्रबल जोशी, अर्मन शाही, मणिराज घलेलगायतका कलाकारहरुको अभिनय रहेको छन्।

मण्डलाको थिएटर ल्याबको १८औँ ब्याचका कलाकारहरूको सहभागितामा तयार पारिएको यस प्रस्तुति समाजको यथार्थलाई व्यङ्ग्यात्मक ढंगले प्रस्तुत गर्ने प्रयास भएको निर्देशक कार्कीले बताएका छन्। उनका अनुसार नाटकले दर्शकलाई हाँस्ने, रमाउने मात्र होइन, आफ्नै जीवन र समाजतर्फ फर्केर सोच्न प्रेरित गर्ने उद्देश्य राखेको छ।

मण्डला थिएटर नेपाल को प्रस्तुति रहेको यो नाटक आगामी चैत ११ गतेसम्म सोमबारबाहेक नियमित रुपमा मञ्चन हुनेछ ।

लैंगिक न्याय र कानुनी प्रणालीप्रतिको विश्वासमाथि प्रश्न उठाउने नेपाली रुपान्तरण नाटक प्राइमा फेसिए यतिबेला नियमित मञ्चनमा छ।

नाटक एक सफल आपराधिक वकिल टेस्साको कथामा आधारित छ, जसले यौन दुराचारका आरोपितहरूको पक्षमा वकालत गर्दै न्याय प्रणालीप्रति दृढ विश्वास राख्छिन्। तर आफू नै यौन हिंसाको शिकार भएपछि अदालतको प्रक्रिया, प्रमाणको कठोर मापदण्ड र पितृसत्तात्मक संरचनाप्रति उनको दृष्टिकोण बदलिन्छ। यही अन्तरद्वन्द्वमार्फत नाटकले यौन हिंसाका मुद्दामा पीडितले भोग्ने कानुनी जटिलता र सामाजिक दृष्टिकोणको अन्तर उजागर गर्छ।

नेपाली संस्करणमा कलाकार पशुपति राई एकल अभिनयमा देखिएकी छन्। अनुवाद दुर्गा कार्कीले गरेकी हुन् भने निर्देशन आकांक्षा कार्कीले सम्हालेकी छन्।

मूल नाटककी लेखिका Suzy Miller ले #MeToo आन्दोलनपछिको सन्दर्भमा कृति लेखेकी हुन्, जुन विश्वका विभिन्न देशमा मञ्चन भइसकेको छ। नेपालमा नेपाली भाषामा यसको प्रस्तुति हुनु महत्वपूर्ण मानिएको छ।

फागुन ७ गतेदेखि सुरु भएको नाटक फागुन १६ (फेब्रुअरी १९–२८, २०२६) सम्म मञ्चन हुनेछ। हरेक दिन साँझ ५:१५ बजे र शनिबार दिउँसो १ बजे अतिरिक्त शो राखिएको छ। १३ वर्षमाथिका दर्शकका लागि उपयुक्त मानिएको नाटकमा ‘ट्रिगर वार्निङ’ समेत उल्लेख गरिएको छ।