काठमाडौंबाट बाहिरिने बाटो खुले

लगातारको वर्षापछि रोकिएका सवारी साधनहरू आज बिहानदेखि फेरि गन्तव्यतर्फ अघि बढ्न थालेका छन्। काठमाडौं उपत्यकाका प्रमुख नाका नागढुंगा, साँगा, माछापोखरी लगायतका स्थान बाट सवारी आवागमन खुला गरिएको छ। बिहानैदेखि यी नाकाहरूमा यात्रु र सवारी साधनको उल्लेख्य चाप देखिएको छ।

यात्राको जोखिमलाई ध्यानमा राख्दै हिजो रोकिएका बस, माइक्रो र अन्य सवारीहरूलाई ट्राफिक प्रहरीले चरणबद्ध रूपमा गन्तव्यतर्फ पठाइरहेको छ। ट्राफिक प्रहरी एफएमका अनुसार ललितपुरको भट्टेडाँडा बाहेक अधिकांश सडकमा सवारी सञ्चालन भइरहेको छ भने ठाउँ–ठाउँमा प्रहरी परिचालन गरेर ट्राफिक व्यवस्थापन भइरहेको छ।

यस्तै, केही दिनदेखि अवरुद्ध रहेको मुग्लिङ–नारायणगढ सडकखण्ड पनि आज बिहान ७ बजेदेखि दुईतर्फी सञ्चालनमा आएको छ, जसले राजधानी आउजाउ गर्ने यात्रुलाई ठूलो राहत दिएको छ।

यद्यपि वर्षा अझै जारी रहेकाले पहिरो, ढुंगा खस्ने र सडक चिप्लिने जोखिम कायम छ। यात्रा गर्नुअघि सडकको पछिल्लो अवस्था बुझेर मात्र सुरक्षित यात्रा गर्नुहोस्।