मिस युनिभर्स नेपाल २०२६ को ताज प्रयासना गुरुङले पहिरिएकी छन्। काठमाडौंको होटल सोल्टी क्राउन प्लाजामा आयोजित ग्रान्ड फिनालेमा गुरुङ विजेता बनेकी हुन्। त्यस्तै, मिस अर्थ नेपाल २०२६ को ताज झापाकी बिनिता ओलीले जितेकी छन्।

देशभरबाट सहभागी ११० जनामध्ये अन्तिम १४ जना फिनालेमा प्रतिस्पर्धामा थिए। बलिउड अभिनेत्री तथा पूर्वमिस युनिभर्स इन्डिया सेलीना जेटली र मोडल मनिका विश्वकर्मा मुख्य निर्णायक थिए।

२४ वर्षीया प्रयासना बेलायतमा बस्दै आएकी महिला सशक्तिकरण अभियन्ता हुन्। उनले ‘द डिग्निटी प्रोजेक्ट’मार्फत नेपाली महिलालाई मेकअप, डिजिटल मार्केटिङ, वित्तीय साक्षरता र उद्यमशीलतासम्बन्धी निःशुल्क कार्यशाला सञ्चालन गर्दै आएकी छन्।

२७ वर्षीया बिनिता कुवेत एयरवेजमा क्याबिन क्रुका रूपमा काम गरेर नेपाल फर्किएकी हुन्।

चार दिनदेखि लगातार झरीले ढाकिएको काठमाडौं आज केहीबेर खुलेको छ।

मध्याह्नपछि बादल छिचोल्दै घाम देखिएसँगै उपत्यकाको आकाश केही सफा भएको हो। बादल अझै पूर्ण रूपमा हटिसकेको छैन, तर वर्षाले थलिएको काठमाडौंमा मौसम खुलेसँगै दृश्य भने फेरिएको छ।

आकाश खुलेपछि ड्रोनबाट देखिएको काठमाडौं—हरियालीले ढाकिएका डाँडाकाँडा, बाक्लो बस्ती र बीचबीचमा देखिएका बादलले मनमोहक दृश्य बनाएका छन्।

जल तथा मौसम पूर्वानुमान महाशाखाका अनुसार अब ठूलो वर्षाको सम्भावना नरहे पनि मौसम पूर्ण रूपमा खुलिसकेको छैन। सोमबारदेखि देशका अधिकांश स्थानमा मौसममा थप सुधार हुने महाशाखाले जनाएको छ।

चार दिनको झरीपछि खुलेको काठमाडौं—आकाशबाट हेर्दा अझै सुन्दर।

चितवनको इच्छाकामना गाउँपालिका–२ मा पर्ने घुर्केश गाउँ पुरानो गुरुङ बस्तीका रूपमा परिचित छ। परम्परागत घर, मौलिक संस्कृति र ग्रामीण जीवनशैलीका कारण पछिल्लो समय यो गाउँ आन्तरिक पर्यटकको आकर्षण बन्न थालेको छ।

घुर्केशमा अझै पनि परम्परागत शैलीका घर तथा गाउँको मौलिक संरचना देख्न सकिन्छ। गुरुङ समुदायको भाषा, भेषभूषा, खानपान, संस्कार र परम्पराले गाउँको सांस्कृतिक पहिचानलाई जीवन्त राखेको छ।

गाउँमा स्थानीयको पहल तथा गाउँपालिकाको सहयोगमा १४ घरमा होमस्टे सञ्चालनमा रहेको छ। होमस्टेमार्फत पर्यटकले स्थानीय परिवारसँग बसेर गुरुङ समुदायको जीवनशैली, संस्कृति र खानपान नजिकबाट अनुभव गर्न सक्छन्।

शान्त वातावरण, हरियाली डाँडाकाँडा र प्राकृतिक सौन्दर्यसँगै सांस्कृतिक विविधता घुर्केशको अर्को आकर्षण हो। इच्छाकामना क्षेत्रका सिराइचुली, जलबिरे झरना, उपरदाङगढीलगायतका पर्यटकीय गन्तव्यसँग जोडेर घुर्केशलाई ग्रामीण पर्यटनको गन्तव्यका रूपमा विकास गर्न सकिने सम्भावना छ।

परम्परागत संस्कृति र मौलिकता जोगाउँदै पर्यटन प्रवर्द्धन गर्न सके घुर्केशले चितवनको ग्रामीण पर्यटनमा छुट्टै पहिचान बनाउन सक्छ।