यस वर्षको स्प्रिङ सिजनमा विश्वको सर्वोच्च शिखर सगरमाथाको सफल आरोहण गर्न सफल २३ जना गुरुङ आरोहीलाई सम्मान गरिएको छ।

गुरुङ पर्यटन व्यवसायी संघ, नेपाल (जिटिन) ले तमू (गुरुङ) सञ्चारकर्मी संघ, नेपाल (एटजोन) सँगको सहकार्यमा राजधानीमा आयोजित विशेष कार्यक्रममा उनीहरूलाई सम्मान गरेको हो।

कार्यक्रमका प्रमुख अतिथि तथा गुरुङ समुदायबाट सगरमाथा आरोहण गर्ने पहिलो व्यक्तित्व मोतिलाल गुरुङ ले आरोहीहरूलाई प्रशंसापत्रसहित सम्मान गर्नुभयो। उहाँले हिमाल पर्यटनमा व्यावसायिक रूपमा सक्रिय रहन र आफ्नो सीप तथा क्षमता थप विकास गर्न युवाहरूलाई प्रेरित गर्नुभयो।

यस वर्ष सयौं आरोहीले सगरमाथा सफलतापूर्वक आरोहण गरेका छन्। तीमध्ये गुरुङ समुदायका दुई दर्जनभन्दा बढी युवाले पनि ऐतिहासिक सफलता हासिल गरेका छन्। विशेषगरी गोर्खाको धार्चे गाउँपालिका–४ लाप्राक र संखुवासभाको भोटखोला गाउँपालिकाका युवाहरूको उल्लेख्य सहभागिता रहेको छ। साथै तनहुँ, कास्की र ताप्लेजुङका आरोहीले पनि सगरमाथा चुम्न सफल भएका छन्। गुरुङ समुदायबाट एकै सिजनमा यति धेरै आरोहीले सगरमाथा आरोहण गरेको यो पहिलो अवसर मानिएको छ।

सम्मानित आरोहीमध्ये पुरबहादुर गुरुङले १० पटक, सुमन गुरुङले ८ पटक, इमान गुरुङ र अनुप गुरुङले ७–७ पटक तथा प्रकाश गुरुङले ६ पटक सगरमाथा आरोहण गरिसक्नुभएको छ। कास्कीका तेजेन गुरुङ गुरुङ समुदायबाट १४ वटा आठ हजार मिटरभन्दा अग्ला हिमाल सफलतापूर्वक आरोहण गर्ने पहिलो आरोहीका रूपमा परिचित हुनुहुन्छ।

कार्यक्रममा बोल्दै मोतिलाल गुरुङले हिमाल क्षेत्रमा जलवायु परिवर्तनको प्रभाव बढ्दो रूपमा देखिन थालेको भन्दै चिन्ता व्यक्त गर्नुभयो। “मेरो समयमा फेरिचेदेखि नै बाक्लो हिउँ देखिन्थ्यो, अहिले सगरमाथाको चुचुरोमै हिउँ कम देखिन थालेको छ,” उहाँले भन्नुभयो। हिमालको प्राकृतिक स्वरूप जोगाउनु नेपालका लागि अपरिहार्य रहेको उहाँको भनाइ थियो।

यसै अवसरमा एटजोन काठमाडौंको नवनिर्वाचित कार्यसमितिलाई बधाई तथा शुभकामना दिइएको थियो। नवीन बाबु गुरुङ अध्यक्ष रहेको नयाँ कार्यसमितिमा किशोर गुरुङ, पिम गुरुङ, सृष्टि गुरुङ, अनुप गुरुङ, रत्न गुरुङ र अपेक्षा गुरुङ रहनुभएको छ। साथै जुली गुरुङ संयोजक रहेको मिडिया डेस्क गठन गरिएको छ भने गरिमा गुरुङलाई जिटिन सद्भावना दूत घोषणा गरिएको छ।

• सुर्याम्स उप्रेती/ नेपाल फोटो लाइब्रेरी

नेपालमा अब विश्वप्रसिद्ध राइड–सेयरिङ सेवा उबर औपचारिक रूपमा सञ्चालनमा आएको छ। उबरले बिहीबारदेखि काठमाडौंमा Uber Go, Uber Comfort र Uber Bike सेवा सुरु गरेको घोषणा गरेको हो। यससँगै नेपाल एशिया–प्रशान्त (APAC) क्षेत्रको उबरको ११औँ बजार तथा दक्षिण एशियामा पछिल्लो एक दशकयता उबर प्रवेश गरेको पहिलो नयाँ बजार बनेको छ।

उबरका अनुसार नेपालमा बढ्दो डिजिटल पहुँच, शहरी यातायातको आवश्यकता र पर्यटन क्षेत्रको विस्तारलाई ध्यानमा राख्दै सेवा सुरु गरिएको हो। अब नेपाली यात्रु तथा विदेशी पर्यटकहरूले एउटै उबर एपमार्फत सहज, भरपर्दो र सुरक्षित यात्रा सेवा लिन सक्नेछन्।

उबरका APAC क्षेत्रीय महाप्रबन्धक डोमिनिक टेलरले नेपाललाई उबरको विश्वव्यापी सञ्जालमा स्वागत गर्दै यसलाई कम्पनीको विस्तार यात्राको महत्वपूर्ण कोसेढुङ्गा बताएका छन्। संस्कृति, पर्यटन तथा नागरिक उड्डयन मन्त्रालयका सचिव मुकुन्द प्रसाद निरौलाले उबरको आगमनले नेपालको पर्यटन प्रवर्द्धन र अन्तर्राष्ट्रिय पहुँचलाई थप मजबुत बनाउने विश्वास व्यक्त गरे।

त्यसैगरी भौतिक पूर्वाधार विकास मन्त्रालयका सचिव गोपाल प्रसाद सिग्देलले उबरको प्रवेशलाई आधुनिक तथा डिजिटल यातायात प्रणाली निर्माणतर्फको महत्वपूर्ण उपलब्धि भएको बताए। उबर हाल विश्वका ७० भन्दा बढी देशमा सञ्चालनमा रहेको छ।

नेपालको पर्यटन क्षेत्रलाई अन्तर्राष्ट्रिय स्तरमा थप प्रवर्द्धन गर्ने उद्देश्यसहित आयोजित हिमालयन ट्राभल मार्ट (एचटीएम) २०२६ भव्यताका साथ सम्पन्न भएको छ। “पर्यटनका नयाँ आयामहरू” भन्ने मूल नारासहित जुन १ देखि ४ सम्म काठमाडौंमा आयोजित मार्टमा २७ देशका ६०० भन्दा बढी प्रतिनिधिको सहभागिता रहेको थियो।

पाटा नेपाल च्याप्टरको आयोजना तथा नेपाल पर्यटन बोर्ड, नेपाल एयरलाइन्स लगायत विभिन्न सार्वजनिक तथा निजी साझेदार संस्थाको सहकार्यमा सम्पन्न कार्यक्रममा ७५ अन्तर्राष्ट्रिय क्रेता कम्पनीका प्रतिनिधि, ८० भन्दा बढी प्रदर्शक संस्था तथा नेपालसहित विभिन्न देशका पर्यटन व्यवसायी र सरोकारवालाको उल्लेखनीय उपस्थिति थियो।

कार्यक्रमले नेपाललाई ‘हिमालयको प्रवेशद्वार’का रूपमा स्थापित गर्दै अन्तर्राष्ट्रिय पर्यटन सहकार्य, व्यवसायिक सञ्जाल विस्तार तथा नयाँ अवसरहरूको खोजीका लागि प्रभावकारी मञ्च प्रदान गरेको आयोजकले जनाएको छ। मार्टअन्तर्गत व्यवसाय–व्यवसाय (बीटुबी) बैठक, विचारमूलक छलफल, गन्तव्य अनुभव कार्यक्रम, नेटवर्किङ तथा सांस्कृतिक प्रस्तुति आयोजना गरिएको थियो।

पाटा नेपाल च्याप्टरका अध्यक्ष खेम लकाईले पर्यटनका नयाँ क्षितिज खोज्ने प्रयासले पर्यटन उत्पादनको विविधीकरण तथा अर्थपूर्ण यात्रा अनुभव सिर्जना गर्ने साझा प्रतिबद्धता झल्काएको बताए। नेपाल पर्यटन बोर्डका कायममुकायम प्रमुख कार्यकारी अधिकृत हिक्मत सिंह ऐयरले नेपाललाई विश्वस्तरीय पर्यटन गन्तव्यका रूपमा प्रवर्द्धन गर्न सहयोग पुर्‍याउने सबै अन्तर्राष्ट्रिय प्रतिनिधि र साझेदारप्रति आभार व्यक्त गरे।

मार्टअघि आयोजित फेमिलियराइजेसन (फाम) भ्रमणअन्तर्गत अन्तर्राष्ट्रिय प्रतिनिधिहरूले पोखरा, लुम्बिनी, हैबुङ, कीर्तिपुर र नमोबुद्धलगायतका गन्तव्यको अवलोकन गरेका थिए। यी भ्रमणमार्फत नेपालको सांस्कृतिक सम्पदा, साहसिक, आध्यात्मिक, वेलनेस तथा पुनरुत्थानमुखी पर्यटनका सम्भावनाबारे प्रत्यक्ष अनुभव प्रदान गरिएको थियो।

एचटीएम इन्साइट फोरममा पर्यटन क्षेत्रका विज्ञ, नीति निर्माता र उद्योगका अगुवाबीच दिगो पर्यटन, प्रविधिगत नवप्रवर्तन, अनुभवात्मक यात्रा, गन्तव्य उत्थानशीलता तथा बजार विविधीकरणका विषयमा छलफल भएको थियो।

मार्टको मुख्य आकर्षण बीटुबी सत्रमा ७५ अन्तर्राष्ट्रिय क्रेता र ८० भन्दा बढी प्रदर्शकबीच २ हजार ४ सयभन्दा बढी पूर्वनिर्धारित व्यवसायिक भेटघाट सम्पन्न भएका थिए। यसबाट नयाँ पर्यटन साझेदारी तथा व्यावसायिक अवसरहरू सिर्जना भएको जनाइएको छ।

कार्यक्रमको समापनसँगै आयोजकले एचटीएम २०२६ ले बलियो साझेदारी, नवीन सोच र पर्यटन विकासप्रति नयाँ उत्साहको आधार निर्माण गरेको जनाएको छ। साथै, नेपाललाई पर्यटन संवाद, नवप्रवर्तन र अन्तर्राष्ट्रिय सहकार्यको अग्रणी केन्द्रका रूपमा स्थापित गर्न मार्ट सफल भएको निष्कर्ष निकालिएको छ।