परम्परा, पहिचान र उत्साहको संगम बनेको सोनाम ल्होसार आज तामाङ समुदायले देशभर विविध कार्यक्रमका साथ मनाएका छन्।

विशेषतः काठमाडौँ उपत्यकामा रहेका तामाङ समुदायको उल्लेखनीय सहभागिताले टुँडिखेल सांस्कृतिक उत्सवस्थलमा परिणत भएको थियो।

परम्परागत वेशभूषा, मौलिक नृत्य र सांस्कृतिक झाँकीसहित टुँडिखेल पुगेका तामाङ समुदायका सदस्यहरूले सामूहिक रूपमा नयाँ वर्षलाई स्वागत गरेका हुन्। मञ्जुश्री पात्रोअनुसार आजदेखि २८६२ औँ वर्ष सुरु भएसँगै सर्प वर्षलाई विदाई गर्दै घोडा वर्ष प्रवेश गरिएको छ।

सोनाम ल्होसार १२ वटा पशु–चिन्हमा आधारित चक्रअनुसार मनाइने परम्परा रहेको छ, जसले समयचक्र, प्रकृति र मानव जीवनबीचको सम्बन्धलाई झल्काउँछ। यही सांस्कृतिक मान्यताका कारण ल्होसार तामाङ समुदायको जीवनपद्धतिसँग गहिरो रूपमा जोडिएको पर्व मानिन्छ।

बागमती प्रदेशका तामाङ बाहुल्य जिल्लामा मात्र नभई शहरी क्षेत्रमा पनि ल्होसारको रौनक बढ्दै गएको छ। यसले मौलिक संस्कृति संरक्षणसँगै भावी पुस्तामा सांस्कृतिक चेतना विस्तार गर्न योगदान पुर्‍याइरहेको समुदायका अगुवाहरू बताउँछन्।

सोनाम ल्होसार केवल नयाँ वर्षको सुरुवात मात्र नभई तामाङ समुदायको इतिहास, पहिचान र एकताको उत्सव बनेको सहभागीहरूको भनाइ छ।

विश्व कराते सिरिजको स्वर्णपदक विजेता एरिका गुरुङ टर्की र बेलायतमा आयोजना हुने दुई महत्वपूर्ण अन्तर्राष्ट्रिय प्रतियोगितामा प्रतिस्पर्धा गर्ने भएकी छन्। नेपालको तर्फबाट अन्तर्राष्ट्रिय कराते प्रतियोगितामा सर्वाधिक पदक जित्ने खेलाडीको रूपमा परिचित एरिकाले पुनः नेपाललाई विश्व मञ्चमा प्रतिनिधित्व गर्न लागेकी हुन्।

एरिका जनवरी २२ देखि २५ सम्म टर्कीको इस्तानबुलमा आयोजना हुने वर्ल्ड कराते–वान प्रिमियर लिगमा प्रतिस्पर्धा गर्नेछिन्। यो प्रतियोगितामा विश्वका उत्कृष्ट ३२ खेलाडी मात्र छनोट हुने भएकाले एरिकाको सहभागिता आफैंमा ठूलो उपलब्धि मानिएको छ। विश्वस्तरीय प्रतिस्पर्धीहरूसँग खेल्दै एरिकाले आफ्नो अनुभव र क्षमता थप निखार्ने अवसर पाउने विश्वास गरिएको छ।

टर्कीको प्रतियोगिता पश्चात एरिका जनवरी २५ मै बेलायतको हार्लोमा आयोजना हुने हार्लो ओपन इन्टरनेशनल कराते च्याम्पियनसिपमा सहभागी हुनेछिन्। बेलायतमा हुने यस प्रतियोगितामा ११ देशका उत्कृष्ट खेलाडीहरूको सहभागिता रहनेछ। उक्त प्रतियोगिता हेर्न बेलायतमा रहेका नेपाली समुदाय पनि ठूलो संख्यामा आउने अपेक्षा गरिएको छ, जसले आफूलाई थप उत्साहित र प्रेरित बनाउने एरिकाले बताएकी छन्।

प्रतियोगितापछि एरिका जनवरी ३१ देखि फेब्रुअरी १ सम्म बेलायतकै बार्ली हिलमा आयोजना हुने इन्टरनेशनल इलिट ट्रेनिङ क्याम्प विथ वर्ल्ड च्याम्पियन्समा सहभागी हुनेछिन्। विश्व च्याम्पियन खेलाडीहरूसँग प्रशिक्षण लिन पाउनु आगामी प्रतियोगिताहरूका लागि निकै लाभदायक हुने विश्वास गरिएको छ।

राष्ट्रिय कराते टिमका मुख्य प्रशिक्षक कुशल श्रेष्ठले यसपटक पनि एरिकाको प्रदर्शन उत्कृष्ट हुने अपेक्षा व्यक्त गर्नुभएको छ। एरिका गुरुङ नेपाली खेलकुद क्षेत्रले पाएको एक महत्वपूर्ण उपलब्धि भएको उल्लेख गर्दै बेलायतमा हुने तालिम तथा त्यहाँको नेपाली समुदायको साथ–सहयोगले उनको आत्मबल थप बढ्ने र आगामी दिनमा अझ ठूलो सफलता हासिल गर्ने विश्वास प्रशिक्षक श्रेष्ठले व्यक्त गर्नुभएको छ।

न्युयोर्क –
तमु परिवार न्युयोर्क इन्क अमेरिकाले सप्रि ल्होलाई विदाई गर्दै त–ल्होलाई स्वागत गरेको अवसरमा तमु ल्होसार (त–ल्हो) २०८२ भव्य रूपमा सम्पन्न गरेको छ।

न्युयोर्कको लङ आइल्याण्ड सिटीस्थित फाइभ स्टार बैंक्वेट हलमा आयोजित कार्यक्रममा तमु समुदायका साथै विभिन्न संघ–संस्थाका प्रतिनिधि र शुभेच्छुकहरूको उल्लेख्य उपस्थिति रहेको थियो।

तमु परिवार न्युयोर्क इन्क.का अध्यक्ष श्री बिन प्रसाद घलेको सभा अध्यक्षतामा भएको कार्यक्रममा प्रमुख अतिथिका रूपमा नेपाल सरकारका माननीय महावाणिज्यदूत श्री दधि राम भण्डारी (नेपाली महावाणिज्यदूतावास, न्युयोर्क) तथा विशेष अतिथिका रूपमा Assembly Member Steven Raga (District 30) उपस्थित रहनुभएको थियो।

औपचारिक कार्यक्रमको सञ्चालन सचिव श्री देब गुरुङले गर्नुभएको थियो।

स्वागत मन्तव्य सल्लाहकार श्री चित्र बहादुर गुरुङ (चित्र कोने तमु) ले राख्नुभयो भने कार्यक्रमको उद्देश्य र जानकारी निवर्तमान अध्यक्ष एवं सल्लाहकार श्रीमती मनिता देवी गुरुङले प्रस्तुत गर्नुभयो।

शुभकामना मन्तव्य बाल्टिमोर गुरुङ तमु समाज इन्क.का संस्थापक सल्लाहकार एवं एनआरएनए एनसीसी मेरील्याण्ड च्याप्टरका अध्यक्ष श्री कुल गुरुङ, एनआरएनए एनसीसी न्युयोर्क च्याप्टरका अध्यक्ष श्री दण्डपानी लामिछाने (बासु) तथा विशेष अतिथि Steven Raga ले दिनुभएको थियो।

प्रमुख अतिथि श्री भण्डारीले तमु समुदायले विदेशमा रहेर पनि संस्कृति संरक्षणमा खेलेको भूमिकाको प्रशंसा गर्नुभयो। सभाध्यक्ष श्री घलेको मन्तव्यसहित औपचारिक कार्यक्रम समापन भयो।

सांस्कृतिक प्रस्तुतिअन्तर्गत घाँटु नृत्य र कृष्ण चरित्र नृत्य प्रत्यक्ष रूपमा प्रस्तुत गरियो। घाँटु नृत्यमा सल्लाहकार लाल बहादुर गुरुङ (घाँटु गुरु), संस्थापक घाँटु गुरुस्यो चिनु घले, घाँटु सरी श्वेता गुरुङ र शुष्मा गुरुङ सहभागी थिए। निर्देशन तथा बाध्यवादनमा भूपेन्द्र गुरुङसहित कलाकारहरूको टोली थियो। कृष्ण चरित्र नृत्यमा पनि गुरुङ समुदायका कलाकारहरूले जीवन्त प्रस्तुति दिए।

यसका अतिरिक्त ङोल्स्यो मास्यो जी, लोकप्रिय गीतहरूको संगालो, न्याउली, लोक दोहोरी तथा गुरुङ मौलिक गीत र नृत्य प्रस्तुत गरियो।

ख्यातिप्राप्त गायिका ज्योति गुरुङ र गायक मनित गुरुङको प्रस्तुतिले दर्शकलाई मन्त्रमुग्ध बनायो।

तमु परिवार न्युयोर्क इन्कले कार्यक्रम सफल बनाउन सहयोग गर्ने कलाकार, सल्लाहकार, स्वयंसेवक तथा सम्पूर्ण समुदायप्रति धन्यवाद व्यक्त गर्दै आगामी दिनमा पनि सांस्कृतिक पहिचानको संरक्षण र प्रवर्द्धनमा निरन्तर लाग्ने प्रतिबद्धता जनाएको छ।

.