कराते महासंघको तमुधीं युकेलाई विशेष सम्मान

नेपाल कराते महासंघले बेलायतस्थित सामाजिक संस्था तमुधीं युकेलाई विशेष ‘कदर-पत्र’ सहित सम्मान गरेको छ।

विदेशी भूमिमा रहेर पनि नेपाली खेलकुदको विकास, प्रवद्र्धन र संकटका बेला पुर्‍याएको निरन्तर सहयोगको उच्च मूल्याङ्कन गर्दै महासंघले उक्त सम्मान व्यक्त गरेको हो।

महासंघले हालै टर्कीको इस्तानबुलमा सम्पन्न ‘कराते वान प्रिमियर लिग’ मा ऐतिहासिक रजत पदक जित्न सफल खेलाडी एरिका गुरुङको उपलब्धिप्रति खुशी व्यक्त गरेको छ।

विश्वका शीर्ष वरीयताका खेलाडीहरू सहभागी हुने यस प्रतिष्ठित प्रतियोगितामा पदक जित्नु नेपाली कराते इतिहासकै ठूलो उपलब्धि मानिएको छ।

यससँगै युकेमा आयोजित अन्तर्राष्ट्रिय प्रतियोगितामा सहभागी खेलाडीहरू प्रज्वलसन यामातो श्रेष्ठ र नेली जोशी, तथा प्रशिक्षकहरू कुशल श्रेष्ठ र तारा गुरुङलाई तमुधीं युकेले विशेष सम्मान कार्यक्रम आयोजना गरी हौसला प्रदान गरेको कार्यलाई समेत महासंघले ‘अत्यन्त सराहनीय’ भनेको छ।

यस्तै नेपाल कराते महासंघका अध्यक्ष युवराज लामा र संस्थापक अध्यक्ष तथा महासचिव दावा गुरुङद्वारा हस्ताक्षरित उक्त कदर-पत्रमा भनिएको छ: “विदेशी भूमिमा रहनु भई पनि नेपाल र नेपालीलाई हरेक दुःख-सुखमा साथ दिँदै आउनुभएको र नेपाली खेलकुदको विकासमा सदैव अग्रपङ्क्तिमा रही सहयोग गर्ने संस्था तमुधीं युके प्रति हार्दिक सम्मान व्यक्त गर्दछौं।”

महासंघले भविष्यमा पनि नेपाली खेलकुद र खेलाडीका लागि तमुधीं युकेबाट यस्तै माया र सहयोगको अपेक्षा राखेको छ।