नेपाल फोटो लाइब्रेरी

भाटभटेनी सुपरमार्केटले व्यस्त दैनिकीका कारण नियमित समयमा किनमेल गर्न नभ्याउने उपभोक्तालाई सहजता प्रदान गर्ने उद्देश्यले भक्तपुरको राधेराधे शाखाबाट २४ सै घण्टा सेवा सुरु गरेको छ।

भाटभटेनीले भदौ २ गते मंगलबारदेखि राधेराधे शाखाबाट चौबीसै घण्टा सेवा सञ्चालनमा ल्याएको हो। रात्रिकालीन समयमा समेत स्टोर सञ्चालन गर्न स्थानीय सरकार तथा सुरक्षा निकायसँग आवश्यक समन्वय गरी सेवा सुरु गरिएको भाटभटेनीले जनाएको छ।

नेपालकै ठूलो रिटेल चेनका रूपमा रहेको भाटभटेनीले २४ सै घण्टा सेवा विस्तार गर्ने क्रममा अब काठमाडौंको टंगाल र ललितपुरको कृष्णगल्ली शाखामा समेत यस्तो सेवा सञ्चालन गर्ने योजना बनाएको छ।

रात्रिकालीन समयमा समेत किनमेल गर्न सकिने भएपछि व्यस्त उपभोक्ताका साथै राति काम गर्ने तथा अन्य कारणले दिउँसो समय निकाल्न नसक्ने ग्राहकलाई समेत सहज हुने अपेक्षा गरिएको छ।

डम्मर बुढामगर/नेपाल फोटो लाइब्रेरी

प्रशासनले आपूर्ति सहज भएको दाबी गरेपनि बागलुङका उपभोक्ताले सहज रुपमा खाना पकाउने ग्यास पाउन सकेका छैनन् ।

मंगलबार मात्रै बागलुङ बजारमा एक हजार ७५ वटा ग्यास आएको छ । उक्त ग्यास १६ वटा डिलरले वितरण गरेका छन् । ग्यास डिलरमा उपभोक्ताको भिड बढेपछि प्रहरीसमेत खटाइएको थियो ।

बजारका विभिन्न ठाउँमा ग्यास लिन उपभोक्ता लाइन लागेको देखिन्थ्यो । मंगलबार बिहान ३ बजेदेखि नै उपभोक्ता लाइन लाग्न थालेका थिए । एक सिलिण्डर ग्यास पाउन तीन घण्टासम्म लाइन बस्नु परेको उपभोक्ताको गुनासो छ ।

बागलुङमा गृहलक्ष्मी, शक्ति, नेपाल, एवानलगायत ब्राण्डका ग्यास वितरण हुँदै आएको छ । प्रहरीले ग्यास कालोबजारी गरेको आरोपमा दुई साताअघि एक जनालाई पक्राउ गरेको थियो । अहिले बिक्रेताले समेत ग्यास मौज्दात राख्न छोडेका छन् । विक्रेताले उपभोक्ताको भिड बढेपछि अहिले ‘कार्ड सिस्टम’ लागु गरेका छन् ।