दसैँको रौनकसँगै काठमाडौँको खुलामञ्चमा दुर्गा भवानीको पूजा आराधना भइरहेको छ। यहाँ स्थापना गरिएको दुर्गाको मूर्ति दर्शन र पूजाका लागि आकर्षण बनेको छ।
हिन्दू धर्ममा दसैँलाई देवी दुर्गाले महिषासुरमाथि विजय प्राप्त गरेको पर्वका रूपमा लिइन्छ। नवरात्रका नौ दिन देवीका विभिन्न रूपको पूजा गरिन्छ। शक्तिको प्रतीक दुर्गाको मूर्तिमा देखिने दस हात र विभिन्न अस्त्रले दुष्ट शक्तिविरुद्धको संघर्ष र विजयको सन्देश दिन्छन्। सिंहलाई देवीको शक्ति र साहसको प्रतीकका रूपमा चित्रण गरिन्छ।
घरघरमा कलश स्थापना गरी जमरा राख्नेदेखि सार्वजनिक स्थलमा दुर्गाको मूर्ति स्थापना गरेर सामूहिक पूजा गर्नेसम्मका परम्पराले दसैँको धार्मिक र सांस्कृतिक विविधता झल्काउँछन्। खुलामञ्चमा भइरहेको दुर्गा पूजाले पनि राजधानीमा दसैँको धार्मिक आस्था र सांस्कृतिक उत्सवको दृश्य प्रस्तुत गरेको छ।
