तमु कलाकारसंघले मनायो ल्होछार (तस्विरहरु)

तमु गुरुङ कलाकार संघ नेपालले काठमाडौँमा तमु ल्होछार मनाएको छ।

तमु ह्युल छोंज धिं गुरुङ राष्ट्रिय परिषदको सभाहलमा सोमबार एक कार्यक्रमको आयोजना गर्दै तमु गुरुङ कलाकारहरुले तमु ल्होछारको अवशरमा शुभकामना आदानप्रदान कार्यक्रमको आयोजना गरेको हो।

तमु ह्युल छोंज धी गुरुङ राष्ट्रिय परिषदका अध्यक्ष कर्णबहादुर गुरुङ्गको अध्यक्षतामा भएको कार्यक्रममा भर्खरै मात्र आदिवासी जनजाती उत्थान राष्ट्रिय प्रतिष्ठानको उपाध्यक्षमा नियुक्त हुनु भएका रेशम गुरुङलाई पनि समान गरिएको थियो।

कार्यक्रममा बोल्दै तमु ह्युलाका पुर्व अध्यक्ष समेत रहेका गुरुङ्गले गुरुङ्गहरुको शिर उँचो हुने गरि आफुले काम गर्ने बताए। यस्तै आफ्नै कार्यकालमा प्रतिष्ठानलाई भाडाको घर बाट आफ्नै सरकारी निवासमा परिवर्तन गर्ने लक्ष राखिएको उनले बताए।

कार्यक्रमको प्रमुख अतिथी कर्ण बहादुर गुरुङ्गले कलाकार संघको कार्यक्रम संगै तमु ल्होछारको शुरुवात भएको भन्दै आगामी १३,१४ र १५ गते काठमाडौँको टुडिखेलमा भब्य रुपमा तमु ल्होछार मनाउने बताउदै विश्वभर रहेका तमु समुदायलाई तमु ल्होछारको शुभकामना ब्यक्त गरे।

यस्तै कार्यक्रममा विदेशमा हुने विभिन्न तमु ल्होछारको कार्यक्रममा जानु हुने कलाकारहरुलाई विदाई समेत गरिएको थियो।

यस बर्ष तमु गुरुङ समुदायले गडुल वर्गलाई विदाई गर्दै सर्प बर्गको आगमनको अवशरमा तमु ल्होछार मनाउदै छ।