डोल्पाको फोक्सुन्डोमा तीनदिने फोक्सुन्डो आर्ट एक्जिबिसन सम्पन्न भएको छ। नेपाल पर्यटन बोर्डको #फोटोनेपाल प्रदर्शनी अभियानअन्तर्गत असोज २ देखि ४ गतेसम्म समुदुप फाटेन गुम्बामा आयोजित प्रदर्शनीमा कलाकार तेन्जिङ वाङ्दाकका १५ थान थाङ्का चित्र प्रस्तुत गरिएको थियो।

समुद्री सतहबाट ३ हजार ६११.५ मिटर उचाइमा आयोजित प्रदर्शनीसँगै सांस्कृतिक कार्यक्रमसमेत गरिएको थियो। प्रदर्शनीले फोक्सुन्डोको प्राकृतिक सौन्दर्यसँगै स्थानीय कला, संस्कृति र जीवनशैलीलाई पर्यटन प्रवर्द्धनसँग जोडेको आयोजकले जनाएको छ।

सन् २०१६ मा सुरु भएको #फोटोनेपाल अभियानअन्तर्गत हालसम्म नेपाल तथा विदेशमा सयभन्दा बढी प्रदर्शनी आयोजना भइसकेका छन्।

भारतीय पूर्वसैनिक गोर्खा ब्रिगेडले रसुवा बाढीपीडितका लागि प्रधानमन्त्री दैवी प्रकोप उद्धार कोषमा १ करोड ३१ लाख ४१ हजार ७ सय ९१ रुपैयाँ सहयोग गरेको छ।

भारतीय भूतपूर्व गोर्खा सैनिकहरूको संस्थाले काठमाडौंमा आयोजना गरेको कार्यक्रममा प्रतिनिधिसभा सदस्य धनञ्जय रेग्मीको प्रमुख आतिथ्यमा उक्त रकम प्रधानमन्त्री राहत कोषमा हस्तान्तरण गरिएको हो।

यस्तै, भारतीय पूर्वसैनिक गोर्खा ब्रिगेड अन्तर्गतका विभिन्न संस्थाले संकलन गरेको ९७ लाख १८ हजार २ सय ४९ रुपैयाँ पनि प्रधानमन्त्री राहत कोषमा जम्मा गरिसकेको छ भने बाँकि ३४ लाख २३ हजार ५ सय ४२ रुपैयाँ आजको कार्यक्रममा प्रमुख अतिथि मार्फत प्रधानमन्त्री राहतकोषमा जम्मा गरिने बताईएको छ ।

कार्यक्रममा भारतीय पूर्वसैनिक तथा उनीहरूका परिवारका सदस्यहरूको उल्लेख्य उपस्थिति थियो।

पूर्वसैनिक संस्थाले प्राकृतिक विपद्बाट प्रभावित नागरिकको सहयोगका लागि आफ्नो तर्फबाट सहयोग संकलन गरी राहत कोषमा हस्तान्तरण गरेको जनाएको छ।

सद्भाव थिएटर–नेपालको प्रस्तुतिमा नयाँ बानेश्वर, थापागाउँस्थित ‘एक थिएटर नेपाल’मा नाटक ‘माण्डवी’को मञ्चन सुरु भएको छ। राम के.ए.सी.को लेखन तथा निर्देशनमा तयार पारिएको यो नाटक असोज १ गतेदेखि १४ गतेसम्म प्रदर्शन हुनेछ।

मंगलबार बाहेक प्रत्येक दिन साँझ ५:३० बजे र शनिबार अतिरिक्त शो दिउँसो १:०० बजे पनि नाटक हेर्न सकिनेछ।

‘माण्डवी’ नाटकले तीव्र गतिमा दौडिरहेको आधुनिक जीवनशैली र त्यसले मानव सम्बन्धमा पारेको प्रभावलाई मुख्य विषय बनाएको छ।

प्रविधि, करियर, जागिर, पैसा र सम्पत्तिको दौडधुपमा मानिसले कसरी आफैँलाई बिर्सँदै गएको छ र यसको असर उसकै जीवन तथा सम्बन्धमा कसरी परिरहेको छ भन्ने कुरा नाटकमा जीवन्त रूपमा प्रस्तुत गरिएको छ।
नाटकले मानिसले गुमाउँदै गएको समय, सम्बन्ध र आत्मीयतालाई पुनः खोज्नुपर्ने आवश्यकतामाथि जोड दिएको छ।
भावनाहरूको शुद्धीकरण, सम्बन्धहरूको पुनर्जागरण, आत्म-साक्षात्कार, पूर्वाग्रहको त्याग तथा अरूको अस्तित्वलाई स्वीकार गर्ने क्षमता विकास गर्नुपर्ने सन्देश यसले दिन्छ। ‘माण्डवी’लाई वर्तमान समयको प्रतिनिधि पात्रका रूपमा उभ्याउँदै नेपाली समाजका अदृश्य अन्तर्विरोध, मोह, स्वतन्त्रता, जीवन-दर्शन, सत्य र मिथ्यालाई मञ्चमा उतारिएको छ।

निर्देशक राम के.ए.सी.का अनुसार ‘माण्डवी’ केवल एउटा पात्र वा नाटक मात्र नभएर समकालीन मानव जीवनको वास्तविक प्रतिबिम्ब हो, जसले दर्शकलाई आफ्ना सम्बन्ध र अस्तित्व जोगाउनेबारे सोच्न बाध्य बनाउँछ।

नाटकमा निलीमा पाण्डे, एवन राज उप्रेती, सन्तोष बिष्ट, रुषा श्रेष्ठ, संस्कृति वन, तीर्सना राई, भिष्मराज जोशी र किरण चापागाईं लगायतका कलाकारहरूको जीवन्त अभिनय रहेको छ।