काठमाडौँ, बैशाख १

काठमाडौंस्थित भृकुटीमण्डप मा यामाहाको ‘ब्लु फेस्ट’ कार्यक्रम जारी रहँदा अटोमोबाइल क्षेत्रमा विशेष रौनक देखिएको छ। यामाहा नेपालद्वारा आयोजित उक्त फेस्ट चैत २९ गतेदेखि सुरु भई वैशाख ५ गतेसम्म सञ्चालन हुनेछ।

कार्यक्रममा यामाहाले आफ्ना नयाँ हाइब्रिड स्कुटर र मोटरसाइकललाई मुख्य आकर्षणका रूपमा प्रस्तुत गरेको छ। नेपालकै पहिलो हाइब्रिड मोटरसाइकल FZS हाइब्रिड र RayZR 125 हाइब्रिड स्कुटर प्रदर्शनीमा राखिएका छन्, जसले क्रमशः ६० र ७१.३३ किलोमिटर प्रति लिटर माइलेज दिने दाबी गरिएको छ। विशेषगरी स्कुटरमा ५ वर्षको निःशुल्क सर्भिसिङ सुविधा पनि उपलब्ध गराइएको छ।

३० भन्दा बढी डिलरहरूको सहभागिता रहेको यस मेलामा ग्राहकहरूले आफ्नो पुरानो बाइक वा स्कुटर एक्सचेन्ज गरेर नयाँ सवारी साधन खरिद गर्न सक्ने व्यवस्था गरिएको छ। साथै टेस्ट ड्राइभको सुविधा पनि उपलब्ध छ।

ग्राहक आकर्षणका लागि कम्पनीले ५ लाख रुपैयाँसम्म क्यासब्याक, ५० प्रतिशत डाउन पेमेन्टमा सहज फाइनान्सिङ, र ४० महिनासम्मको इएमआई सुविधा जस्ता अफरहरू ल्याएको छ। ५० भन्दा बढी भ्यालुएटरमार्फत एक्सचेन्जमा राम्रो मूल्याङ्कनको व्यवस्था गरिएको छ।

मेलामा विभिन्न मनोरञ्जनात्मक गतिविधिहरू पनि समावेश छन्। ७१.३३ सेकेन्डसम्म पुल-अप गर्ने चुनौतीसहित विशेष गिफ्ट ह्याम्पर, टिक-ट्याक-टो जस्ता खेलहरू, र गेम जोनहरू आगन्तुकका लागि आकर्षण बनेका छन्। यामाहाका भिन्टेज मोडलहरू RX100, Enduro र RX125 समेत प्रदर्शनीमा राखेर कम्पनीले आफ्नो लेगेसी झल्काउने प्रयास गरेको छ।

कार्यक्रमको पहिलो दिनमै करिब ५०० भन्दा बढी आगन्तुकको उपस्थिति रहेको थियो भने धेरै ग्राहकहरूले नयाँ बाइक तथा स्कुटर खरिद वा बुकिङ गरेका छन्।

यसका साथै नेपाली चलचित्रका अभिनेता तथा ब्रान्ड एम्बेसडर अनुपविक्रम शाही, ‘रोडीज’ का ग्याङ लिडरहरू तथा राष्ट्रिय–अन्तर्राष्ट्रिय रेसरहरूसँग ‘मिट एण्ड ग्रिट’ सत्र पनि आयोजना गरिएको छ।

आगामी दिनमा ‘ओताकु जात्रा’ तथा कस्प्ले प्रदर्शनले मेलालाई थप रोमाञ्चक बनाउने अपेक्षा गरिएको छ। पेट्रोलको मूल्य वृद्धि भइरहेका बेला बढी माइलेज दिने हाइब्रिड प्रविधिप्रति ग्राहकको आकर्षण बढ्दै गएको कम्पनीको विश्वास छ।

‘टुगेदर फर आर्ट’ नाराका साथ ललितपुरस्थित हेरिटेज गार्डेनमा तीन दिने अन्तर्राष्ट्रिय नेपाल ट्याटु सम्मेलन सम्पन्न भएको छ।

१३ औं संस्करणमा जारी यो सम्मेलन दक्षिण एसियाकै सबैभन्दा ठूलो तथा पुरानो ट्याटु महोत्सवको रूपमा चिनिन्छ।

यो महोत्सवमा विश्वका २५ भन्दा बढी देशबाट २५० भन्दा बढी ट्याटु आर्टिस्टहरूको सहभागिता रहेको थियो ।

लाइभ ट्याटु सेसन, विभिन्न प्रतियोगिता, अवार्ड वितरण, संगीत तथा सांस्कृतिक कार्यक्रमहरूको कारण महोत्सव युवा आकर्षणको केन्द्र बन्ने गरेको छ।

सम्मेलनमा परम्परागत नेपाली कलाकृति; गणेश, हनुमान, बुद्धसम्बन्ध प्राचीन कलाकौशललाई आधुनिक ट्याटु आर्टसँग जोडेर अझ कलात्मक र बान्कीपूर्ण बनाइएको छ।

शुक्रबारदेखि सुरू महोत्सव आइतबार साँझसम्म चलेको थियो।

काठमाडौंको प्राचीन बस्ती हाँडीगाउँमा गहना खोज्ने जात्रा भव्य रूपमा मनाइएको छ। यो जात्रा टुँडालदेवी (त्वरंः अजिमा/वैष्णवी)सँग सम्बन्धित छ।

किंवदन्तीअनुसार टुँडालदेवी र उनकी छोरी भाटभटेनी (मपता अजिमा) गहना पोखरीमा नुहाउँदा देवीको गहना हराएको थियो। सोही घटनालाई सम्झँदै हरेक वर्ष खटलाई गहना पोखरी (तिसाः मालिगु पुखु) भित्र लगेर तीन पटक परिक्रमा गराइन्छ र गहना खोज्ने नाटकीय दृश्य प्रस्तुत गरिन्छ।

जात्राको मुख्य दिनमा टुँडालदेवीको मूर्तिलाई खटमा राखेर हाँडीगाउँका सडकमा घुमाइन्छ। त्यसपछि पूजारी तथा स्थानीय बासिन्दाले खटलाई पोखरीभित्र डुबाउँदै परिक्रमा गराउँछन्। धिमे र न्याखिंको मधुर धुन, नाचगान र ठूलो भीडले वातावरण अझ रमाइलो बनाउँछ।

यो जात्रा लिच्छवी कालदेखि चलिआएको मानिन्छ। अन्यत्र नभएको विशेषताका कारण ‘कहीँ नभएको जात्रा हाँडीगाउँमा’ भन्ने उखान पनि प्रचलित छ। जात्रा प्रायः चैत्र शुक्ल अष्टमी वा पूर्णिमातिर सुरु भई प्रतिपदाका दिन मुख्य कार्यक्रम सम्पन्न हुने गर्दछ।

हाँडीगाउँका नेवार समुदायले ठूलो भक्तिभाव र उत्साहका साथ यो परम्परा जोगाउँदै आएका छन्। यस जात्राले स्थानीय सांस्कृतिक सम्पदालाई जीवन्त राख्न महत्वपूर्ण भूमिका खेलेको छ।