सुर्याम्स उप्रेती / नेपाल फोटो लाइब्रेरी

काठमाडौं। बडादसैँको दोस्रो दिन काठमाडौंको मैतीदेवी मन्दिरमा देवीको दर्शन र पूजाआजा गर्ने श्रद्धालुहरूको चहलपहल देखिएको छ।

दसैँको धार्मिक रौनकसँगै बिहानैदेखि भक्तजनहरू मैतीदेवी मन्दिर पुगेर देवी दुर्गाको पूजा आराधना तथा दर्शन गरिरहेका छन्। मन्दिर परिसरमा पूजाआजा गर्न आउने श्रद्धालुहरूको उपस्थितिले दसैँको उल्लास र धार्मिक वातावरणलाई झल्काएको छ।

शक्तिको उपासना गरिने बडादसैँमा काठमाडौं उपत्यकासहित देशभरका विभिन्न शक्तिपीठमा भक्तजनहरूको भीड लाग्ने गर्छ। दुर्गा भवानीप्रति आस्था प्रकट गर्दै पूजा आराधना गर्ने र सुख, शान्ति तथा समृद्धिको कामना गर्ने परम्परा दसैँको विशेषता हो।

गोरखाको चुमनुब्री गाउँपालिका क्षेत्रमा पहिरो खसेर खोला थुनिएपछि बूढीगण्डकी नदीमा आइतबार बिहान ठूलो बाढी आएको छ। बाढीले नदी किनारका बस्ती तथा भौतिक संरचनामा क्षति पुर्‍याएको छ।

चुमनुब्री गाउँपालिका–६ अन्तर्गत खारोङ र उङ्जुलुबीच खसेको सुक्खा पहिरोले स्यारखोला थुनेपछि बाढी आएको प्रारम्भिक जानकारी छ। खोला थुनिँदा करिब दुई सयदेखि तीन सय मिटर माथिसम्म पानी र बाफ उडेको देखिएको चुमनुब्री गाउँपालिकाका प्रमुख प्रशासकीय अधिकृत नारायणप्रसाद सापकोटाले बताएका छन्।

पहिरोले खोला थुनेपछि जम्मा भएको पानी एक्कासि बग्दा नदीको बहाव बढेको हो। बाढी नदी किनारका बस्ती र भौतिक संरचनामा पसेको छ। घटनास्थलमा तत्काल पुग्न नसकिएकाले क्षतिको विस्तृत विवरण संकलन हुन बाँकी रहेको गाउँपालिकाले जनाएको छ।

बाढीले गोरखाको माछीखोला बजारमा ठूलो क्षति पुर्‍याएको छ। माछीखोलाबाट केरौँजा जाने झोलुङ्गे पुल बगाएको छ भने सल्लेरी र जगत बजारमा समेत क्षति पुगेको छ। नदीको बहाव बढेसँगै तटीय क्षेत्रका बासिन्दा त्रसित भएका छन्।

घटनापछि स्थानीय बासिन्दालाई तत्काल सुरक्षित र अग्लो स्थानमा जान आग्रह गरिएको थियो। स्थानीयको सतर्कताका कारण अहिलेसम्म मानवीय क्षति भएको जानकारी नआएको गाउँपालिकाका प्रमुख प्रशासकीय अधिकृत सापकोटाले बताएका छन्।

बूढीगण्डकी नदीमा पानीको बहाव अवरुद्ध हुने र फेरि खुल्ने अवस्था रहेकाले तल्लो तटीय क्षेत्रमा जोखिम कायमै छ। प्रहरीले त्रिशूली दोभानसम्म नदी किनारमा नजान र बाढीको जोखिम भएका स्थानबाट टाढा रहन आग्रह गरेको छ।

घटनाबाट भएको भौतिक क्षतिको पूर्ण विवरण आउन बाँकी छ।

नेपाल फोटो लाइब्रेरी

काठमाडौंको कीर्तिपुरस्थित ल्याबोरेटरी स्कुलको मैदान शनिबार नेपथ्यका गीतले गुञ्जिएको छ। नेपाली सांगीतिक क्षेत्रको लोकप्रिय ब्यान्ड नेपथ्यको लाइभ कन्सर्टमा दर्शकहरू गीतसँगै झुमेका थिए।

दशैं नजिकिँदै गर्दा काठमाडौं उपत्यकामा लामो समयपछि आयोजना भएको नेपथ्यको कन्सर्टले दर्शकमा उत्साह थप्यो। गायक अमृत गुरुङको प्रस्तुतिमा नेपथ्यका चर्चित गीत गुञ्जिँदा कन्सर्टस्थलको माहोल संगीतमय बनेको थियो।

नेपथ्य नेपाली मौलिक लोकधुन, सामाजिक सन्देश र नेपालीपन झल्किने गीतका लागि परिचित छ। दशकौंदेखि नेपाली संगीतप्रेमीको मनमा बस्न सफल ब्यान्डको प्रस्तुतिमा दर्शकले भरपूर मनोरञ्जन लिए।

शनिबार कीर्तिपुरमा देखिएको यो दृश्य नेपथ्यप्रतिको दर्शकको आकर्षण र नेपाली संगीतप्रतिको प्रेमको एउटा झल्को थियो।