काठमाडौँको केन्द्रभागमा अवस्थित नारायणहिटी दरबार सङ्ग्रहालय र दरबारमार्ग राजधानीका ऐतिहासिक, सांस्कृतिक तथा आधुनिक जीवनशैली झल्काउने प्रमुख क्षेत्र हुन्।

ड्रोनबाट कैद गरिएको ३६० डिग्री एरियल दृश्यमा नारायणहिटी दरबार सङ्ग्रहालय, दरबारमार्ग, वरपरका व्यावसायिक भवन, हरियाली र व्यवस्थित सहरी संरचना स्पष्ट रूपमा देख्न सकिन्छ।

तत्कालीन राजपरिवारको मुख्य निवास रहेको नारायणहिटी दरबार २०६५ सालमा गणतन्त्र स्थापना भएपछि सङ्ग्रहालयमा रूपान्तरण गरिएको हो।

हाल यहाँ दरबारका विभिन्न कक्ष, ऐतिहासिक सामग्री तथा राजसंस्थासँग सम्बन्धित वस्तुहरू सर्वसाधारणका लागि खुला छन्, जसले स्वदेशी तथा विदेशी पर्यटकलाई नेपालको राजनीतिक इतिहाससँग परिचित गराउँदै आएको छ।

दरबार सङ्ग्रहालयसँगै रहेको दरबारमार्ग राजधानीको प्रमुख व्यापारिक र पर्यटकीय क्षेत्र हो। यहाँ पाँचतारे होटल, अन्तर्राष्ट्रिय ब्रान्डका शोरुम, रेस्टुरेन्ट, क्याफे तथा विभिन्न व्यावसायिक प्रतिष्ठान सञ्चालनमा छन्।

दिनभरि आन्तरिक तथा बाह्य पर्यटकको चहलपहल रहने यो क्षेत्र काठमाडौँको आधुनिक जीवनशैलीको प्रतिनिधि मानिन्छ।

ऐतिहासिक सम्पदा र आधुनिक पूर्वाधारको सुन्दर संगम प्रस्तुत गर्ने यो ३६०° एरियल दृश्यले काठमाडौँलाई नयाँ दृष्टिकोणबाट नियाल्ने अवसर प्रदान गर्दछ।

नेपालकै पहिलो आधुनिक नागढुंगा–सिस्नेखोला सुरुङमार्ग औपचारिक रूपमा उद्घाटन भएको छ।

आइतबार आयोजित विशेष समारोहमा पूर्वाधार विकास मन्त्री सुनिल लम्साल, नेपालका लागि जापानी राजदूत मायदा तोरु र जाइकाका अध्यक्ष डा. तानाका अकिहिकोले संयुक्त रूपमा सुरुङमार्ग उद्घाटन गरे।

त्यसपछि उहाँहरूले सुरुङभित्र गाडी चलाएर पहिलो सवारी आवागमनको शुभारम्भ पनि गरेको थियो ।

करिब २ हजार ६८८ मिटर लामो यो सुरुङमार्ग केही दिनभित्र सर्वसाधारणका लागि खुला हुनेछ। प्रारम्भिक परीक्षण अवधिभर भने कुनै पनि टोल शुल्क लाग्ने छैन।

नियमित सञ्चालनपछि कार र भ्यानले रु. ६० देखि ६५, मिनीबस तथा साना ट्रकले रु. ८० देखि ११५, र ठूला बस तथा ट्रकले रु. २०० देखि २६० सम्म तिर्नुपर्नेछ।

तर पैदलयात्री, मोटरसाइकल र तीनपाङ्ग्रे सवारीलाई भने सुरुङमार्गमा प्रवेश अनुमति हुनेछैन।

सिलान्यास भएको सात बर्ष पछि सुरुंगमार्ग संचालनमा आएको छ।

काठमाडौँ महानगरपालिका–३२ स्थित पेप्सीकोला फुटबल ग्राउण्ड निर्माणको अन्तिम चरणमा पुगेको छ।

११ ‘ए’ साइडको कृत्रिम घाँसे मैदानमा कार्पेट बिछ्याउने काम पूरा भइसकेको छ भने अब बालुवा भर्ने र अन्तिम फिनिसिङको काम बाँकी छ।

महानगरपालिकाका अनुसार अब करिब दुई महिनाभित्र सम्पूर्ण निर्माण सम्पन्न हुनेछ। कृत्रिम घाँसलाई टिकाउ बनाउने, पानी जम्न नदिने र खेलाडीलाई सुरक्षित रूपमा खेल्न मिल्ने वातावरण तयार गर्न बालुवा हालिनेछ।

साथै वर्षाको पानी सहज निकासका लागि ड्रेनेज प्रणाली र मैदान वरिपरि फुट ट्रयाक पनि निर्माण भइरहेको छ।

धुलाम्मे र अव्यवस्थित रहेको यस मैदान आधुनिक सुविधासहितको खेल मैदानमा रूपान्तरण हुँदैछ।

निर्माण सम्पन्न भएपछि स्थानीय खेलाडी, क्लब र फुटबल प्रतियोगिताका लागि यो मैदान महत्वपूर्ण पूर्वाधार बन्ने अपेक्षा गरिएको छ।

पेप्सीकोलासहित काठमाडौँका विभिन्न स्थानमा यस्तै कृत्रिम घाँसे फुटबल मैदान निर्माण गर्ने महानगरपालिकाको योजना पनि अन्तिम चरणतर्फ अघि बढिरहेको छ।