ललितपुरको जावलाखेलमा नेपालमै पहिलोपटक स्मार्ट सेफ्टी ब्यारेड परीक्षणका रूपमा सञ्चालनमा ल्याइएको छ।

यो प्रणालीले पैदलयात्रीलाई सुरक्षित रूपमा सडक काट्न सहयोग गर्छ। ट्राफिक लाइट रातो हुँदा ब्यारिकेट आफैं खुल्छ र पैदलयात्रीले जेब्रा क्रसिङबाट सडक पार गर्न सक्छन्।

गाडीका लागि हरियो बत्ती बल्नेबित्तिकै ब्यारिकेट बन्द हुन्छ। यसले जथाभावी सडक काट्ने बानीलाई रोक्न मद्दत गर्छ।

यसमा विशेष सेन्सर पनि जडान गरिएको छ। यदि कुनै व्यक्ति सडकको बीचमा रहेको अवस्थामा सिग्नल परिवर्तन भयो भने, सेन्सरले त्यसलाई पहिचान गर्छ र ब्यारिकेट तुरुन्त बन्द हुन दिँदैन। यसले दुर्घटनाको जोखिम कम गर्छ।

ललितपुर महानगरपालिकाका अनुसार यो प्रविधिले पैदलयात्रीको सुरक्षा बढाउने, ट्राफिक नियमको पालना गराउने र सडक दुर्घटना घटाउन सहयोग गर्ने अपेक्षा गरिएको छ।

परीक्षण सफल भएमा यो प्रणाली अन्य व्यस्त चोकहरूमा पनि विस्तार गरिनेछ।

साउन महिनाको पहिलो सोमबार भगवान् शिवको आराधना गर्न देशका विभिन्न स्थानबाट आएका हिन्दू धर्मावलम्बीहरूको घुइँचो पशुपतिनाथ मन्दिर क्षेत्रमा लागेको छ।

बिहानैदेखि श्रद्धालुहरू जल चढाउन, पूजा–आराधना गर्न तथा दर्शनका लागि लामबद्ध भएका छन्।

साउन महिनाका सोमबारहरू शिवभक्तका लागि विशेष महत्त्वका मानिने भएकाले प्रत्येक वर्ष यस दिन पशुपतिनाथ क्षेत्रमा ठूलो संख्यामा भक्तजनको उपस्थिति हुने गर्दछ।

प्रहरीले सुरक्षा व्यवस्था कडा बनाएको छ भने दर्शनलाई सहज बनाउन आवश्यक व्यवस्थापन गरिएको छ।

काठमाडौंको थापागाउँस्थित एक थिएटर नेपालमा चर्चित नेपाली नाटक ‘जिउँदो आकाश’को नियमित मञ्चन सुरू भएको छ।

यौनिक तथा अल्पसंख्यक समुदायको जीवन, पहिचान र उनीहरूले समाजमा भोग्ने विभेदको कथा प्रस्तुत गर्ने नाटक ‘जिउँदो आकाश’ साउन १ गतेदेखि नियमित मञ्चनमा आएको हो।

वि.सं. २०७३ जेठ २९ गते दोलखाको चरीकोटबाट पहिलो पटक मञ्चन भएको यो नाटक यौनिक तथा अल्पसंख्यकको विषयवस्तुमा आधारित पहिलो नेपाली नाटकका रूपमा परिचित छ।

नेपालका विभिन्न सहरमा ८६ भन्दा बढी पटक मञ्चन भइसकेको यो नाटक भारतको दिल्ली र गुवाहाटीमा आयोजित अन्तर्राष्ट्रिय नाट्य महोत्सवमा समेत प्रस्तुत भइसकेको छ।

लेखक चन्द्रप्रसाद पाण्डेले पुरूष शरीर लिएर जन्मिए पनि स्त्री स्वभाव भएकी ‘गरिमा’ (गौरव) को कथामार्फत समाज, परिवार र विद्यालयबाट भोग्नुपरेको अस्वीकृति तथा संघर्षलाई नाटकमा प्रस्तुत गरेका छन्। निर्देशक आर.के. मेहताका अनुसार नाटकले लैंगिक पहिचानभन्दा माथि उठेर मानवतालाई केन्द्रमा राख्ने सन्देश दिन्छ।

नाटकमा कलाकार अनिल सुब्बाले गरिमाको भूमिकामा अभिनय गरेका छन्। रेनुका कार्की सह-निर्देशक रहेकी छन् भने किरण चाम्लिङ राईको संगीत परिकल्पनासँगै युकेश राई, सोनाम तामाङलगायतले प्रत्यक्ष संगीत प्रस्तुत गरिरहेका छन्।

साउन १ देखि १२ गतेसम्म बुधबारबाहेक हरेक दिन साँझ ५:३० बजे नाटक मञ्चन हुनेछ। दर्शकको सुविधाका लागि शनिबार दिउँसो १:३० बजे अतिरिक्त शो पनि राखिएको छ।