प्रसिद्ध फेसन कोरियोग्राफर रोजिन शाक्यलाई मिसेस नेपाल अष्ट्रेलिया २०२५ का लागि आधिकारिक कोरियोग्राफर नियुक्त गरिएको छ।

हिमाली कल्चर ग्रुप मेलबर्न र इभेन्ट्स नेपाल अष्ट्रेलियाको सहकार्यमा आयोजना हुन लागेको यो अग्रगामी सौन्दर्य प्रतियोगिता अष्ट्रेलियामा बसोबास गर्ने विवाहित नेपाली महिलाको शक्ति, प्रतिभा र पहिचानलाई सम्मानित र उत्सवमय बनाउन समर्पित रहेको छ।

रोजिनको संलग्नतासँगै प्रतियोगीहरूलाई कलात्मक प्रशिक्षण र विश्वस्तरको ग्रुमिङ अनुभव दिलाउने उद्देश्य लिइएको छ। कार्यक्रमको व्यवस्थापन सीजन मिडियाले गर्नेछ, जसले १६ वर्षभन्दा बढी अनुभवसहित नेपालमा प्रतिष्ठित इभेन्ट कम्पनीको रूपमा ख्याति कमाएको छ।

करिब दुई दशक लामो सफल करिअरसहित रोजिन शाक्यलाई नेपालको सबैभन्दा सफल फेसन कोरियोग्राफरमध्ये एकका रूपमा चिनिन्छ। उनले विश्वभर १,२०० भन्दा बढी इभेन्ट कोरियोग्राफ गरेका छन्, जसमा ३०० भन्दा बढी फेसन शोहरू पर्दछन्।

उनका कार्यहरू हेरिटेज पेजेन्ट्स, मिस मरमेड सिंगापुर, मोडल सुपरस्टार मुम्बई र मिस तामाङ वर्ल्ड जस्ता अन्तर्राष्ट्रिय प्रतियोगितामा समेत प्रस्तुत भइसकेका छन्। उनको सिर्जनात्मक निर्देशन कलात्मक शुद्धता, सांस्कृतिक सचेतना र फेसन तथा व्यक्तित्व विकासलाई विश्वव्यापी स्तरमा प्रवर्द्धन गर्ने प्रतिबद्धताबाट निर्देशित हुन्छ।

फेसन क्षेत्रमा उनको योगदानलाई विभिन्न सम्मानले मान्यता दिइएको छ। सन् २०१९ मा मलेसियामा भएको इन्टरनेशनल एक्सिलेन्स अवार्डमा उनलाई आउटस्ट्यान्डिङ इन्टरनेशनल कोरियोग्राफर उपाधि दिइएको थियो। सोही वर्ष दुबईमा उनले इन्टरनेशनल फेसन कोरियोग्राफर एचिभमेन्ट अवार्ड प्राप्त गरेका थिए।

काठमाडौँमा आयोजित पेजेन्ट नेपाल फेसन एण्ड मोडल अवार्ड्समा उनलाई लेजन्डरी फेसन कोरियोग्राफरको रूपमा सम्मान गरिएको थियो भने २०२० मा फेसनफेयर अवार्डमा बेष्ट इन्टरनेशनल नेपाली फेसन कोरियोग्राफर र मोडल सङ्स अवार्डमा बेष्ट फेसन कोरियोग्राफरका रूपमा सम्मानित गरियो। यस्तै, २०२२ मा दुबईमा भएको एसियन प्रोफेशनल एचिभमेन्ट अवार्ड्समा उनलाई आइकोनिक फेसन कोरियोग्राफर घोषित गरियो भने २०२३ मा थाइल्यान्डमा भएको हेरिटेज इन्टरनेशनल अवार्डमा कोरियोग्राफर अफ द इयर उपाधि प्राप्त गरे।

फेसन क्षेत्रमा मात्र नभई रोजिन शाक्य एक परिचित सञ्चारकर्मी पनि हुन्। हाल उनी इमेज च्यानल टेलिभिजनमा नेपल भाषा (नेपाल भाषा) समाचार वाचकको रूपमा कार्यरत छन्। अनुभवसंपन्न होस्ट र एम्सीको रूपमा उनले नेपाल र विदेशमा गरी १,४०० भन्दा बढी कार्यक्रम सञ्चालन गरिसकेका छन्। शैक्षिक क्षेत्रमा पनि उनी नमुना कलेज अफ फेसन टेक्नोलोजी, आईआईएफटी र काठमाडौँ एकेडेमी अफ टुरिजम एण्ड हस्पिटालिटीमा अध्यापन गर्दै आएका छन्।

उनका शिक्षण विषयमा व्यक्तित्व विकास, कार्यक्रम व्यवस्थापन, पर्यटन सञ्चार र मिडिया पर्दछन्। यस्तै, उनी नेपाल एयरहोस्टेस एकेडेमी र फ्लाइटेक इन्टरनेशनलमा व्यक्तित्व प्रशिक्षकका रूपमा पनि संलग्न छन्।

मिसेस नेपाल अष्ट्रेलिया २०२५ को यात्राअन्तर्गत रोजिनले ३० जना छोटकरीमा छनोट भएका प्रतियोगीहरूको ग्रुमिङ र कोरियोग्राफी नेतृत्व गर्नेछन्।

उनको प्रशिक्षणमा स्टेज प्रस्तुति, रनवे सीप, प्रदर्शन संयोजन र समग्र प्रस्तुति कला समावेश हुनेछ। यो प्रतियोगिता पहिलोपटक आयोजना हुन लागेको हो, जसले अष्ट्रेलियामा बसोबास गर्ने विभिन्न पेशागत पृष्ठभूमिका नेपाली महिलालाई सहभागिता गर्न आमन्त्रण गरेको छ। यसको भव्य फाइनल कार्यक्रम २०२५ सेप्टेम्बर १३ तारिखमा मेलबर्न, अष्ट्रेलियामा हुने तय भएको छ।

गुरुङ समुदायको कथा भन्ने चलचित्र ‘मुख्या’ काठमाडौंमा प्रदर्शन भइरहेको छ। 

प्रितम गुरुङ निर्देशित चलचित्र मुख्या यस अघि स्कटल्याण्डमा आयोजित ‘इन्डिजिनियस फिल्म फेस्टिभल’ हुँदै वेलायतमा लामो समय प्रदर्शन भएको थियो। 

गुरुङ समुदायमा हुने मुखिया पात्रको कथा भन्ने यो चलचित्र गुरुङ संस्कार संस्कृतिमा आधारित रहेर निर्माण गरिएको छ। 

काठमाडौंमा शुक्रबारबाट प्रदर्शन गरिएको चलचित्रलाई दर्शकहरुले रुचाएका छन्। 

रोधि डिजिटलको व्यानरमा निर्मित यस चलचित्र निर्देशक प्रितम गुरुङको ५० औ चलचित्र हो।

वेलायतबाट प्रदर्शन शुरु गरिएको यो चलचित्र काठमाडौँ पश्चात मोफसलको शहरहरुमा प्रदर्शन गर्ने तैयारीमा रहेको यसका निर्माण टिमले बताएको छ। 

काठमाडौं, असार २१

नेपाली चलचित्र इतिहासको विविध पक्ष समेटिएको ऐतिहासिक पुस्तक ‘नेपाली चलचित्रमा पहिलो’ हालै सम्पन्न चलचित्र विकास बोर्डको २५औं वार्षिकोत्सब (रजत जयन्ती) को भब्य समारोहबीच सार्वजनिक गरिएको छ।

उक्त कार्यक्रम सूचना, सञ्चार तथा प्रविधि मन्त्री पृथ्वीसुब्बा गुरुङ को प्रमुख आतिथ्यतामा महेन्द्र पुलिस क्लबको सभा हलमा भएको थियो । चलचित्र विकास बोर्डको प्रकाशनमा सार्वजनिक गरिएको यस पुस्तकमा नेपाली फिल्म उद्योगमा भएका विविध ‘पहिलो’ उपलब्धिहरूलाई तथ्यसहित दस्तावेज गरिएको छ।

पुस्तकका लेखक चलचित्र निर्देशक कमल एक्चै मगर हुन् भने सम्पादनको जिम्मेवारी वरिष्ठ रङ्ग पत्रकार शान्तिप्रियले सम्हालेका छन्। नेपाली चलचित्रको सुरुवाती कालदेखि हालसम्मको यात्रा समेटिएको पुस्तकमा — पहिलो चलचित्र, पहिलो अभिनेत्री, पहिलो निर्देशक, विभिन्न भाषामा बनेका पहिलो फिल्म, प्राविधिक, पुरस्कार तथा सम्मानमा पहिलो स्थान पाएका व्यक्तित्व र फिल्महरूको विवरण समेटिएको छ।

लेखक कमलका अनुसार, “पुस्तकले नेपाली सिनेमाको विकासयात्रालाई सरल भाषामा बुझाउन खोजेको छ, जसले अध्ययन, अनुसन्धान र चलचित्रप्रेमीहरूका लागि महत्वपूर्ण स्रोतको रूपमा काम गर्नेछ।”

कार्यक्रमको समापनमा बोल्दै चलचित्र विकास बोर्डका अध्यक्ष दिनेश डि.सी. ले भने, “यो संस्करण पहिलो हो। केही सामग्री छुटेको हुन सक्छ अथवा आगामी दिनमा नयाँ-नयाँ इतिहास बन्न सक्छ ती सबैलाई समेट्दै छिट्टै दोस्रो संस्करण ल्याइनेछ।”

“नेपाली चलचित्रमा पहिलो” नामक ऐतिहासिक पुस्तकको विमोचन सूचना, सञ्चार तथा प्रविधि मन्त्री पृथ्वीसुब्बा गुरुङ, पहिलो नेपाली अभिनेत्री भुवन चन्द, वरिष्ठ कलाकार तथा पूर्व बोर्ड अध्यक्ष कृष्ण मल्ल, निर्देशक तुलसी घिमिरे, संगीतकार शम्भुजित बास्कोटा, र अध्यक्ष दिनेश डि.सी. ले संयुक्तरूपमा गर्नुभएको थियो।

उपस्थित चलचित्रकर्मीहरूले यो पुस्तक नेपाली चलचित्र इतिहासको दस्तावेजिकरणमा एक महत्त्वपूर्ण कोसेढुंगा भएको प्रतिक्रिया दिएका थिए। ‘नेपाली चलचित्रमा पहिलो’ पुस्तकले विगत छ दशकको चलचित्र यात्रा संक्षिप्त र तथ्यपूर्ण रूपमा प्रस्तुत गर्ने प्रयास गरेको छ।