बूढीगण्डकीमा बाढी, तटीय बस्तीमा क्षति

गोरखाको चुमनुब्री गाउँपालिका क्षेत्रमा पहिरो खसेर खोला थुनिएपछि बूढीगण्डकी नदीमा आइतबार बिहान ठूलो बाढी आएको छ। बाढीले नदी किनारका बस्ती तथा भौतिक संरचनामा क्षति पुर्‍याएको छ।

चुमनुब्री गाउँपालिका–६ अन्तर्गत खारोङ र उङ्जुलुबीच खसेको सुक्खा पहिरोले स्यारखोला थुनेपछि बाढी आएको प्रारम्भिक जानकारी छ। खोला थुनिँदा करिब दुई सयदेखि तीन सय मिटर माथिसम्म पानी र बाफ उडेको देखिएको चुमनुब्री गाउँपालिकाका प्रमुख प्रशासकीय अधिकृत नारायणप्रसाद सापकोटाले बताएका छन्।

पहिरोले खोला थुनेपछि जम्मा भएको पानी एक्कासि बग्दा नदीको बहाव बढेको हो। बाढी नदी किनारका बस्ती र भौतिक संरचनामा पसेको छ। घटनास्थलमा तत्काल पुग्न नसकिएकाले क्षतिको विस्तृत विवरण संकलन हुन बाँकी रहेको गाउँपालिकाले जनाएको छ।

बाढीले गोरखाको माछीखोला बजारमा ठूलो क्षति पुर्‍याएको छ। माछीखोलाबाट केरौँजा जाने झोलुङ्गे पुल बगाएको छ भने सल्लेरी र जगत बजारमा समेत क्षति पुगेको छ। नदीको बहाव बढेसँगै तटीय क्षेत्रका बासिन्दा त्रसित भएका छन्।

घटनापछि स्थानीय बासिन्दालाई तत्काल सुरक्षित र अग्लो स्थानमा जान आग्रह गरिएको थियो। स्थानीयको सतर्कताका कारण अहिलेसम्म मानवीय क्षति भएको जानकारी नआएको गाउँपालिकाका प्रमुख प्रशासकीय अधिकृत सापकोटाले बताएका छन्।

बूढीगण्डकी नदीमा पानीको बहाव अवरुद्ध हुने र फेरि खुल्ने अवस्था रहेकाले तल्लो तटीय क्षेत्रमा जोखिम कायमै छ। प्रहरीले त्रिशूली दोभानसम्म नदी किनारमा नजान र बाढीको जोखिम भएका स्थानबाट टाढा रहन आग्रह गरेको छ।

घटनाबाट भएको भौतिक क्षतिको पूर्ण विवरण आउन बाँकी छ।