वर्ल्ड बुक अफ रेकर्ड्स लन्डन द्वारा नेपाली वरिष्ठ फेसन कोरियोग्राफर रोजिन शाक्यलाई “सर्टिफिकेट अफ एक्सिलेन्स” प्रदान गर्दै सम्मानित गरिएको छ।

यो सम्मान २०२६ अप्रिल ३० मा काठमाडौंमा सम्पन्न २०औँ अन्तर्राष्ट्रिय समिट तथा अवार्ड समारोहमा प्रदान गरिएको हो। नेपालमा फेसन, प्याजेन्ट्री र मोडलिङ क्षेत्रमा उनले पुर्‍याएको दीर्घकालीन योगदानलाई उच्च मूल्यांकन गर्दै उक्त सम्मान प्रदान गरिएको जनाइएको छ।

विशेषतः मञ्चीय अभिव्यक्ति, रनवे कोरियोग्राफी र प्रभावकारी प्रस्तुतिमार्फत “प्रदर्शन” र “प्रस्तुति” बीचको दूरी घटाउने उनको क्षमता—“आर्ट अफ मुभमेन्ट” र “पावर अफ स्पिच” को संयोजन—लाई विशेष प्रशंसा गरिएको छ।

दुई दशकभन्दा बढी समयदेखि सक्रिय शाक्य बहुआयामिक व्यक्तित्वका रूपमा चिनिन्छन्। उनी फेसन कोरियोग्राफर, कार्यक्रम सञ्चालक, मिडिया व्यक्तित्व, भ्वाइस–ओभर कलाकार, पत्रकार तथा प्रशिक्षकका रूपमा स्थापित छन्। हालसम्म उनले झण्डै १,४०० कार्यक्रमहरूको कोरियोग्राफी तथा समन्वय गरिसकेका छन्, जसमा ३०० भन्दा बढी फेसन शो र विभिन्न सौन्दर्य प्रतियोगिताहरू समावेश छन्। स्थानीयदेखि अन्तर्राष्ट्रिय मञ्चसम्म उनले मञ्च व्यवस्थापन, रनवे प्रस्तुति र प्रतिभा विकासमा महत्वपूर्ण भूमिका खेलेका छन्।

उनका अन्तर्राष्ट्रिय संलग्नतामा मिस मरमेड सिङ्गापुर, हेरिटेज प्याजेन्ट्स, मोडल सुपरस्टार र मिस तामाङ वर्ल्ड जस्ता प्रतियोगिताहरू पर्छन्। साथै, उनले मिसेस नेपाल अष्ट्रेलिया २०२५ का आधिकारिक कोरियोग्राफरका रूपमा पनि काम गरेका छन्।

उनको योगदानलाई विभिन्न अवार्डहरूले पनि सम्मानित गरेका छन्। सन् २०१८ को इन्टरनेशनल प्रेसटिज ब्रान्ड अवार्ड, २०१९ को नेशनल युथ लिड अवार्ड, इन्टरनेशनल एक्सिलेन्स अवार्ड लगायतका पुरस्कारहरू उनले प्राप्त गरिसकेका छन्।

मिडिया क्षेत्रमा पनि उनको लामो अनुभव छ। उनले च्यानल नेपाल र एनटिभी प्लसबाट करियर सुरु गरी पछिल्लो १७ वर्षदेखि इमेज च्यानल टेलिभिजनसँग आबद्ध छन्, जहाँ उनले नेपाल भाषा समाचारमार्फत भाषाको संरक्षणमा योगदान दिएका छन्। साथै, उनले झण्डै १,७०० कार्यक्रम सञ्चालन गरिसकेका छन्।

यसरी, वर्ल्ड बुक अफ रेकर्ड्स लन्डनबाट प्राप्त यो सम्मान शाक्यको सिर्जनशीलता, नेतृत्व र समर्पणको प्रतीकका रूपमा लिइएको छ।

काठमाडौँ— समकालीन नेपाली गजलको आकाशमा एउटा नयाँ र सुमधुर लहर थपिएको छ। गजलकार आरजु गिरीद्वारा दिक्पाल छन्दमा रचित मनोभावनात्मक गजल ‘सम्झेर प्यार’ भर्खरै सार्वजनिक भएको छ।

यस गजलमा गायिका तथा संगीतकार बबिना भट्टराई र गायक राज सिग्देलको प्राणप्रिय स्वर सुन्न सकिन्छ। संगीतकार भट्टराईकै सुमधुर संगीत रहेको यस गजललाई किरण कँडेलले एरेन्ज गरेका हुन्। “नेपाली गजलबहार” युट्युब च्यानलमार्फत सार्वजनिक गरिएको यस गजलको भिडियो केशव राज भट्टले निर्देशन गरेका छन्।

शब्दभित्रको दर्शन र समर्पण गजलका प्रत्येक शेरले प्रेम, प्रतीक्षा र समर्पणको गहिरो दर्शन बोकेका छन्। गजलकारले प्रेमलाई क्षणिक आकर्षणभन्दा माथि उठाएर जीवनको मार्गदर्शन गर्ने स्थायी शक्तिका रूपमा प्रस्तुत गरेका छन्।

सम्झेर प्यार तिम्रो साँचेर जिन्दगानी लेखेर प्रेम गाथा आहा भयो कहानी…

गजलको यो मत्ला (पहिलो शेर) ले प्रेमको स्मृतिलाई नै जीवनको आधार मानेको छ। कविवर गोविन्दराज विनोदी र गजलकार उत्तम विचारका अनुसार, यो गजल छन्दको कठोर अनुशासनमा बाँधिएर पनि निकै सरल र मर्मस्पर्शी बनेको छ।

तृष्णा र आत्मसमर्पणको भाव गजलले मानवीय सम्बन्धमा साथ र एक्लोपनको द्वन्द्वलाई मात्र देखाउँदैन, बरु समयको महत्वलाई पनि उजागर गर्छ। “बेला छँदै पिलाऊ प्याला” भन्दै गजलकारले जीवनको मधुर अनुभूतिको प्यास समयमै मेटाउन आग्रह गरेका छन्।

गजलको अन्तिम शेर (मक्ता) मा प्रेमको उच्चतम रूप ‘आत्मसमर्पण’ झल्किएको छ:

बुन्दैछु प्रेममाला आऊ लिएर डोली सुम्पेर जिन्दगी यो तिम्रै हुनेछु रानी

यहाँ ‘रानी’ हुनुको अर्थ केवल दर्जा पाउनु होइन, बरु प्रेमीको हृदयमा सुरक्षित र सम्मानित स्थान प्राप्त गर्नु हो। “म” र “तिमी” बाट माथि उठेर “तिम्रै” हुने यो भावले गजललाई भक्तिमार्गको उचाइमा पुर्‍याएको छ।

समग्रमा, शब्द, स्वर र संगीतको त्रिवेणी बनेको ‘सम्झेर प्यार’ नेपाली गजल क्षेत्रको एउटा उत्कृष्ट सिर्जना बनेको छ। यसले दर्शक र श्रोतालाई प्रेमको एक गहिरो भावानुभूति यात्रामा लैजान सफल देखिन्छ।

काठमाडौँको मण्डला थिएटरमा एक फरक खालको नाटक ग्राण्ड रिहर्सल’को नियमित मञ्चन भइरहेको छ।

यो नाटक परम्परागत कथा भन्दा अलि अलग छ। यहाँ कथा भन्दा बढी ‘अभ्यास’ नै कथा बनेको छ। अभ्यासकै क्रममा साना–साना गल्तीहरू कसरी ठूला अव्यवस्थामा बदलिन्छन् भन्ने दृश्यहरूले नाटक अगाडि बढ्छ। कलाकारहरूले संवाद बिर्सिन्छन्, एकअर्कासँग तालमेल बिग्रिन्छ, मञ्चका सामग्री बिग्रिन्छन्त र यिनै कमजोरीहरू नै दर्शकका लागि मुख्य मनोरञ्जन बन्छन्।

बेलायती समूह ‘मिस्चिफ थिएटरका हेनरी लुइस,जोनाथन सायर र हेनरी शिल्ड्स को हास्य शैलीबाट प्रभावित यो नाटकलाई अनुप न्यौपाने र उमेश तामाङले नेपाली परिवेशमा ढालेका हुन्। निर्देशन पनि तामाङकै रहेको छ।

‘नाटकभित्रको नाटक’ शैलीमा बनेको यस प्रस्तुतिले एउटा फरक सन्देश दिन्छ। मञ्चमा देखिने त्रुटि र संघर्ष पनि कलाकै हिस्सा हुन्। पूर्णता होइन, अपूर्णतामै पनि सौन्दर्य हुन्छ भन्ने भाव नाटकले सरल तरिकाले देखाउँछ।

नाटकमा अनुप न्यौपानेसँगै मिलन कार्की, सुदीप खतिवडा, रुजा राउत, रक्षा थापा, सन्तोष गिरी, श्रीशेष श्रेष्ठ, अमिर ताम्राकार, सुजन घिमिरे, बलबहादुर राई र राजाबाबु कार्कीले अभिनय गरेका छन्।

जेठ ३ गतेसम्म चल्ने यो नाटक करिब १ घण्टा ३० मिनेट लामो छ। सोमबारबाहेक हरेक साँझ ५:३० बजे र शनिबार दिउँसो १:३० बजे अतिरिक्त शो सहित मञ्चन भइरहेको छ।