Feature
हाम्रो संस्कृति, हाम्रो उत्सव नारा सहित २३ गते बौद्ध महोत्सव हुदै
काठमाडौं । धार्मिक, सांस्कृतिक, ऐतिहासिक सम्पदा तथा पर्यटन प्रवर्द्धन गर्ने उद्देश्यले “बौद्ध महोत्सव २०८३ — हाम्रो संस्कृति, हाम्रो उत्सव” आयोजना हुने भएको छ।
काठमाडौं महानगरपालिका वडा नं. ६ बौद्धको आयोजनामा हुने महोत्सव आगामी जेठ २३ गते महेन्द्र बौद्ध माध्यमिक विद्यालय, फूलबारी क्षेत्रमा सञ्चालन गरिने आयोजकले जनाएको छ।
महोत्सवमार्फत बौद्ध क्षेत्रको मौलिक पहिचान, संस्कृति, स्थानीय कला, व्यवसाय, युवा सहभागिता तथा सामुदायिक एकतालाई एउटै मञ्चमा प्रस्तुत गर्ने लक्ष्य राखिएको छ। कार्यक्रममा स्थानीयवासी, युवा, व्यवसायी, कलाकार, पर्यटक तथा संस्कृति प्रेमीहरूको उल्लेखनीय सहभागिता रहने अपेक्षा गरिएको छ।
महोत्सवमा सांस्कृतिक नृत्य, लाखे बाजा, मौलिक झाँक्री नृत्य, स्थानीय कला–हस्तकला प्रदर्शनी, खाद्य स्टल, स्थानीय उत्पादन तथा विविध सांगीतिक प्रस्तुति समावेश गरिनेछ। साथै विभिन्न स्थानीय कलाकार तथा सांस्कृतिक समूहहरूको प्रस्तुति रहने आयोजकले जनाएको छ।
वडा अध्यक्ष भुवन लामाले बौद्ध महोत्सव केवल मनोरञ्जनात्मक कार्यक्रम मात्र नभई बौद्ध क्षेत्रको संस्कृति, पर्यटन, स्थानीय व्यवसाय र समुदायलाई जोड्ने साझा अभियान भएको बताए। उनका अनुसार बौद्ध क्षेत्र धार्मिक तथा सांस्कृतिक रूपमा महत्वपूर्ण स्थान भएकाले यसको पहिचान संरक्षण, प्रवर्द्धन र नयाँ पुस्तासम्म पुर्याउनु महोत्सवको मुख्य उद्देश्य हो।
महोत्सवलाई बौद्ध क्षेत्रको साझा उत्सवका रूपमा मनाउन वडा क्षेत्रभित्रका घर, पसल, टोल तथा समुदायमा सूचना, ब्यानर र प्रचार सामग्रीमार्फत सहभागिताका लागि आह्वान गरिनेछ। सहभागीहरूलाई मौलिक संस्कृति झल्किने पोशाकमा उपस्थित भई र्याली, बाजागाजा तथा सांस्कृतिक वातावरणसहित कार्यक्रममा सहभागी हुन अनुरोध गरिएको छ।
कार्यक्रममा आउने सहभागीहरूको सहज आवागमनका लागि पार्किङ व्यवस्थापनमा पनि विशेष तयारी गरिएको आयोजकले जनाएको छ। ट्राफिक व्यवस्थापन तथा सुरक्षाका लागि सम्बन्धित निकाय, स्वयंसेवक र स्थानीय टोली परिचालन गरिनेछ।
महोत्सवमा देश–विदेशबाट आउने पर्यटकहरूलाई पनि विशेष स्वागत गरिनेछ। आयोजकका अनुसार विदेशी पर्यटकहरूले नेपाली संस्कृति, मौलिक बाजा, नृत्य, स्थानीय स्वाद तथा सामुदायिक उत्सव प्रत्यक्ष अनुभव गर्न सक्नेछन्, जसले बौद्ध क्षेत्रको पर्यटन प्रवर्द्धनमा सकारात्मक योगदान पुर्याउने विश्वास लिइएको छ।
कार्यक्रम सबैका लागि खुला रहनेछ। आयोजकले स्थानीयवासी, परिवार, युवा, बालबालिका, व्यवसायी, कलाकार, पर्यटक तथा सम्पूर्ण संस्कृति प्रेमीहरूलाई “हाम्रो बौद्ध, हाम्रो संस्कृति, हाम्रो उत्सव” सफल बनाउन सहभागी हुन आग्रह गरेको छ।
दोलखाको प्रसिद्ध पर्यटकीय तथा धार्मिक गन्तव्य चेर्दुङलाई केन्द्रमा राखेर फोटो पत्रकार जीवन लामाको एकल तस्बिर प्रदर्शनी भईरहेको छ।
प्रदर्शनीमा चेर्दुङ पदयात्राका क्रममा खिचिएका हिमाली दृश्य, गुराँसले ढाकिएका डाँडा, चौँरीगोठ, स्थानीय जनजीवन तथा धार्मिक सम्पदाका आकर्षक तस्बिरहरू समेटिएका छन्।
पर्यटन पत्रकारितामा सक्रिय लामा लामो समयदेखि नेपालका विभिन्न पर्यटकीय गन्तव्यका तस्बिर र आलेखमार्फत प्रचार–प्रसार गर्दै आएका छन्।
प्रदर्शनीमार्फत उनले चेर्दुङको प्राकृतिक सौन्दर्य, अध्यात्मिक महत्व तथा पदयात्रा पर्यटनको सम्भावना उजागर गर्ने प्रयास गरेका छन्।
दोलखाको गौरीशंकर गाउँपालिका–४, झ्याँकुमा जन्मिएका लामा वि.सं. २०६२/६३ को जनआन्दोलनपछि व्यावसायिक पत्रकारितामा सक्रिय भएका हुन्। उनी ‘कालिञ्चोक सन्देश’ साप्ताहिकबाट फोटो पत्रकारितामा परिचित बनेका थिए।
प्रदर्शनी जेठ १४, १५ र १६ गते क्रमशः बिहीबार, शुक्रबार र शनिबार आयोजना गरिने आयोजकले जनाएको छ।
प्रधानमन्त्री बालेन शाह काठमाडौं महानगरपालिकाको प्रमुख हुँदा सुरू गरिएको “यमबुद्ध स्केटबोर्ड पार्क” अहिले निर्माणको अन्तिम चरणमा पुगेको छ।
लामो समयदेखि काठमाडौंका स्केटबोर्ड खेलाडी र युवाहरूले सार्वजनिक स्केट पार्कको माग गर्दै आएका थिए। तर जग्गा अभाव र विभिन्न प्रशासनिक समस्याका कारण यो योजना बारम्बार रोकिँदै आएको थियो।
सुरूमा पार्क वडा नम्बर १६ मा बनाउने योजना थियो। तर आवश्यक जग्गा प्राप्त हुन नसकेपछि योजना रोकियो। पछि काठमाडौं–५ का वडा अध्यक्ष वीरेन्द्र प्रजापति, स्थानीय समुदाय र महानगरको सहकार्यपछि १३ रोपनी सरकारी जग्गा संरक्षण गर्दै २०८१ जेठ २९ गतेदेखि निर्माण काम सुरू गरिएको हो।
हिपहप कलाकार यम बुद्धको सम्झनामा बनिरहेको यो पार्क अब युवाहरूको नयाँ आकर्षण बन्ने अपेक्षा गरिएको छ। यहाँ अन्तर्राष्ट्रिय स्तरको स्केटबोर्डिङ एरिया, र्याम्प, बाउल, खेलमैदान, ओपन जिम, भलिबल कोर्ट र सार्वजनिक शौचालय लगायतका संरचना निर्माण भइरहेका छन्।
नेपाली बजारमा अत्याधुनिक स्मार्ट एयर कन्डिसनर सार्वजनिक भएको छ।
एलजी ईलेक्ट्रोनिक्सले सिजी इलेक्ट्रोनिक्स संगको सहकार्यमा यो डुअलकुल इन्भर्टर रेसिडेन्सियल एयर कन्डिसनर नेपाली बजारमा सार्वजनिक हो।
मंगलबार ललितपुरस्थित भिभान्ता होटलमा आयोजित कार्यक्रममा सार्वजनिक गरिएको उक्त स्मार्ट एसीमा ऊर्जा बचत, छिटो कुलिङ तथा स्मार्ट कन्ट्रोल सुविधा समावेश गरिएको कम्पनीले जनाएको छ।
नयाँ डुअलकुल एसीमा रहेको “किलोवाट म्यानेजर” प्रविधिमार्फत उपभोक्ताले बिजुली खपत आफैं नियन्त्रण गर्न सक्नेछन्। साथै एलजी थिनक्यु एपमार्फत वास्तविक समयमै बिजुली खपत अनुगमन गर्न र अत्यधिक खपत भए सूचना प्राप्त गर्न सकिने सुविधा रहेको बताइएको छ।
कम्पनीका अनुसार डुअल इन्भर्टर कम्प्रेसर प्रविधिले ७० प्रतिशतसम्म बिजुली बचत गर्नुका साथै ४० प्रतिशत छिटो कुलिङ प्रदान गर्छ। त्यस्तै “फ्रिज क्लिन” प्रविधिले एसीभित्र बरफको तह बनाएर धुलो तथा ब्याक्टेरिया हटाउने भएकाले स्वच्छ हावा प्रवाहमा सहयोग पुग्ने दाबी गरिएको छ।
नेपालको मौसम र भोल्टेज अवस्थालाई ध्यानमा राखेर एसीमा गोल्ड फिन एन्टि-कोरोसन कोटिङ, १०० प्रतिशत कपर ट्युब तथा स्टेबलाइजर-फ्री अपरेसन सुविधा पनि दिइएको कम्पनीले जनाएको छ।
कार्यक्रममा निर्भाना चौधरी ले उत्पादनको औपचारिक अनावरण गरेका थिए। कार्यक्रममा सीजी इलेक्ट्रोनिक्स मार्केटिङ विभागका महाप्रबन्धक गौरव हमालले नयाँ प्रविधिले नेपाली उपभोक्तालाई ऊर्जा दक्षता र लागत बचतमा लाभ पुग्ने बताए।
-
entertainment3 weeks agoहङकङ पछि काठमाडौँमा चलचित्र ‘जुनकिरी’
-
entertainment4 weeks agoवर्ल्ड बुक अफ रेकर्ड्स लन्डन बाट कोरियोग्राफर रोजिन शाक्य सम्मानित
-
Offbeat2 weeks agoबबरमहलको भित्तामा जीवित बनेको काठमाडौंको संस्कृति र सम्पदा
-
entertainment4 days agoबौद्ध दर्शनका गुरु यज्ञमान पतिलाई विशेष सम्मान (तस्विरहरु)
-
Auto4 weeks agoपल्सर एनएस ४०० जेड अब ३४९ सीसी इन्जिनमा
-
Feature2 weeks agoपर्यटन बोर्डलाई पाटा दीर्घकालीन सदस्यता सम्मान
-
Auto4 weeks agoनेपाली सडकमा रोयल इन्फिल्ड ‘गोवन क्लासिक ३५०’ को आगमन (तस्विरहरु)
-
entertainment4 weeks agoपिके क्याम्पसको पर्खालमा प्रतिविम्बित आदिवासी संस्कृति
You must be logged in to post a comment Login