ललितपुर स्थित आर्टूडियो इजरायली कलाकार ओहार मोरं मंकको ‘ह्वेर द वाटर फल्स’ नामक एकल कला प्रदर्शनी हुने भएको छ।

आर्टुडियो इन्टरनेशनल आर्टिस्ट रेसिडेन्सी अन्तर्गत कलाकारको काठमाडौं बसाइँका क्रममा तयार गरिएको उक्त प्रदर्शनी हुने भएको हो।

आगामी २९ मे २०२६ मा साँझ ६ बजे आर्टूडियो नेपालको पाटन विङ, नकबहिलस्थित आर्टुडियोमा प्रदर्शनीको उद्घाटन गरिने आयोजकले जनाएको छ। प्रदर्शनी सर्वसाधारणका लागि ३० मेदेखि २ जुनसम्म बिहान ११ बजेदेखि बेलुका ५ बजेसम्म खुला रहनेछ।

काठमाडौंमा गरिएको अनुसन्धान, अवलोकन र अनुभवका आधारमा विकसित प्रदर्शनीले नेपालका परम्परागत हिटी पानी प्रणाली, धार्मिक तथा सांस्कृतिक अभ्यास तथा दैनिक जीवनका अदृश्य संरचनालाई केन्द्रमा राखेको छ। प्रदर्शनीमार्फत स्मृति, भक्ति, दृश्यता र सामूहिक जिम्मेवारीजस्ता विषयलाई कलात्मक ढंगले प्रस्तुत गरिएको आयोजकको भनाइ छ।

भिडियो, इन्स्टलेसन तथा नयाँ मिडिया माध्यम प्रयोग गरी तयार गरिएका कलाकृतिहरूमा पानीलाई केवल भौतिक आवश्यकताको रूपमा नभई स्मृति, विश्वास, हेरचाह र रूपान्तरणको प्रतीकात्मक माध्यमका रूपमा चित्रण गरिएको छ। प्रदर्शनीले देखिने र नदेखिने संरचनाबीचको सम्बन्ध उजागर गर्दै समाजले कसरी सम्झन्छ, परिवर्तन गर्छ र बिर्सन्छ भन्ने प्रश्नसमेत उठाएको छ।

आर्टुडियोका अनुसार “ह्वेर द वाटर फल्स”ले परम्परा र परिवर्तनबीचको सम्बन्धलाई केन्द्रमा राख्दै सांस्कृतिक स्मृति समयसँगै कसरी निर्माण र पुनःकल्पना हुन्छ भन्ने विषयमा चिन्तन प्रस्तुत गर्छ।

प्रदर्शनी एआईआर अन्तर्गतको कलाकार आवासीय अभ्यासको परिणाम भएको जनाइएको छ। आर्टुडियोले अन्तर्राष्ट्रिय कलाकार आवास कार्यक्रमलाई नेपालको समकालीन कला क्षेत्रलाई विश्वव्यापी संवाद, अनुसन्धान र सिर्जनात्मक आदानप्रदानसँग जोड्ने दीर्घकालीन अभ्यासका रूपमा अघि बढाइरहेको जनाएको छ।

आर्टुडियोका संस्थापक तथा समकालीन कलाकार कैलाश श्रेष्ठले अन्तर्राष्ट्रिय कलाकार आवास कार्यक्रम नेपाललाई समकालीन कलाको विश्वव्यापी केन्द्रका रूपमा स्थापित गर्ने दीर्घकालीन दृष्टिकोणसँग जोडिएको बताए।

लामो समयदेखि बौद्ध दर्शन तथा चर्या नृत्य क्षेत्रमा योगदान दिँदै आउनुभएका गुरु यज्ञमान पति बज्राचार्यलाई काठमाडौंमा विशेष सम्मान गरिएको छ।

काठमाडौंको राष्ट्रिय नाचघरमा काठमाडौं महानगरपालिकाकी कार्यवाहक प्रमुख सुनिता डंगोलको प्रमुख आतिथ्यमा युनेस्को र काठमाडौं सिटी अफ फिल्म्सद्वारा आयोजित “चर्या प्रवाह” कार्यक्रममा उहाँलाई सम्मान प्रदान गरिएको हो।

नेपा: डान्स एकेडेमी, बौद्ध दर्शन अध्ययन पुचः र नेपा सांस्कृतिक पुचःको सहकार्यमा आयोजित कार्यक्रममा विभिन्न कलाकारहरूले चर्या नृत्य प्रस्तुत गर्दै गुरु बज्राचार्यप्रति सम्मान व्यक्त गरेका थिए।

सम्मान ग्रहणपछि मन्तव्य व्यक्त गर्दै गुरु यज्ञमान पति बज्राचार्यले कार्यक्रमको वातावरण अत्यन्त आध्यात्मिक र भावुक रहेको बताउनुभयो। उहाँले यस्ता सांस्कृतिक कार्यक्रम दुर्लभ हुने उल्लेख गर्दै आफ्नो जीवनको सार्थकता महसुस भएको प्रतिक्रिया दिनुभयो।

कार्यक्रममा कार्यवाहक प्रमुख सुनिता डंगोलले गुरु बज्राचार्यले जात, उमेर वा समुदायको भेदभाव नगरी सबैलाई समान रूपमा शिक्षा प्रदान गर्दै आएको बताउनुभयो।

कार्यक्रमको संयोजन रीना महर्जन, रोहिया महर्जन र गम्भीर मान सिंहले गर्नुभएको थियो भने सञ्चालन सदिक्ष्या श्रेष्ठले गर्नुभएको थियो। आयोजकका अनुसार “चर्या प्रवाह” कार्यक्रमले नेपालको अमूल्य अमूर्त सांस्कृतिक सम्पदाको संरक्षण र प्रवर्द्धनमा महत्वपूर्ण योगदान पुर्‍याएको छ।

नेपालमा हालै सार्वजनिक गरिएको नयाँ इलेक्ट्रिक एसयूभी ‘एमजी एस सिक्स’ ले आधुनिक प्रविधि, लक्जरी फिचर र शक्तिशाली परफर्मेन्सका कारण अटो बजारमा चर्चा बटुल्न थालेको छ।

नक्सालस्थित एमजीको शोरुममा गरिएको अवलोकनका क्रममा कम्पनीका प्रतिनिधि शिरीष उपाध्यायका अनुसार ११ मे २०२६ मा नेपालमा लन्च गरिएको यो फुल साइज इलेक्ट्रिक एसयूभीमा १२४ लिटरको फ्रन्ट स्टोरेज (फ्रन्क), एक्टिभ एअर इन्टेक, एडास सेन्सर, रेन सेन्सिङ वाइपर तथा २० इन्चका टायर जस्ता फिचर समावेश गरिएको छ। गाडीको ग्राउन्ड क्लियरेन्स १९५ एमएम रहेको छ।

गाडीको साइड प्रोफाइलमा एक्स पावर ब्याजिङ, हिटेड साइड मिरर, ३६० डिग्री क्यामरा, रिक्वेस्ट सेन्सर र प्राइभेसी ग्लास दिइएको छ। पछाडितर्फ ५८१ लिटरको इलेक्ट्रिक बुट स्पेस उपलब्ध छ भने फुट सेन्सरबाट पनि बुट खोल्न सकिने सुविधा रहेको छ।

एमजी एस सिक्समा सीसीएस टाइप–२ चार्जिङ पोर्ट रहेको छ। एसी चार्जिङमा ७ किलोवाटसम्म सपोर्ट गर्ने यो गाडीले १४४ किलोवाटको डीसी फास्ट चार्जरमार्फत करिब ३८ मिनेटमै फुल चार्ज लिन सक्ने कम्पनीको दाबी छ।

रियर ह्विल ड्राइभ सिस्टम भएको यस गाडीमा १८० किलोवाटको मोटर जडान गरिएको छ। कम्पनीका अनुसार यसले एक पटकको चार्जमा ५३० किलोमिटरसम्म रेन्ज दिन्छ।

इन्टेरियरतर्फ हिटेड तथा भेन्टिलेटेड सिट, मेमोरी सिट, वायरलेस चार्जिङ, डुअल जोन क्लाइमेट कन्ट्रोल, हेडअप डिस्प्ले, वायरलेस एन्ड्रोइड अटो तथा एप्पल कारप्ले, ११ स्पिकर अडियो सिस्टम र विभिन्न स्मार्ट कनेक्टिभिटी फिचर समावेश गरिएको छ।

कम्पनीले तीन वर्षसम्म इन्टरनेट डाटा सुविधा पनि उपलब्ध गराएको छ।