समय, सम्बन्ध र आत्मपहिचानको कथा बोकेको ‘माण्डवी’

सद्भाव थिएटर–नेपालको प्रस्तुतिमा नयाँ बानेश्वर, थापागाउँस्थित ‘एक थिएटर नेपाल’मा नाटक ‘माण्डवी’को मञ्चन सुरु भएको छ। राम के.ए.सी.को लेखन तथा निर्देशनमा तयार पारिएको यो नाटक असोज १ गतेदेखि १४ गतेसम्म प्रदर्शन हुनेछ।

मंगलबार बाहेक प्रत्येक दिन साँझ ५:३० बजे र शनिबार अतिरिक्त शो दिउँसो १:०० बजे पनि नाटक हेर्न सकिनेछ।

‘माण्डवी’ नाटकले तीव्र गतिमा दौडिरहेको आधुनिक जीवनशैली र त्यसले मानव सम्बन्धमा पारेको प्रभावलाई मुख्य विषय बनाएको छ।

प्रविधि, करियर, जागिर, पैसा र सम्पत्तिको दौडधुपमा मानिसले कसरी आफैँलाई बिर्सँदै गएको छ र यसको असर उसकै जीवन तथा सम्बन्धमा कसरी परिरहेको छ भन्ने कुरा नाटकमा जीवन्त रूपमा प्रस्तुत गरिएको छ।
नाटकले मानिसले गुमाउँदै गएको समय, सम्बन्ध र आत्मीयतालाई पुनः खोज्नुपर्ने आवश्यकतामाथि जोड दिएको छ।
भावनाहरूको शुद्धीकरण, सम्बन्धहरूको पुनर्जागरण, आत्म-साक्षात्कार, पूर्वाग्रहको त्याग तथा अरूको अस्तित्वलाई स्वीकार गर्ने क्षमता विकास गर्नुपर्ने सन्देश यसले दिन्छ। ‘माण्डवी’लाई वर्तमान समयको प्रतिनिधि पात्रका रूपमा उभ्याउँदै नेपाली समाजका अदृश्य अन्तर्विरोध, मोह, स्वतन्त्रता, जीवन-दर्शन, सत्य र मिथ्यालाई मञ्चमा उतारिएको छ।

निर्देशक राम के.ए.सी.का अनुसार ‘माण्डवी’ केवल एउटा पात्र वा नाटक मात्र नभएर समकालीन मानव जीवनको वास्तविक प्रतिबिम्ब हो, जसले दर्शकलाई आफ्ना सम्बन्ध र अस्तित्व जोगाउनेबारे सोच्न बाध्य बनाउँछ।

नाटकमा निलीमा पाण्डे, एवन राज उप्रेती, सन्तोष बिष्ट, रुषा श्रेष्ठ, संस्कृति वन, तीर्सना राई, भिष्मराज जोशी र किरण चापागाईं लगायतका कलाकारहरूको जीवन्त अभिनय रहेको छ।