फक्सवागेनको ‘जेटा’ब्राण्ड ‘जेटा’ ब्राण्ड सार्वजनिक

विश्व चर्चित अटोमोबाइल कम्पनी फक्सवागेनले चीनलाई लक्षित गर्दै ‘जेटा’ नामक नयाँ ब्राण्डमार्फत सस्तो इलेक्ट्रिक गाडी (ईभी) बजारमा प्रवेश गर्ने तयारी गरेको छ। बेइजिङ अटो शोअघि सार्वजनिक गरिएको ‘जेटा एक्स कन्सेप्ट’ कम्पनीको नयाँ रणनीतिक कदमका रूपमा हेरिएको छ।

चीनको साझेदार FAW-Volkswagen सँग मिलेर सञ्चालन भइरहेको जेटा ब्राण्ड यसअघि बजेट पेट्रोल कारका लागि चिनिन्थ्यो। अब भने यो ब्राण्डलाई पूर्ण रूपमा न्यू इनर्जी भेहिकलतर्फ केन्द्रित गरिने कम्पनीले जनाएको छ।

जेटाले प्योर ईभी, हाइब्रिड र प्लग-इन हाइब्रिड गाडी उत्पादन गर्ने योजना बनाएको छ। सन् २०२८ सम्ममा पाँच नयाँ मोडल बजारमा ल्याउने लक्ष्य राखिएको छ, जसमा चार वटा इलेक्ट्रिक र एउटा पेट्रोल मोडल हुनेछ।

कम्पनीका अनुसार पहिलो इलेक्ट्रिक मोडलको मूल्य करिब १४ हजार ७०० अमेरिकी डलर रहनेछ, जसले सस्तो मूल्यमा ईभी उपलब्ध गराउने अपेक्षा गरिएको छ। वार्षिक ४ देखि ५ लाख युनिटसम्म बिक्री गर्ने लक्ष्य राखिएको छ।

हाल ‘एक्स कन्सेप्ट’ को मोटर, ब्याट्री र अन्य प्रविधिका विवरण सार्वजनिक गरिएको छैन। तर यस कदमले चीनमा बढ्दो प्रतिस्पर्धाबीच फक्सवागेनलाई बलियो बनाउने विश्वास गरिएको छ।