सामाजिक यथार्थ, मानवीय सम्बन्ध र रहस्यलाई एउटै कथाभित्र जोडेर तयार गरिएको नेपाली फिल्म **‘रातो घेरा–द रेड सर्कल’**को छायांकन सकिएको छ। दयाहाङ राई र मिरुना मगरको मुख्य अभिनय रहेको फिल्मको इन्डक्ल्याप काठमाडौंको बानेश्वरस्थित मण्डला थिएटरमा गरिएको हो।

निर्देशक अनिल बुढा मगरको निर्देशनमा बनेको फिल्म सत्य घटनामा आधारित रहेको निर्माण पक्षले जनाएको छ। सामाजिक र भावनात्मक कथालाई रहस्यको तहसँग जोड्दै फिल्मले मानवीय सम्बन्धका जटिलता, संवेदना र जीवनका विभिन्न पाटोलाई पर्दामा प्रस्तुत गर्ने प्रयास गरेको छ।

फिल्ममा दयाहाङ र मिरुनासँगै सुनिल पोखरेल, भोला राज सापकोटा, माओत्से गुरुङ, कविता आले, रजनी गुरुङ, शेखर चापागाईँ, डीबी गुरुङलगायत कलाकारको अभिनय छ। फिल्ममा नयाँ तथा अनुभवी कलाकारको ठूलो टोलीलाई एकसाथ प्रस्तुत गरिएको निर्माण पक्षले जनाएको छ।

जीवन गुरुङ, कविता गुरुङ, भोजेन्द्र गुरुङ (भोज) र सरुन शेरचन निर्माता रहेको फिल्ममा सुमन गुरुङ र खेम राना सह–निर्माताका रूपमा छन्।

राजु स्याङताङको कथा तथा पटकथा रहेको फिल्मलाई शिशिर बिसंखेले खिचेका हुन्। मनोज थापा मगर र सागर आलेको संगीत, श्रवण मुकारुङ र शिव हमालका गीत तथा मनोज थापा मगरकै पाश्र्व संगीत फिल्ममा समेटिएको छ। गीतमा सागर आले र शान्तिश्री परियारको स्वर रहेको छ भने प्रदीप लामा र जुना सुन्दासको अभिनयसमेत देख्न सकिनेछ।

निर्माता जीवन गुरुङका अनुसार फिल्मलाई कथावस्तुसँगै प्राविधिक र दृश्य प्रस्तुतिका हिसाबले पनि स्तरीय बनाउने प्रयास गरिएको छ।

काफिया फिल्म्सले वितरण गर्ने ‘रातो घेरा–द रेड सर्कल’ आगामी २०८३ मंसिर १८ गतेदेखि देशभर प्रदर्शनमा आउनेछ। सत्य घटनामा आधारित कथा, दयाहाङ–मिरुनाको जोडी र बलियो कलाकार तथा प्राविधिक टोलीका कारण फिल्मप्रति दर्शकको चासो बढ्ने अपेक्षा निर्माण पक्षको छ।

हरितालिका तीजका अवसरमा काठमाडौंको पशुपतिनाथ मन्दिरमा बिहानैदेखि भक्तजनको भीड लागेको छ। व्रत बसेका महिलाहरू दर्शन तथा पूजापाठका लागि लामबद्ध भएका छन् भने दर्शनपछि समूह बनाएर नाचगान र रमाइलो गरिरहेका दृश्य पशुपति क्षेत्रमा देखिएका छन्। भक्तजनहरू सामूहिक तथा एकल तस्बिर खिच्न पनि व्यस्त देखिन्छन्।

व्रतालु महिलाको सहजताका लागि पशुपतिनाथ मन्दिरका चारवटै ढोका बिहान ३ बजेदेखि खुला गरिएको थियो। भक्तजनका लागि विभिन्न चार वटा दर्शन मार्गको व्यवस्था गरिएको पशुपति क्षेत्र विकास कोषले जनाएको छ। बिहानको समयमा लाममा बसेको करिब आधा घण्टामै दर्शन गरेर फर्कन सक्ने अवस्था रहेको जनाइएको छ।

तीजका अवसरमा पशुपति क्षेत्रमा चार हजार सुरक्षाकर्मी र विभिन्न २४ धार्मिक तथा सामाजिक संस्थाका ८५५ स्वयंसेवक परिचालन गरिएको छ। पशुपतिनाथसँगै देशभरका शिवालयमा पनि दर्शन तथा पूजाका लागि भक्तजनको भीड लागेको छ।

प्रकाशचन्द्र तिमिल्सेना/नेपाल फोटो लाइब्रेरी

भोटेकोशी हुँदै त्रिशुलीमा आएको बाढीले नदी किनारस्थित सडकको तल्लो भाग कटान गरेपछि पृथ्वी राजमार्ग १४ दिनदेखि अवरुद्ध छ । काठमाडौँ जोड्ने प्रमुख लाइफलाइन मानिने राजमार्गअन्तर्गत धादिङको कृष्णभीरमा भदौ १४ मा त्रिशुलीले सडकको बेस नै कटान गरेपछि एक सय मिटर सडक भासिएको थियो ।  

कृष्णभीरमा भासिएकै ठाउँभन्दा माथि नयाँ ट्रयाक खोल्ने र त्यसलाई सवारीको सहज आवतजावतका लागि तयार पार्ने काम यतिबेला धमाधम भइरहेको छ । पहाड काटेर २५० मिटर ट्रयाक दुवैतिर जोड्ने काम सकिइसकेको छ ।

ग्राभेल, रोलिङको काम आइतबारबाट सुरू गर्ने र ३–४ दिनमा (भदौ मसान्तभित्रै) सकेर यातायात सञ्चालनमा ल्याइने नागढुङ्गा–मुग्लिङ सडक योजना, पश्चिम खण्डकी योजना प्रमुख सजना अधिकारीले बताइन् ।

‘ग्राभल गर्न काटेकोजस्तो सजिलो हुँदैन । रोलिङ गरेर मिलाउनुपर्छ । लेयर–लेयरमा गर्नुपर्छ । एउटै लेयरमा गर्न सकिँदैन,’ उनले भनिन, ‘त्यसकारण ३–४ दिन लाग्न सक्छ । यो महिनाको अन्त्यबाट यातायात सञ्चालन गर्ने लक्ष्य छ ।’  

त्रिशुलीले सडकको बेस नै कटान गरेर भासिएकाले नयाँ ट्रयाक खोल्नुपरेको उनले बताइन् । नयाँ खोलिएको ट्रयाकले आवतजावतमा दुःख नदिने उनको विश्वास छ ।

‘कृष्णभीरमा पहिले बायो इन्जिनियरिङको प्रयोग गरेर कंक्रिट र विरुवालाई मिलाएर पहिरो रोकथाम गरिएको थियो । त्यो दीर्घकालीन रह्यो,’ अधिकारीले भनिन्, ‘अहिले हामीले नसोचेको बाढी आएर सडकको तलपट्टिको भाग काटिँदा माथि पनि भासियो । अहिले माथिपट्टिबाट सडक निर्माण गरेका छौँ ।

त्यति धेरै डिस्टर्ब नहोला भन्ने आशा राखौँ ।’

कृष्णभीरमा पहिरो खसेपछि अत्यावश्यक वस्तु ढुवानी प्रभावित छ । यही कारण बजारमा अहिले खाना पकाउने ग्यासको समस्या बल्झिएको छ ।

हेटौँडा हुँदै काठमाडौँ आउने सडकमा पनि सवारीको चाप बढेकाले काठमाडौँ आउजाउ गर्न असहज भइरहेको छ ।

कृष्णभीरमा खसेको पहिरोले काठमाडौँ, धादिङ हुँदै चितवन, तनहुँ, कास्की, पश्चिम नेपालका अन्य जिल्ला जाने र आउने सवारी साधन प्रभावित भएका छन् ।