काठमाडौंको कोटेश्वरदेखि कलंकीसम्मको आठ लेन चक्रपथ हेर्दा सडक फराकिलो, व्यवस्थित र आकर्षक देखिन्छ। ठाउँठाउँमा निर्माण गरिएका आकाशे पुलले पैदलयात्रीलाई सडक पार गर्न सहज बनाउने प्रयास पनि गरेका छन्। तर यो सडकको सुन्दरता र भव्यताभित्र पैदलयात्रीले भोग्नुपर्ने केही आधारभूत समस्यासमेत लुकेका छन्।
सडकका विभिन्न स्थानमा आकाशे पुल भए पनि जथाभावी सडक पार गर्ने जोखिम अझै देखिन्छ। अर्कोतर्फ, सार्वजनिक शौचालयको अभावले पैदलयात्रीसँगै लामो दूरीसम्म यात्रा गरिरहेका सवारीसाधनका यात्रुले समेत सास्ती भोग्नुपर्ने अवस्था छ।
अपाङ्गता भएका व्यक्ति, ज्येष्ठ नागरिक तथा हिँडडुलमा कठिनाइ हुने व्यक्तिलाई लक्षित सहज पहुँच र सुविधामा पनि पर्याप्त ध्यान पुगेको देखिँदैन।
सडक फराकिलो र आकर्षक बनाउनु मात्रै पर्याप्त होइन, त्यहाँ हिँड्ने र यात्रा गर्ने मानिसका आधारभूत आवश्यकतासमेत पूरा हुनुपर्छ। अब निर्माण हुने सडक तथा पूर्वाधार आयोजनाले यी कमजोरीबाट पाठ सिक्दै सुरक्षित पैदलमार्ग, पर्याप्त सार्वजनिक शौचालय र अपाङ्गतामैत्री संरचनालाई प्राथमिकता दिन आवश्यक छ।
सडकको वास्तविक सुन्दरता त्यसको चौडाइमा मात्रै होइन, सबैका लागि सुरक्षित र सहज यात्रामा पनि देखिनुपर्छ।
