काठमाडौँको टेकुस्थित कौशी नाटकघरमा यतिबेला नाटक ‘कागताली’ को नियमित मञ्चन भइरहेको छ।  

५० को दशकमा एउटा परिवारमा उत्सव सुरू हुँदै गर्दा हुने अप्रत्यासित घटनालाई नाटकले देखाएको छ।  

नविनचन्द्र अर्यालको लेखन तथा निर्देशनमा बनेको नाटकलाई माउन्टेन र्याट्स मोसन पिक्चर्स, एक थिएटर नेपाल र कौसी थिएटरले संयुक्त रूपमा प्रस्तुत गरेको हो। 

साउन ३१ गतेसम्म मञ्चन हुने नाटकमा  बास्ना तिमिल्सिना, रूपेश लामा, सविन भट्टराई, सुजन पौडेल, जीवन दाहाल, अमृत कौचा, सुष्मा निरौला, दीपेन्द्र शाही,  युबिना भट्टराई र आकृति बुढाथोकीको अभिनय देख्न सकिन्छ।

काठमाडौंको थापागाउँ स्थित मण्डला नाटकघरमा ‘चन्द्रलाई कसले मार्यो?’ नाटकको नियमित मञ्चन भइरहेको छ।

रङ्गकर्मी सन्दीप श्रेष्ठ को परिकल्पना, लेखन र निर्देशनमा तयार पारिएको नाटकले क्यवेर समुदायको गहन आत्म-अन्वेषण र उनीहरूले भोग्दै आएका अदृश्य पीडाहरूलाई नाटकले समेटेको छ।

नाटकले फरक लैङ्गिक क्षमता भएका एक व्यक्तिको मानसिक संघर्ष, डिप्रेसन र आत्महत्या जस्ता संवदेनशील विषयहरूलाई नजिकबाट केलाएको छ।

एलजीबीटीक्यूआइएईप्लस समुदायभित्रका कथाहरूलाई मूलधारमा ल्याउने प्रयासस्वरूप यो नाटकले ती अदृश्य घाउहरूलाई उजागर गरेको छ, जुन समाजमा अक्सर लुकाइएका हुन्छन्।

निर्देशक श्रेष्ठले यस समुदायका व्यक्तिहरूले वर्षौंदेखि आफ्नो अस्तित्वसँग गरिरहेको युद्ध, समाजमा खुलेर बोल्न नसक्ने बाध्यता, र आफ्ना भावनाहरू व्यक्त गर्ने भाषा नपाउने छटपटीलाई नाटकमा जीवन्त रूप दिएका छन्।

‘चन्द्र’ नामक मुख्य पात्रको आँखाबाट संसार हेर्ने प्रयास गरिएको यस नाटकमा सम्बन्धहरूको बदलिँदो स्वरूप र हरेक पात्रको फरक दृष्टिकोणलाई कलात्मक ढंगले प्रस्तुत गरिएको छ।

यो नाटकले दर्शकलाई क्वियर समुदायका सदस्यहरूको भित्री संसारमा डोर्याउँछ र उनीहरूले दैनिक जीवनमा अनुभव गर्ने आत्मसंघर्ष र सामाजिक चुनौतीहरूलाई गहिरोसँग बुझ्ने अवसर प्रदान गर्छ।

साउन १८ गतेसम्म मञ्चन हुने यस नाटकमा निर्देशक सन्दीप श्रेष्ठसहित भावना उप्रेती, सीतादेवी तिमल्सेना, मिलन कार्की, मौसम खड्का, तेन्जु योञ्जन, प्रितिशा अधिकारी र किरण चापागाईं लगायतका कलाकारहरूको अभिनय रहेको छ। यो नाटक सोमबारबाहेक हरेक दिन साँझ ५:३० बजे र शनिबार दिउँसो १:३० बजे अतिरिक्त शोका साथ मञ्चन भइरहेको छ।

‘चन्द्रलाई कसले मार्यो?’ केवल एउटा नाटक मात्र नभई, क्वियर समुदायको आवाज हो – एक मौन तर शक्तिशाली पुकार जसले समाजलाई उनीहरूको पीडा बुझ्न र उनीहरूलाई स्वीकार गर्न आह्वान गर्छ।

यो नाटक हेर्नु भनेको फरकपनलाई अँगाल्ने र मानव अनुभवको विविधतालाई सम्मान गर्ने दिशामा एक महत्त्वपूर्ण कदम चाल्नु हो।

काठमाडौंको टेकुस्थित कथाघेराको कौशी नाटकघरमा नाटक ‘सिक रूम’ मञ्चन भइरहेको छ। 

मानवीय सम्बन्धका जटिलता र आत्म-विनाशकारी प्रवृत्तिलाई उजागर गर्ने एउटा प्रेम कथा बोकेको नाटक ‘सिक रूम’ असार ६ गतेदेखि मञ्चन भइरहेको छ। 

कथा घेराले आफ्नो सातौं वार्षिकोत्सवको अवसरमा मञ्चन सुरू गरेको यो नाटक राजीव जोसेफको ‘ग्रुसम प्लेग्राउन्ड इन्जुरिज’ को नेपाली रूपान्तरण हो। 

नाटकलाई  कलाकार तथा निर्देशक आकांक्षा कार्कीले निर्देशन गरेकी छन्। नाटकले कालिना र दिवासको कथा भन्छ, जहाँ विद्यालयबाट छुट्टिएका दुई प्रेमीहरू वर्षौको अन्तरालपछि फेरि भेट्छन् र चोट, हृदयविदारक पीडा तथा आत्म-विनाशकारी प्रवृत्तिसँग जुधिरहेका हुन्छन्। यसले उनीहरूको लुकेका असुरक्षा र घाउहरूलाई देखाउँछ।

नाटकमा नूर खनाल, अभिषेक खड्का, आकांक्षा कार्की र सुदाम सीकेले अभिनय गरेका छन्। 

आगामी असार २८ सम्म नियमित मन्चन हुने नाटक ‘सिक रुम’ मंगलबारबाहेक हरेक दिन बेलुकी ५:१५ बजे र शनिबार दिउँसो १ बजे पनि मञ्चन हुनेछ।  

नाटकमा आत्म-हानि र चोटपटकका विषयवस्तुहरू पनि समावेश भएकाले ‘ट्रिगर वार्निङ’ दिइएको छ।