धुलोबाट डीआरएससम्म : दर्शक अनुभव बदल्ने तयारीमा एनपिएल
काठमाडौंको कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा नेपाल प्रिमियर लिग (एनपिएल) को तेस्रो संस्करणका लागि तयारी अन्तिम चरणमा पुगेको छ।
यसपटक मैदानमा संरचना थप्ने मात्र होइन, अघिल्ला संस्करणमा दर्शकले भोगेका समस्या सुधार्ने चुनौती पनि नेपाल क्रिकेट संघ (क्यान) सामु छ।
गत संस्करणमा दर्शकले धुलो, शौचालयको अपर्याप्त सुविधा र आवतजावतमा असहजता भोगेका थिए। ती कमजोरी सुधार्दै दर्शकको चाप व्यवस्थापन र खेल अवलोकनलाई सहज बनाउने काम भइरहेको छ।
एनपिएलको बढ्दो लोकप्रियतासँगै कीर्तिपुर मैदानको पूर्वाधार र व्यवस्थापनमाथि पनि चासो बढेको छ। यसपटक दर्शक, खेलाडी र सञ्चारकर्मीका लागि आवश्यक सुविधा व्यवस्थित बनाउने तयारी गरिएको छ।
प्रतियोगिताको अर्को आकर्षण डिसिजन रिभ्यू सिस्टम (डीआरएस) को प्रयोग हुनेछ। यसले अम्पायरका निर्णय पुनरावलोकन गर्ने सुविधा दिनेछ।
कात्तिक ९ देखि मंसिर ५ सम्म हुने एनपिएलमा यसपटक खेलको प्रतिस्पर्धासँगै मैदानको व्यवस्थापन र दर्शक अनुभव पनि परीक्षामा पर्नेछ।
