काठमाडौँमा निरन्तर झरी, साँझपछि मौसममा सुधार हुने[तस्विर]

काठमाडौँ उपत्यकामा दुई दिनदेखि निरन्तर वर्षा भइरहेको छ। वर्षाका कारण जनजीवन प्रभावित बनेको छ भने सडकमा आवागमन गर्ने पैदलयात्री तथा सवारी चालकलाई सास्ती भएको छ।

केही दिनअघिसम्म घाम लागेको उपत्यकाको मौसम एकाएक बदलिएपछि बिहीबारदेखि नै आकाश धुम्मिँदै वर्षा सुरु भएको हो। शुक्रबार र शनिबार पनि वर्षा नरोकिँदा उपत्यकाको जनजीवन प्रभावित भएको छ। निरन्तरको झरीले बाहिरी गतिविधि, घुमफिर तथा दैनिक कामकाजमा समेत असर पारेको छ।

वर्षाका कारण सडक भिजेका छन् भने कतिपय स्थानमा पानी जम्दा सवारी आवागमन असहज बनेको छ। छाता र रेनकोट ओढेर गन्तव्यतर्फ लाग्ने पैदलयात्रीको चहलपहल पनि देखिन्छ।

मौसम पूर्वानुमानअनुसार शनिबार दिउँसोपछि काठमाडौँमा वर्षाको सम्भावना घट्दै जाने र साँझबाट मौसममा सुधार हुने अनुमान छ। आइतबार बिहान मौसम खुल्ने सम्भावना रहे पनि दिउँसो भने मेघगर्जनसहित छिटपुट वर्षा हुन सक्ने पूर्वानुमान गरिएको छ।

निरन्तरको वर्षाका कारण नदी तथा खोलामा पानीको बहाव बढ्न सक्ने भएकाले नदी किनारका बासिन्दालाई सतर्क रहन आग्रह गरिएको छ।