काठमाडौँको त्रिभुवन विश्वविद्यालय क्रिकेट मैदान सम्बन्धमा नयाँ सम्झौताको तयारी अघि बढेको छ। सरकारका प्रवक्ता तथा युवा तथा खेलकुद मन्त्री सस्मित पोखरेल ले त्रिभुवन विश्वविद्यालय र नेपाल क्रिकेट संघ (क्यान) बीच सकारात्मक संवाद भइरहेको बताएका छन्।

यसअघि विश्वविद्यालयले आफ्नो मातहतका जग्गा ३५ दिनभित्र खाली गर्न सूचना जारी गरेपछि क्रिकेट क्षेत्रमा चिन्ता बढेको थियो। तर मन्त्री पोखरेलका अनुसार मैदान खाली गराउने उद्देश्य नभई सकिएको भाडा सम्झौता नवीकरण गर्ने तयारी भइरहेको हो। उनले मैदान नभत्किने स्पष्ट पारेका छन्।

पछिल्लो समय सरकारले यस मैदानलाई राष्ट्रिय गौरवको परियोजनाका रूपमा अघि बढाएको छ। गत वर्ष मात्र शहरी विकास मन्त्रालयले करिब ९० करोड रुपैयाँ खर्च गरेर १० हजार दर्शक क्षमताको प्यारापिट र फ्लडलाइट जडान गरेको थियो।

क्यानले पनि आफ्नो अधिकांश अन्तर्राष्ट्रिय खेल यही मैदानमा गर्दै आएकोले सम्झौता थप गर्न पहल गरिरहेको छ। चैत २३ गते बसेको क्यानको बोर्ड बैठकले सम्झौता नवीकरणका लागि अनुरोध गर्ने निर्णय गरिसकेको छ।

यता राष्ट्रिय खेलकुद परिषदले दुवै पक्षबीच समन्वय गरिरहेको जनाएको छ, जसले आगामी दिनमा नेपाली क्रिकेटको भविष्य थप सुनिश्चित हुने अपेक्षा गरिएको छ।

सरकारले काठमाडौं र भक्तपुरबीचको मनोहरा खोला किनारमा रहेको सुकुम्बासी बस्ती भत्काउन सुरु गरेको छ।

बिहान ९ बजे प्रहरी र डोजर सहितको टोली बस्ती पुगेको थियो। साढे १० बजेदेखि घर-टहरा भत्काउन सुरु गरिएको हो।

भत्काउनुअघि प्रहरी बस्तीभित्र प्रवेश गरेको थियो। त्यसपछि काठमाडौं महानगरको टोलीले डोजर चलाएको हो।

स्थानीय बासिन्दाले शनिबारदेखि आइतबार बिहानसम्म आफ्नो सामान निकालिसकेका थिए। अहिले खाली गरिएका घरहरूमा डोजर चलाइँदै छ।

सयौं घर टहरा रहेको यो बस्ती भत्काउन आधा दर्जन डोजर प्रयोग गरिएको छ।

यसअघि शनिबार स्थानीयको अवरोध र नाराबाजीका कारण प्रहरी फर्किएको थियो। ढुंगामुढा हुँदा केही प्रहरी घाइते समेत भएका थिए।

काठमाडौँको थापाथली स्थित सुकुम्बासी बस्ती पूर्ण रूपमा हटाइएको छ। शनिबार विहानै देखि सरकारले डोजर परिचालन गरेर सुकुम्बासी बस्ति हटाएको हो।

स्थानीय प्रशासनले केही घण्टा समय दिएर बासिन्दालाई सामान सुरक्षित रूपमा निकाल्न आग्रह गरेपछि डोजर प्रयोग गरी टहरा तथा अस्थायी संरचनाहरू भत्काइएको थियो। धेरै बासिन्दाले स्वयं पनि आफ्ना संरचना हटाउँदै सामान व्यवस्थापन गरेका थिए।

बस्ति हटाउने क्रममा ठूलो संख्यामा जनपद प्रहरी, सशस्त्र प्रहरी र महानगर प्रहरी बल परिचालन गरिएको थियो। सुरुमा दुई वटा डोजर प्रयोग गरिएकोमा पछि थप उपकरण ल्याइ तीनभन्दा बढी डोजर, क्रेन र टिपरसमेत परिचालन गरियो। कुनै अप्रिय घटना नहोस् भन्ने उद्देश्यले एम्बुलेन्स पनि तयारी अवस्थामा राखिएको थियो।

बस्ती हटाइएपछि त्यहाँका परिवारलाई अस्थायी रूपमा दशरथ रंगशाला मा लगिएको छ। त्यहाँ प्रारम्भिक स्क्रिनिङपछि विभिन्न स्थानमा बनाइएका होल्डिङ सेन्टरमा स्थानान्तरण गर्ने व्यवस्था मिलाइएको छ।

पुनर्स्थापनाका लागि नागार्जुन लगायत विभिन्न क्षेत्रमा आवास युनिट तथा भवनहरू तयारी अवस्थामा राखिएका छन्। साथै, कीर्तिपुर, भक्तपुर (बोडे), खरीपाटी र चाँदबाग क्षेत्रमा पनि अस्थायी बसोबासको व्यवस्था गरिएको छ।

सरकारले हटाइएका परिवारलाई खानाको व्यवस्था मिलाउनुका साथै पानी, बिजुली र शौचालयजस्ता आधारभूत सुविधा सुनिश्चित गरिएको जनाएको छ। साथै, वास्तविक सुकुम्बासीको पहिचान गरी डिजिटल प्रणालीमार्फत विस्तृत विवरण संकलन गर्ने प्रक्रिया अगाडि बढाइएको छ।