गायक आशिर्वाद सुवेदी र चर्चित गायिका एलिना चौहानको सुमधुर स्वरमा सजिएको नयाँ रोमान्टिक गीत ‘मोहनी लगायो कान्छीले’ सार्वजनिक भएको छ।

प्रेम र आकर्षणको भावलाई कलात्मक ढंगले प्रस्तुत गरिएको यो गीत गायक सुवेदीको आधिकारिक युट्युब च्यानलमार्फत सार्वजनिक गरिएको हो। गीतमा शब्द तथा संगीत बसन्त सापकोटाको रहेको छ। स्थापित संगीतकार सापकोटाले यस गीतमा सरल तर आकर्षक शब्दमार्फत प्रेमको मधुर अनुभूति पस्केका छन्। संगीत संयोजन उदयराज पौडेलले गरेका हुन्।

उत्तम हुमागाईंको छायांकन रहेको भिडियोमा आश्मा विश्वकर्मा र प्रभात पाल ठाकुरीको क्युट केमेस्ट्री आकर्षक रूपमा प्रस्तुत गरिएको छ। म्युजिक भिडियोको निर्देशन हरि हुमागाईंले गरेका हुन्।

पप–लोक शैलीमा तयार गरिएको यस गीतमा प्रेमी आफ्नो प्रेमिकाको रूप, स्वभाव र मोहनीमा मन्त्रमुग्ध भएको कथा चित्रण गरिएको छ। सार्वजनिक भएसँगै गीतले सकारात्मक प्रतिक्रिया पाइरहेको छ भने टिकटक र युट्युबमा पनि राम्रो चर्चा कमाउने अपेक्षा गरिएको छ।

काठमाडौं, फागुन १ ।

देशभरका गुरुङ पर्यटन व्यवसायीहरुको राष्ट्रिय संस्था गुरुङ पर्यटन व्यवसायी संघ, नेपाल (जिटिन) को अध्यक्षमा बाबुराम गुरुङ चयन हुनुभएको छ।

बिहीबार काठमाडौंमा सम्पन्न १४औँ वार्षिक साधारणसभा तथा पाँचौँ अधिवेशनले आगामी तीन वर्षका लागि नयाँ कार्यसमिति चयन गरेको हो।

नवनिर्वाचित कार्यसमितिको वरिष्ठ उपाध्यक्षमा विन्दुमाया गुरुङ, द्वितीय उपाध्यक्षमा डिलबहादुर गुरुङ, महासचिवमा संञ्जिव गुरुङ, सचिवमा विकास गुरुङ, कोषाध्यक्षमा अम्बिर गुरुङ र सहकोषाध्यक्षमा महाबिर गुरुङ चयन हुनुभएको छ। त्यस्तै विभिन्न सदस्य पदमा धनबहादुर गुरुङसहित अन्य प्रतिनिधिहरु चयन भएका छन्। पूर्वअध्यक्ष कमला गुरुङको संयोजकत्वमा गठित निर्वाचन समितिले नयाँ कार्यसमितिको घोषणा गरेको हो।

सपथग्रहणपछि अध्यक्ष बाबुराम गुरुङले जिटिनलाई सामूहिक सहकार्यका आधारमा अघि बढाउँदै नेपाली पर्यटन क्षेत्रमा थप योगदान दिने प्रतिबद्धता व्यक्त गर्नुभयो। उहाँले गुरुङ सम्पदा मार्गको प्रवद्र्धन, पर्यटन मजदुरहरुको हित र समग्र आदिवासी जनजाति पर्यटन सर्किटको विकासलाई प्राथमिकतामा राखिने बताउनुभयो।

कार्यक्रमका प्रमुख अतिथि प्राकृतिक स्रोत तथा वित्त आयोगका कार्यबाहक अध्यक्ष जुद्धबहादुर गुरुङले हिमालबाट संकलित रोयल्टी केन्द्र, प्रदेश र स्थानीय तहमा बाँडफाँड भइरहेको उल्लेख गर्दै पर्यटन पूर्वाधार विकासमा त्यसको सदुपयोग गर्न आग्रह गर्नुभयो।

यसै अवसरमा नेपाल पर्वतारोहण संघ का अध्यक्ष फुर गेल्जे शेर्पाले ‘जिटिन पर्यटन मजदुर कोष’का लागि आर्थिक सहयोग घोषणा गर्नुभयो। कार्यक्रममा ‘पर्यटनमा गुरुङ’ स्मारिकाको दोस्रो अंक सार्वजनिक गर्नुका साथै विभिन्न व्यक्तित्व, सञ्चारकर्मी र आजीवन सदस्यहरुलाई सम्मान गरिएको थियो।

नेपाली मौलिक कला र संस्कृतिको संरक्षण गर्ने उद्देश्यसहित अमेरिकाको न्युयोर्कमा तमू परिवार न्युयोर्क इन्कले विशेष सांस्कृतिक कार्यक्रम सम्पन्न गरेको छ। कार्यक्रममा लोपोन्मुख गुरुङ संस्कृतिमा आधारित घाँटु नृत्य तथा कृष्ण चरित्र नृत्य प्रत्यक्ष प्रस्तुत गरिएको थियो।

प्रवासमा रहेर पनि पुर्ख्यौली पहिचानलाई जीवन्त राख्ने उद्देश्यले आयोजना गरिएको कार्यक्रममा घाँटु गुरु सल्लाहकार लाल बहादुर गुरूङ र संस्थापक घाँटु गुरुस्यो चिनु घलेको विशेष निर्देशन रहेको थियो। कार्यक्रमको मुख्य आकर्षणका रूपमा रहेको घाँटु नृत्यमा श्वेता गुरूङ र शुष्मा गुरूङले ‘घाँटु सरी’ बनेर आकर्षक प्रस्तुति दिएका थिए।

कार्यक्रमलाई थप रोचक बनाउन निर्देशक तथा कलाकार भुपेन्द्र गुरूङको नेतृत्वमा वाद्यवादन तथा गायन टोली परिचालन गरिएको थियो। वाद्यवादनमा मनित गुरूङ, दिपक गुरूङ र प्रेम गुरूङले साथ दिएका थिए भने गायनतर्फ संस्थाका अध्यक्ष बिन प्रसाद घलेसहित गुरुङ तथा घले समुदायका कलाकारहरूको सामूहिक स्वरले कार्यक्रमस्थल गुञ्जायमान बनेको थियो।

समुदायका अग्रजदेखि युवा पुस्तासम्मको उल्लेख्य सहभागिता रहेको उक्त कार्यक्रमले विदेशमा हुर्कँदै गरेको नयाँ पुस्तालाई आफ्नो संस्कार, संस्कृति र पहिचानसँग जोड्न महत्त्वपूर्ण भूमिका खेल्ने विश्वास आयोजकले व्यक्त गरेका छन्।