काठमाडौँको भृकुटीमण्डपमा नाइमा मोबिलिटी एक्सपो जारी छ।

एक्सपोमा विभिन्न ब्रान्डका नयाँ मोटरसाइकल, स्कुटर, कार र एसयूभी प्रदर्शनमा राखिएका छन्। नयाँ मोडल र अत्याधुनिक प्रविधिका सवारी हेर्न दैनिक हजारौँ दर्शक एक्सपोमा पुगिरहेका छन्।

विशेषगरी विद्युतीय सवारीतर्फ दर्शकको आकर्षण बढी देखिएको छ। ब्याट्री क्षमता, रेन्ज, सुरक्षा फिचर्स र मूल्यबारे धेरैले जानकारी लिइरहेका छन्।

एक्सपोमा कम्पनीहरूले विशेष छुट, बुकिङ अफर र फाइनान्सको सुविधा पनि दिएका छन्।

काठमाडौं, साउन १७ — नेपाल तमु गुरुङ विद्यार्थी सङ्घले सञ्चालन गरेको आर्थिक सहयोग अभियानबाट संकलित १ लाख ७५ हजार रुपैयाँ सुकुम्बासी तमु गुरुङ विद्यार्थी विश्वनाथ गुरुङ र उनको परिवारलाई हस्तान्तरण गरिएको छ।

१५ दिनसम्म सञ्चालन गरिएको अभियानबाट उठेको रकम शनिबार मित्रनगरस्थित तमु गुरुङ राष्ट्रिय परिषद्को सभाहलमा आयोजित कार्यक्रममा हस्तान्तरण गरिएको हो।

कार्यक्रममा यस वर्षको माध्यमिक शिक्षा परीक्षा (एसईई) मा ४ जीपीए ल्याएका तमु गुरुङ समुदायका १० जना विद्यार्थीलाई सम्मान गरिएको थियो। साथै, नेपाल आदिवासी जनजाति महासङ्घ संघीय परिषद्को वरिष्ठ उपाध्यक्षमा निर्वाचित नेपाल तमु गुरुङ विद्यार्थी सङ्घका पूर्वअध्यक्ष दिल तमुलाई पनि सम्मान गरिएको आयोजकले जनाएको छ।

कार्यक्रममा वक्ताहरूले शिक्षा र सामाजिक सहकार्यका माध्यमबाट विपन्न विद्यार्थीलाई सहयोग गर्ने अभियानलाई निरन्तरता दिने प्रतिबद्धता व्यक्त गरेका थिए।

काठमाडौंको ऐतिहासिक रानीपोखरी (न्हू पुखू) र त्यस वरपरको क्षेत्र पछिल्लो समय झन् आकर्षक देखिन थालेको छ।

३६० डिग्री एरियल दृश्यमा रानीपोखरी, घण्टाघर, त्रिचन्द्र क्याम्पस, खुलामञ्च आसपासको क्षेत्र तथा पुरानो काठमाडौंको शहरी संरचना एकै फ्रेममा मनमोहक रूपमा देख्न सकिन्छ।

२०७२ सालको भूकम्पले क्षति पुर्‍याएको रानीपोखरीलाई परम्परागत मल्लकालीन शिखर शैलीमा पुनःनिर्माण गरिएको हो। पुनःनिर्माणपछि सर्वसाधारणका लागि खुला गरिएको यो ऐतिहासिक सम्पदा अहिले काठमाडौं आउने आन्तरिक तथा बाह्य पर्यटकको प्रमुख आकर्षण बनेको छ।

काठमाडौं महानगरपालिकाको व्यवस्थापनमा रहेको रानीपोखरी परिसरमा बिहानदेखि साँझसम्म निःशुल्क प्रवेशको व्यवस्था छ। पोखरीको बीचभागमा रहेको ऐतिहासिक बालगोपालेश्वर मन्दिर भने वर्षमा एकपटक तिहारको भाइटीकाका दिन मात्र दर्शन तथा पूजाआजाका लागि खुला गरिन्छ।

नियमित सरसफाइ, हरियाली संरक्षण र आकर्षक प्रकाश व्यवस्थापनका कारण रानीपोखरीको सौन्दर्य अझ निखारिएको छ। ऐतिहासिक, धार्मिक तथा सांस्कृतिक महत्व बोकेको यो सम्पदा काठमाडौं उपत्यकाको प्रमुख पर्यटकीय गन्तव्यका रूपमा स्थापित हुँदै गएको छ।