अन्तर्राष्ट्रिय मञ्चदेखि नेपाली चलचित्रसम्म तेरिया

नेपाली कला क्षेत्रमा आफ्नो छुट्टै पहिचान बनाउन सफल कलाकार हुन् तेरिया फौजा मगर। सानै उमेरदेखि नृत्यप्रति गहिरो रुचि राख्ने उनले अन्तर्राष्ट्रिय रियालिटी शो जित्दै नेपाली प्रतिभालाई विश्वसामु चिनाएकी थिइन्।

उनको आत्मविश्वास, मेहनत र फरक प्रस्तुतीले उनलाई केवल नृत्यमा मात्र होइन, अभिनय क्षेत्रमा पनि स्थापित गराउँदै लगेको छ।

नृत्यबाट सुरु भएको उनको कला यात्रा अहिले चलचित्रसम्म आइपुगेको छ। विभिन्न म्युजिक भिडियो, स्टेज प्रस्तुति तथा अभिनयमार्फत दर्शकमाझ लोकप्रिय बनेकी तेरिया अब नयाँ चलचित्र मितज्यु मार्फत दर्शकमाझ आउँदैछिन्।

जेठ ८ देखि प्रदर्शनमा आउन लागेको यस चलचित्रमा उनले भावनात्मक र परिपक्व भूमिका निर्वाह गरेकी छन्।

चलचित्र “मितज्यु” मा तेरियाको अभिनयलाई विशेष रूपमा हेरिएको छ। यसअघि नृत्यमा देखिएको उनको अभिव्यक्ति र ऊर्जा अब अभिनयमा पनि झल्किएको निर्माण टिमको दाबी छ।

चलचित्रको ट्रेलर र गीतमार्फत दर्शकले उनको अभिनयको झलक पाइसकेका छन्, जसले दर्शकमाझ उत्सुकता बढाएको छ।

तेरिया फौजा मगरको यात्रा नेपाली युवापुस्ताका लागि प्रेरणाको उदाहरण बनेको छ। निरन्तर मेहनत, अनुशासन र सिर्जनात्मकताले उनले आफूलाई बहुआयामिक कलाकारका रूपमा स्थापित गर्दै लगेकी छन्।

अब चलचित्र “मितज्यु” मार्फत उनको अभिनय यात्रा कति सफल हुन्छ भन्ने प्रतीक्षामा नेपाली दर्शक रहेका छन्।