रिस्ता गुरुङ रियालिटी शो ‘मेरो डान्स युनिभर्स’ सिजन–२ की विजेता हुन्। हङकङमा जन्मिएर तीन महिनाको उमेरमै नेपाल आएकी रिस्ताको बाल्यकाल पोखरामा हजुरबुवा–हजुरआमा र फूपूसँग बित्यो। त्यहीँबाट उनका स–साना पाइलाले नृत्यको ताल समात्न थाले।

सानैदेखि नृत्यमा रुचि भए पनि रिस्ताले औपचारिक तालिम भने लिइनन्। टेलिभिजन र युट्युब हेर्दै उनले नृत्य सिकिन्। विद्यालयका सांस्कृतिक कार्यक्रम र प्रतियोगितामा सक्रिय रहने उनी कक्षा २ मा ‘झलझली आँखामा’ गीतमा नाचेपछि पाएको प्रशंसाबाट थप उत्साहित भइन्।

प्लस–टू सकेर हङकङ पुगेपछि पनि उनले नृत्यलाई निरन्तरता दिइन्। साथीहरूसँग मिलेर डान्स स्टुडियो सञ्चालन गर्दै बालबालिकालाई सांस्कृतिक तथा आधुनिक नृत्य सिकाउँदै आएकी थिइन्।

‘मेरो डान्स युनिभर्स’को हङकङ अडिसनबारे जानकारी पाएपछि उनले प्रतियोगितामा भाग लिइन्। जित्नेभन्दा सिक्ने उद्देश्यले प्रवेश गरेकी उनी मेहनत गर्दै फाइनलसम्म पुगिन् र अन्ततः विजेता बनिन्।

शोले उनको आत्मविश्वाससमेत बढाएको छ। विजेता बनेपछि ‘हङकङको चिनो’मार्फत म्युजिक भिडियोमा पनि अभिनय गरेकी उनको गीतले युट्युबमा झन्डै २० लाख भ्युज पाएको छ।

अब नेपालमै अभिनय सिक्दै नृत्य र अभिनयलाई अघि बढाउने तथा डान्स स्टुडियो खोल्ने उनको योजना छ। ग्रामीण परिवेशका कथामा अभिनय गर्ने र अभिनेत्री मिरुना मगरजस्तै भूमिकामा देखिने उनको चाहना छ।

काठमाडौँ विश्वविद्यालय, स्कुल अफ एजुकेसनअन्तर्गत भाषा शिक्षा विभागले गुरुङ भाषा शिक्षणसम्बन्धी पोस्ट ग्राजुएट डिप्लोमा इन गुरुङ ल्याङ्ग्वेज टिचिङ (PGDE-GLT) कार्यक्रम अघि बढाएको छ।

तमु हुल छोज धीँ गुरुङ राष्ट्रिय परिषद्सँगको सहकार्यमा आयोजित सरोकारवाला गुरुङ समुदायसँगको परामर्श बैठकमा कार्यक्रमको उद्देश्य, संरचना र उपलब्धिका विषयमा छलफल गरिएको हो।

कार्यक्रमले गुरुङ भाषाका दक्ष शिक्षक, भाषाशास्त्री, पाठ्यक्रम तथा पाठ्यपुस्तक निर्माणकर्ता र अनुवादक उत्पादन गर्ने लक्ष्य राखेको छ। साथै गुरुङ भाषा, लिपि, साहित्य र सांस्कृतिक सामग्रीको अभिलेखीकरण, मानकीकरण तथा डिजिटल संरक्षणमा समेत जोड दिइएको छ।

एक वर्षमा दुई सेमेस्टर पूरा हुने कार्यक्रममा विद्यालयमा आधारित प्रत्यक्ष शिक्षण अभ्यास र मेन्टरसिप प्रणालीसमेत समावेश गरिएको छ। कार्यक्रममार्फत विद्यालय तहदेखि विश्वविद्यालयसम्म गुरुङ भाषाको अध्ययन–अध्यापन विस्तार गर्ने लक्ष्य राखिएको छ।

भदौ २६ गतेदेखि प्रदर्शनमा आउने सिनेमा ‘पेन्सन पट्टा’को दोस्रो गीत ‘ऐना हेरेर कपाल कोरेर’ सार्वजनिक भएको छ। गीत आइतबार ओएसआर डिजिटलमार्फत सार्वजनिक गरिएको हो।

सुरज तमूको शब्द तथा संगीत रहेको गीतमा सुरज तमू र शान्ति श्री परियारको स्वर छ। मनोज थापा मगरले संगीत संयोजन गरेको गीतको भिडियोमा सिनेमाका कलाकार मनोज गुरुङ र अनुशा राई देखिएका छन्।

माओत्से गुरुङको निर्देशन तथा कथामा बनेको सिनेमाले लाहुरे जीवन, पेन्सनसँग जोडिएका पारिवारिक समस्या, प्रेम, त्याग र विछोडको कथा प्रस्तुत गर्छ। निर्देशक गुरुङका अनुसार सिनेमा पेन्सनमा मात्र केन्द्रित नभई मानवीय सम्बन्ध र भावनात्मक पक्षलाई समेत प्राथमिकतामा राखिएको छ।

सिनेमामा दयाहाङ राई, गौमाया गुरुङ, विल्सन विक्रम राई, बुद्धि तामाङ, पशुपति राई, विश्वास गुरुङ, माया गुरुङ, मनोज गुरुङ र अनुशा राईलगायत कलाकारको अभिनय छ। नेपाल वितरणको जिम्मेवारी आरआर फिल्म्सले लिएको छ।