नमुना कलेज अफ फेशन टेक्नोलोजी (एनसीएफटी) को २०औँ ग्राजुएसन फेसन शो “विविधायन सौन्दर्यम्” शनिबार ललितपुरको झम्सिखेलस्थित द प्लाजा नेपालमा सम्पन्न भएको छ। प्रकृतिबाट प्रेरित सिर्जनात्मकता र कलात्मक अभिव्यक्तिको समिश्रण प्रस्तुत गर्ने यो कार्यक्रम नयाँ पुस्ताका डिजाइनरहरूको प्रतिभा प्रदर्शन गर्ने महत्वपूर्ण मञ्च बनेको थियो।

फेशन डिजाइनिङमा स्नातक हुँदै गरेका ६२ जना विद्यार्थीहरूले छ वटा अवधारणामा आधारित संग्रहमार्फत नेपालको प्राकृतिक भू–दृश्य, जैविक विविधता र सांस्कृतिक सौन्दर्यलाई रनवेमा प्रस्तुत गरेका थिए। “विविधायन सौन्दर्यम्” भन्ने मूल अवधारणाले विविधताभित्रको सौन्दर्यलाई उजागर गरेको थियो।

कार्यक्रमको शुभारम्भ कलेजका संस्थापक प्रिन्सिपल ज्ञानी शोभा तुलाधरले रनवेबाट गरेकी थिइन् भने शोको कोरियोग्राफी रोजिन शाक्यले गरेका थिए। कार्यक्रममा ३२ जना मोडलहरूले डिजाइनहरूलाई आकर्षक रूपमा प्रस्तुत गरेका थिए।

प्रस्तुत संग्रहहरू प्रकृतिका विभिन्न पक्षमा केन्द्रित थिए। “नेपालियम” ले हिमनदी र पानीको सम्बन्ध, “इरिडेसन्ट शेल्स” ले कीराको संरचना, “आवरण मृत्तिका” ले माटोको गहिराइ, “एभियोरा” ले हिमाली स्वतन्त्रता, “रेड लिस्ट रिभेरी” ले संकटग्रस्त वन्यजन्तु संरक्षण, र “वनस्पति कुसुम” ले पुष्पीय विविधतालाई अभिव्यक्त गरेका थिए।

कार्यक्रममा एनसीएफटी फेसन क्याटलगको चौथो संस्करण पनि विमोचन गरिएको थियो।

यो शो पूर्वाञ्चल विश्वविद्यालयअन्तर्गतको शैक्षिक कार्यक्रमको महत्वपूर्ण हिस्सा हो, जसले विद्यार्थीलाई आफ्नो सिर्जना प्रस्तुत गर्ने अवसर दिन्छ। समग्रमा, कार्यक्रमले नेपाली फेसनको उदीयमान भविष्यलाई सशक्त रूपमा प्रस्तुत गरेको देखिन्छ।

प्रसिद्ध फेसन कोरियोग्राफर रोजिन शाक्यलाई मिसेस नेपाल अष्ट्रेलिया २०२५ का लागि आधिकारिक कोरियोग्राफर नियुक्त गरिएको छ।

हिमाली कल्चर ग्रुप मेलबर्न र इभेन्ट्स नेपाल अष्ट्रेलियाको सहकार्यमा आयोजना हुन लागेको यो अग्रगामी सौन्दर्य प्रतियोगिता अष्ट्रेलियामा बसोबास गर्ने विवाहित नेपाली महिलाको शक्ति, प्रतिभा र पहिचानलाई सम्मानित र उत्सवमय बनाउन समर्पित रहेको छ।

रोजिनको संलग्नतासँगै प्रतियोगीहरूलाई कलात्मक प्रशिक्षण र विश्वस्तरको ग्रुमिङ अनुभव दिलाउने उद्देश्य लिइएको छ। कार्यक्रमको व्यवस्थापन सीजन मिडियाले गर्नेछ, जसले १६ वर्षभन्दा बढी अनुभवसहित नेपालमा प्रतिष्ठित इभेन्ट कम्पनीको रूपमा ख्याति कमाएको छ।

करिब दुई दशक लामो सफल करिअरसहित रोजिन शाक्यलाई नेपालको सबैभन्दा सफल फेसन कोरियोग्राफरमध्ये एकका रूपमा चिनिन्छ। उनले विश्वभर १,२०० भन्दा बढी इभेन्ट कोरियोग्राफ गरेका छन्, जसमा ३०० भन्दा बढी फेसन शोहरू पर्दछन्।

उनका कार्यहरू हेरिटेज पेजेन्ट्स, मिस मरमेड सिंगापुर, मोडल सुपरस्टार मुम्बई र मिस तामाङ वर्ल्ड जस्ता अन्तर्राष्ट्रिय प्रतियोगितामा समेत प्रस्तुत भइसकेका छन्। उनको सिर्जनात्मक निर्देशन कलात्मक शुद्धता, सांस्कृतिक सचेतना र फेसन तथा व्यक्तित्व विकासलाई विश्वव्यापी स्तरमा प्रवर्द्धन गर्ने प्रतिबद्धताबाट निर्देशित हुन्छ।

फेसन क्षेत्रमा उनको योगदानलाई विभिन्न सम्मानले मान्यता दिइएको छ। सन् २०१९ मा मलेसियामा भएको इन्टरनेशनल एक्सिलेन्स अवार्डमा उनलाई आउटस्ट्यान्डिङ इन्टरनेशनल कोरियोग्राफर उपाधि दिइएको थियो। सोही वर्ष दुबईमा उनले इन्टरनेशनल फेसन कोरियोग्राफर एचिभमेन्ट अवार्ड प्राप्त गरेका थिए।

काठमाडौँमा आयोजित पेजेन्ट नेपाल फेसन एण्ड मोडल अवार्ड्समा उनलाई लेजन्डरी फेसन कोरियोग्राफरको रूपमा सम्मान गरिएको थियो भने २०२० मा फेसनफेयर अवार्डमा बेष्ट इन्टरनेशनल नेपाली फेसन कोरियोग्राफर र मोडल सङ्स अवार्डमा बेष्ट फेसन कोरियोग्राफरका रूपमा सम्मानित गरियो। यस्तै, २०२२ मा दुबईमा भएको एसियन प्रोफेशनल एचिभमेन्ट अवार्ड्समा उनलाई आइकोनिक फेसन कोरियोग्राफर घोषित गरियो भने २०२३ मा थाइल्यान्डमा भएको हेरिटेज इन्टरनेशनल अवार्डमा कोरियोग्राफर अफ द इयर उपाधि प्राप्त गरे।

फेसन क्षेत्रमा मात्र नभई रोजिन शाक्य एक परिचित सञ्चारकर्मी पनि हुन्। हाल उनी इमेज च्यानल टेलिभिजनमा नेपल भाषा (नेपाल भाषा) समाचार वाचकको रूपमा कार्यरत छन्। अनुभवसंपन्न होस्ट र एम्सीको रूपमा उनले नेपाल र विदेशमा गरी १,४०० भन्दा बढी कार्यक्रम सञ्चालन गरिसकेका छन्। शैक्षिक क्षेत्रमा पनि उनी नमुना कलेज अफ फेसन टेक्नोलोजी, आईआईएफटी र काठमाडौँ एकेडेमी अफ टुरिजम एण्ड हस्पिटालिटीमा अध्यापन गर्दै आएका छन्।

उनका शिक्षण विषयमा व्यक्तित्व विकास, कार्यक्रम व्यवस्थापन, पर्यटन सञ्चार र मिडिया पर्दछन्। यस्तै, उनी नेपाल एयरहोस्टेस एकेडेमी र फ्लाइटेक इन्टरनेशनलमा व्यक्तित्व प्रशिक्षकका रूपमा पनि संलग्न छन्।

मिसेस नेपाल अष्ट्रेलिया २०२५ को यात्राअन्तर्गत रोजिनले ३० जना छोटकरीमा छनोट भएका प्रतियोगीहरूको ग्रुमिङ र कोरियोग्राफी नेतृत्व गर्नेछन्।

उनको प्रशिक्षणमा स्टेज प्रस्तुति, रनवे सीप, प्रदर्शन संयोजन र समग्र प्रस्तुति कला समावेश हुनेछ। यो प्रतियोगिता पहिलोपटक आयोजना हुन लागेको हो, जसले अष्ट्रेलियामा बसोबास गर्ने विभिन्न पेशागत पृष्ठभूमिका नेपाली महिलालाई सहभागिता गर्न आमन्त्रण गरेको छ। यसको भव्य फाइनल कार्यक्रम २०२५ सेप्टेम्बर १३ तारिखमा मेलबर्न, अष्ट्रेलियामा हुने तय भएको छ।

सन् २०२५ की मिस नेपाल लुना लुइँटेल बनेकी छन्। 

शनिबार ललितपुरको गोदावरीस्थित सनराइज कन्भेन्सन सेन्टरमा आयोजित ग्रान्ड फिनालेमा लुइँटेल मिस नेपाल भएकी हुन्।

हिडन ट्रेजरले आयोजना गरेको मिस नेपालको ३१ औं संस्करणमा २५ सुन्दरीलाई पछि पार्दै लुइँटेलले  ‘मिस नेपाल वर्ल्ड’ को उपाधि जितेकी हुन्।

उनलाई पूर्वमिस नेपाल आस्मा कुमारी केसीले ताज लगाइदिएकी थिइन्।

यस्तै,  मिस अर्थ सोनी घले भएकी छन्। उनलाई पूर्वमिस अर्थ सुमना केसीले ताज प्रदान गरेकी थिइन् भने मिस नेपाल इन्टरनेसनको ताज उरूषा भण्डारीलाई प्रदान गरिएको छ। उनलाई पूर्वमिस नेपाल इन्टरनेसन करूणा रावलले ताज लगाइदिएकी थिइन्।