नेपालकै अग्लो पुल फास्ट ट्रयाकमा निर्माण

काठमाडौं–तराई/मधेश द्रुतमार्ग (केटिएफटी) अन्तर्गत नेपालकै सबैभन्दा अग्लो पुल काठमाडौं–तराई/मधेश फास्ट ट्रयाक मा निर्माणाधीन रहेको छ।

मकवानपुरको लेनडाँडा र धोद्रे क्षेत्रमा बनिरहेको उक्त पुलको उचाइ करिब ८२ मिटर रहेको छ, जुन धरहरा भन्दा पनि अग्लो हो। करिब २७० देखि ३३९ मिटर लम्बाइको यो आधुनिक बक्स डिजाइन पुल भूकम्प प्रतिरोधी प्रविधिमा आधारित छ।

टनेलको मुख नजिक निर्माण भइरहेको यस पुलमा दुई समानान्तर संरचना रहनेछन्, जसले दुवै दिशामा सवारी आवतजावत सहज बनाउनेछ। हाल पुलको ढलान र संरचनागत काम अन्तिम चरणमा पुगेको छ।

नेपाली सेनाको नेतृत्वमा अघि बढिरहेको परियोजनामा समग्र भौतिक प्रगति करिब ४५ प्रतिशत पुगेको छ। निर्धारित समयमै सम्पन्न भएमा यो पुल नेपालकै पूर्वाधार विकासको प्रतीक बन्ने अपेक्षा गरिएको छ।