काठमाडौँको बिजुलीबजारमा धोबीखोलामाथि निर्माण गरिएको नेटवर्क आर्क ब्रिज नेपालकै पहिलो यस्तो प्रकारको पुल हो।

आधुनिक इन्जिनियरिङ प्रविधि प्रयोग गरी निर्माण गरिएको यस पुलले बिजुलीबजार, माइतीघर र तीनकुने क्षेत्रबीचको आवागमनलाई थप सहज बनाएको छ।

करिब ५१ मिटर लामो र १२ मिटर चौडा यो पुलमा स्टिल आर्च र जालोझैँ जोडिएका केबलहरूको प्रयोग गरिएको छ। यही विशेष संरचनाका कारण यसलाई नेटवर्क आर्क ब्रिज भनिन्छ। पुलको डिजाइनले भार वहन क्षमता बढाउनुका साथै सौन्दर्यसमेत थपेको छ।

यो आर्क व्रिज संगै रोपिएका बोटविरुवाले यहाँको सौन्दर्य अझै बढाएको छ।

काठमाडौं उपत्यका सडक विस्तार आयोजनाअन्तर्गत निर्माण गरिएको यो पुल सञ्चालनमा आएपछि उक्त क्षेत्रमा हुने सवारी चाप व्यवस्थापनमा सहयोग पुगेको छ।

विशेषगरी रातिको समयमा आकर्षक प्रकाश व्यवस्थासहित देखिने यो पुल अहिले काठमाडौँका चर्चित स्थलमध्ये एक बनेको छ।

आधुनिक प्रविधि र आकर्षक संरचनाका कारण बिजुलीबजारको नेटवर्क आर्च ब्रिजलाई नेपालको पूर्वाधार विकासको एक महत्वपूर्ण उपलब्धिका रूपमा हेरिन्छ।

वर्षा र सहकालका देवता मानिने रातो मच्छिन्द्रनाथको रथ जावलाखेल पुगेको चौथो दिन, हजारौँ भक्तजन र दर्शकहरूको उपस्थितिमा बहुप्रतीक्षित भोटो जात्रा सम्पन्न भएको छ।

सयौँ वर्ष पुरानो परम्पराअनुसार मणिमाणिक्य जडित रहस्यमय भोटो सर्वसाधारणलाई देखाइयो। भोटो देखाउने क्षण हेर्न जावलाखेलमा जनसागर उर्लिएको थियो।

विशेष समारोहमा राष्ट्रपति राम चन्द्र पौडेल, उपराष्ट्रपति राम साहाय यादव,प्रधामन्त्री बालेन शाह तथा अन्य विशिष्ट व्यक्तित्वहरू सहभागी भए। ललितपुरकी कुमारीबाट टीका र प्रसाद ग्रहण गरेपछि भोटो दर्शनको कार्यक्रम सम्पन्न भयो।

लिच्छवीकालदेखि चलिआएको विश्वास गरिएको यो जात्राले केवल धार्मिक आस्था मात्र होइन, काठमाडौं उपत्यकाको सांस्कृतिक पहिचान र ऐतिहासिक विरासतलाई पनि जीवन्त राख्दै आएको छ।

भोटो देखाइएसँगै उपत्यकाको सबैभन्दा लामो र प्रसिद्ध जात्रा रातो मछिन्द्रनाथ जात्रा यस वर्षका लागि औपचारिक रूपमा सम्पन्न भएको छ।

वर्षा र सहकालका देवताका रूपमा पूजिने रातो मच्छिन्द्रनाथको रथ बुधबार ललितपुरको लगनखेलस्थित ठटी टोलबाट तानेर जावलाखेल पुर्‍याइएको छ।

वैशाख शुक्ल प्रतिपदादेखि सुरु भएको ऐतिहासिक रथजात्रा विभिन्न स्थान हुँदै शुभ साइतअनुसार केही दिन ठटी टोलमा रोकिएको थियो। परम्पराअनुसार अब रथ जावलाखेलको ललितमण्डपमा राखिनेछ, जहाँ भक्तजनहरूले दैनिक पूजाआजा गर्नेछन्।

रथ जावलाखेल पुगेको चार दिनपछि मनाइने भोटो जात्रा यस वर्ष असार ६ गते शनिबार हुनेछ। सो अवसरमा राष्ट्र प्रमुखको उपस्थितिमा परम्परागत रूपमा भोटो प्रदर्शन गरिनेछ।

काठमाडौं उपत्यकाको सबैभन्दा पुरानो र लामो जात्रामध्ये एक मानिने रातो मच्छिन्द्रनाथ रथजात्रा वर्षा, सहकाल र समृद्धिको कामनासहित मनाइन्छ। भोटो देखाउने कार्यक्रम सम्पन्न भएसँगै यस वर्षको जात्रा औपचारिक रूपमा समापन हुनेछ।