तीजको रौनक

हरितालिका तीजका अवसरमा काठमाडौंको पशुपतिनाथ मन्दिरमा बिहानैदेखि भक्तजनको भीड लागेको छ। व्रत बसेका महिलाहरू दर्शन तथा पूजापाठका लागि लामबद्ध भएका छन् भने दर्शनपछि समूह बनाएर नाचगान र रमाइलो गरिरहेका दृश्य पशुपति क्षेत्रमा देखिएका छन्। भक्तजनहरू सामूहिक तथा एकल तस्बिर खिच्न पनि व्यस्त देखिन्छन्।

व्रतालु महिलाको सहजताका लागि पशुपतिनाथ मन्दिरका चारवटै ढोका बिहान ३ बजेदेखि खुला गरिएको थियो। भक्तजनका लागि विभिन्न चार वटा दर्शन मार्गको व्यवस्था गरिएको पशुपति क्षेत्र विकास कोषले जनाएको छ। बिहानको समयमा लाममा बसेको करिब आधा घण्टामै दर्शन गरेर फर्कन सक्ने अवस्था रहेको जनाइएको छ।

तीजका अवसरमा पशुपति क्षेत्रमा चार हजार सुरक्षाकर्मी र विभिन्न २४ धार्मिक तथा सामाजिक संस्थाका ८५५ स्वयंसेवक परिचालन गरिएको छ। पशुपतिनाथसँगै देशभरका शिवालयमा पनि दर्शन तथा पूजाका लागि भक्तजनको भीड लागेको छ।