प्रेम, आसक्ति र विश्वासघातले मानिसलाई कहाँसम्म पुर्‍याउन सक्छ भन्ने विषय उठान गरिएको नाटक ‘जोलिन्’ अहिले टेकुस्थित कौसी थिएटरमा मञ्चन भइरहेको छ।

फेड आउट पिक्चर्स र कथा घेराको सहकार्यमा तयार भएको नाटक साउन ८ देखि २१ गतेसम्म (मंगलबार बाहेक) हरेक साँझ ५:१५ बजे तथा शनिबार दिउँसो १ बजे पनि प्रदर्शन हुँदैछ।

नाटकमा गृहिणी मिरा, उनका श्रीमान् माधव र जोलिन्बीचको सम्बन्धमार्फत प्रेम, आसक्ति, ईर्ष्या र हिंसाको मनोवैज्ञानिक पक्ष प्रस्तुत गरिएको छ। कथा अघि बढ्दै जाँदा घटनाक्रम पागलपन र हत्यासम्म पुग्छ।

गीत, संगीत र नृत्यलाई कथासँग जोडेर प्रस्तुत गरिएको नाटकमा काल्पनिक ‘राष्ट्र प्रहरी माया विभाग’ ले प्रेमजन्य अपराधको अनुसन्धान गर्दै कथालाई फरक शैलीमा अघि बढाउँछ।

ऋषभ र बुद्धि पोखरेलको लेखन रहेको नाटकको निर्देशन ऋषभले गरेका हुन्। नाटकमा मिरा खड्का, अनोज पाण्डे, तार्रा, निशान खत्री, ऋषिकेश बस्याल, जीवन गौतम, निशान्त महत र तुफान थापाको अभिनय रहेको छ।

एक थिएटर नेपालले आफ्नो आगामी नाटक ‘केसामी–नाम्सामी’ को पोस्टर र प्रदर्शन मिति सार्वजनिक गरेको छ। नाटक साउन १८ देखि भदौ १३ गतेसम्म (बुधबार बाहेक) मञ्चन हुनेछ।

नाटकको निर्देशन अनिल सुब्बा ले गरेका छन् भने नाट्य रूपान्तरण यासेली योङ्हाङ ले गरेका हुन्।

निर्माण टोलीका अनुसार पुस्तौँदेखि मौखिक परम्परामा जीवित रहेको मुन्धुम को ज्ञान, जीवनदर्शन र सांस्कृतिक स्मृतिलाई आधुनिक रंगभाषामार्फत प्रस्तुत गर्ने उद्देश्यले नाटक तयार गरिएको हो।

निर्देशक सुब्बाका अनुसार नाटकले परम्परा र वर्तमानबीचको संवाद, मौलिक संस्कृति, इतिहास, प्रकृतिसँगको सम्बन्ध, मानवीय संवेदना र पहिचानका विविध पक्षलाई रंगमञ्चमार्फत उजागर गर्ने प्रयास गरेको छ।

काठमाडौंको थापागाउँस्थित एक थिएटर नेपालमा चर्चित नेपाली नाटक ‘जिउँदो आकाश’को नियमित मञ्चन सुरू भएको छ।

यौनिक तथा अल्पसंख्यक समुदायको जीवन, पहिचान र उनीहरूले समाजमा भोग्ने विभेदको कथा प्रस्तुत गर्ने नाटक ‘जिउँदो आकाश’ साउन १ गतेदेखि नियमित मञ्चनमा आएको हो।

वि.सं. २०७३ जेठ २९ गते दोलखाको चरीकोटबाट पहिलो पटक मञ्चन भएको यो नाटक यौनिक तथा अल्पसंख्यकको विषयवस्तुमा आधारित पहिलो नेपाली नाटकका रूपमा परिचित छ।

नेपालका विभिन्न सहरमा ८६ भन्दा बढी पटक मञ्चन भइसकेको यो नाटक भारतको दिल्ली र गुवाहाटीमा आयोजित अन्तर्राष्ट्रिय नाट्य महोत्सवमा समेत प्रस्तुत भइसकेको छ।

लेखक चन्द्रप्रसाद पाण्डेले पुरूष शरीर लिएर जन्मिए पनि स्त्री स्वभाव भएकी ‘गरिमा’ (गौरव) को कथामार्फत समाज, परिवार र विद्यालयबाट भोग्नुपरेको अस्वीकृति तथा संघर्षलाई नाटकमा प्रस्तुत गरेका छन्। निर्देशक आर.के. मेहताका अनुसार नाटकले लैंगिक पहिचानभन्दा माथि उठेर मानवतालाई केन्द्रमा राख्ने सन्देश दिन्छ।

नाटकमा कलाकार अनिल सुब्बाले गरिमाको भूमिकामा अभिनय गरेका छन्। रेनुका कार्की सह-निर्देशक रहेकी छन् भने किरण चाम्लिङ राईको संगीत परिकल्पनासँगै युकेश राई, सोनाम तामाङलगायतले प्रत्यक्ष संगीत प्रस्तुत गरिरहेका छन्।

साउन १ देखि १२ गतेसम्म बुधबारबाहेक हरेक दिन साँझ ५:३० बजे नाटक मञ्चन हुनेछ। दर्शकको सुविधाका लागि शनिबार दिउँसो १:३० बजे अतिरिक्त शो पनि राखिएको छ।