काठमाडौंस्थित भृकुटीमण्डप मा नयाँ वर्षको अवसर पारेर यामाहा नेपालले आयोजना गरेको ‘ब्लु फेस्ट’ मेलाले अटोमोबाइल क्षेत्रमा विशेष आकर्षण थपेको छ।

कम्पनीका प्रमुख कार्यकारी अधिकृत दीपक अग्रवालले मेलाबारे जानकारी दिँदै भने, “हामीले यामाहाको ७० वर्ष लामो विरासत र आधुनिक हाइब्रिड प्रविधिलाई एकै ठाउँमा प्रस्तुत गरेका छौं, जसले ग्राहकलाई नयाँ अनुभव दिनेछ।”

उनका अनुसार प्रदर्शनीमा यामाहाका ऐतिहासिक टू-स्ट्रोक इन्जिनदेखि अत्याधुनिक हाइब्रिड बाइकसम्म राखिएका छन्। विशेषगरी एफजेड सिरिजको नयाँ संस्करण सार्वजनिक गरिएको छ, जसले दर्शक र ग्राहकको ध्यान तानेको छ।

“ग्राहकलाई सहज बनाउने उद्देश्यले हामीले ५ लाख रुपैयाँसम्म क्यासब्याक, सस्तो ब्याजदरमा फाइनान्स सुविधा र आकर्षक एक्सचेन्ज अफर ल्याएका छौं,” अग्रवालले बताए। उनका अनुसार पुराना बाइक तथा स्कुटर साटेर नयाँ खरिद गर्न सकिने व्यवस्था गरिएको छ, जसले धेरैलाई फाइदा पुर्‍याउने विश्वास कम्पनीले लिएको छ।

मेलामा आउने आगन्तुकहरूले नयाँ मोडलहरूको टेस्ट ड्राइभ लिनुका साथै विभिन्न प्रविधिको प्रत्यक्ष अनुभव गर्न सक्नेछन्। कम्पनीले सबै वर्गका ग्राहकलाई लक्षित गर्दै गुणस्तरीय र इन्धन बचत गर्ने सवारी साधनको अनुभव लिन मेलामा सहभागी हुन आग्रह गरेको छ।

समग्रमा, ‘ब्लु फेस्ट’ ले यामाहाको गौरवशाली इतिहास र भविष्यको प्रविधिलाई एउटै प्लेटफर्ममा प्रस्तुत गर्दै उपभोक्तालाई आकर्षक अवसर प्रदान गर्ने लक्ष्य राखेको छ।

काठमाडौं — नेपाल टेलिभिजनमा प्रसारण हुँदै आएको गुरुङ भाषाको कार्यक्रम ‘हाम्रा कुरा’मा गुरुङ समुदायको मृत्युपछिको संस्कार अर्घुँ र त्यसमा निर्माण गरिने जग्गेको महत्वबारे विशेष सामग्री प्रस्तुत गरिएको छ।

कार्यक्रम सञ्चालक अनिता गुरुङले दर्शकलाई स्वागत गर्दै गुरुङ भाषा, संस्कार, संस्कृति तथा गाउँघरका परम्परागत गतिविधिको संरक्षण र प्रवर्द्धन गर्ने उद्देश्यले कार्यक्रम सञ्चालन हुँदै आएको बताइन्।

यसपटकको कार्यक्रममा लमजुङको बेशिशहर नगरपालिका–१० निवासी स्वर्गीय तिर्थ बहादुर घलेको अर्घुँको सन्दर्भमा जग्गे निर्माण प्रक्रिया र त्यसमा प्रयोग हुने धार्मिक सामग्रीबारे जानकारी दिइएको थियो। कार्यक्रममा लामा, प्हच्यु, क्ह्याब्रे तथा बोन्पोहरूले आ–आफ्नो विधिअनुसार जग्गेमा राखिने सामग्री र तिनको धार्मिक अर्थबारे व्याख्या गरिएको थियो।

जग्गेमा धर्मपाल गुरु, गुरु रिन्पोछे (पद्मसंभव), महाकाल, बज्रपाणि, पाल्देन लामा लगायतका देवताका प्रतीकात्मक आकृति राखिने र यी सबैले मृतक आत्माको मार्गदर्शन तथा संरक्षण गर्ने विश्वास रहेको कार्यक्रममा उल्लेख गरिएको थियो। त्यस्तै, मृतकको आत्मा बोलाउनका लागि विशेष संरचना ‘किलखोर’ तयार गरिने र त्यसमा चोखो पानी, प्रतीकात्मक शरीर (ओदान) तथा मृतकसँग सम्बन्धित वस्तुहरू राखिने परम्परा पनि देखाइएको थियो।

अर्घुँमा १०० वटा ‘स्हिटो’ पूजा गर्ने चलन रहेको, जसमा ४२ शान्त र ५८ क्रोधित देवताको पूजा गर्नुपर्ने धार्मिक मान्यता रहेको जानकारी पनि कार्यक्रममा दिइयो। यसरी सम्पूर्ण विधि सम्पन्न भएपछि मात्र मृतकको आत्माले मुक्ति पाउने विश्वास गरिन्छ।

कार्यक्रममा गुरुङ लामाको मुखबाटै यी धार्मिक विधि र तिनको अर्थबारे जानकारी प्रस्तुत गरिएको थियो। ‘हाम्रा कुरा’ले यस्ता सामग्रीमार्फत गुरुङ समुदायको मौलिक परम्परा उजागर गर्दै आएको छ।

कार्यक्रमको अन्त्यमा सञ्चालक गुरुङले दर्शकलाई धन्यवाद दिँदै आगामी दिनमा पनि यस्तै सांस्कृतिक विषयवस्तु लिएर आउने प्रतिबद्धता व्यक्त गरिन्।

काठमाडौंमा जारी नेपाल अन्तर्राष्ट्रिय चलचित्र महोत्सव (निफ) अन्तर्गत आयोजित विशेष सत्रमा रमेश सिप्पी र राजेश हमाल बीच रोचक संवाद भएको छ। पर्यटन बोर्डको हलमा शुक्रबार सम्पन्न कार्यक्रममा सिप्पीले आफ्नो चर्चित फिल्म शोले निर्माण अनुभव साझा गरे।

उनले सलीम–जावेदसँगको सहकार्यलाई फिल्म सफलताको मुख्य आधार माने। सानो अवधारणाबाट विकसित भएको कथालाई वेस्टर्न शैलीबाट प्रेरित गर्दै निर्माण गरिएको उनले बताए। छायांकनका लागि बेंगलुरू नजिकै सेट तयार गर्न करिब ६ महिना लागेको उल्लेख गरे।

सुरूमा ‘शोले’लाई असफल भनिए पनि छैटौं हप्तापछि ठूलो हिट बनेको उनले स्मरण गरे। प्रविधिले कथा र भावनालाई ओझेलमा पार्न नहुने धारणा राख्दै उनले अहिलेका दर्शक झन् सचेत भएको बताए। कार्यक्रम करिब एक घण्टा चलेको थियो।