मीरा राणा र सी.के. रसाइलीलाई भक्तराज आचार्य राष्ट्रिय संगीत सम्मान

‘भक्तराज आचार्य राष्ट्रिय संगीत सम्मान-२०८२’ वरिष्ठ गायिका मीरा राणा र वरिष्ठ संगीतकार सी.के. रसाइलीलाई प्रदान गरिएको छ।

उनीहरूलाई नगद १ लाख रूपैयाँ र ताम्रपत्रसहित सम्मान गरिएको हो। भक्तराज आचार्यको योगदानको सम्मानस्वरूप स्थापना गरिएको उक्त सम्मानमा नेपाली संगीत क्षेत्रका विशिष्ट व्यक्तित्वहरूलाई सम्मानित गर्ने गरिएको छ। 

त्यसैगरी, ‘सुशीला आचार्य सुस्वास्थ्य कामना सम्मान २०८२’ संगीतकर्मी दीपक थापा र अभिनेता पवन मैनालीलाई प्रदान गरिएको छ। उनीहरूलाई ५० हजार रूपैयाँसहित सम्मान गरिएको हो। स्वास्थ्य उपचार आवश्यक पर्ने कलाकारहरूलाई प्रोत्साहन र सहयोग गर्ने उद्देश्यले यो सम्मान दिने गरिएको छ। 

आइतबार ललितपुरमा आयोजित कार्यक्रममा भक्तराज आचार्य संगीत प्रतिष्ठानकी अध्यक्ष सुशीला आचार्य र सिटी एक्सप्रेस मनि ट्रान्सफरका संस्थापक तथा प्रबन्ध निर्देशक चन्द्र टण्डनले सम्मान प्रदान गरेका हुन्। 

भक्तराज आचार्य संगीत प्रतिष्ठान र सिटी एक्सप्रेस मनि ट्रान्सफरको संयुक्त आयोजनामा सम्पन्न कार्यक्रममा संगीत क्षेत्रका कलाकारहरूको बाक्लो उपस्थिति थियो। 

भजन शिरोमणि भक्तराज आचार्यका गीत र संगीतले नेपाली सांगीतिक क्षेत्रमा विशेष स्थान बनाएका छन्। 

आचार्यको वि.स. २०८० साल फागुनमा निधन भएको थियो।