काठमाडौंको ऐतिहासिक न्युरोड क्षेत्र अहिले परम्परागत शैलीका आकर्षक सडकबत्तीले नयाँ स्वरूपमा चम्किएको छ।

सम्पदा क्षेत्रको मौलिकता जोगाउँदै आधुनिक सुविधा र सांस्कृतिक पहिचानलाई एकसाथ प्रस्तुत गर्ने उद्देश्यले काठमाडौं महानगरपालिकाले यी बत्ती जडान गरेको हो।

साँझ पर्दै जाँदा बत्तीको मधुरो उज्यालोले न्युरोडका पुराना भवन, गल्ली र सडकलाई अझ मनमोहक बनाएको देखिन्छ।

यसअघि नै घरहरूलाई पुरातन शैलीअनुसार रङरोगन गरिएपछि सडकबत्ती पनि सोही स्वरूपसँग मेल खाने गरी राखिएका हुन्।

स्थानीय व्यवसायीहरूका अनुसार नयाँ बत्ती जडान भएपछि साँझको समयमा न्युरोडको चहलपहल बढेको छ र आन्तरिक तथा बाह्य पर्यटक पनि फोटो खिच्न र अवलोकन गर्न आकर्षित हुन थालेका छन्।

यसले सम्पदा संरक्षणसँगै न्युरोडको सौन्दर्य र पर्यटन प्रवर्द्धनमा समेत सकारात्मक योगदान पुर्‍याएको छ।

माइतीघरदेखि बबरमहल हुँदै बानेश्वरसम्मको सडक खण्ड आज काठमाडौंको आधुनिकता र सहरी सौन्दर्यको एउटा उत्कृष्ट नमुना बनेको छ।

८ लेनको यो फराकिलो सडकमा हिँड्दा उपत्यकाकै बदलिँदो र व्यवस्थित स्वरूपको महसुस हुन्छ।

यस खण्डको सौन्दर्यलाई बिजुलीबजारमा धोबीखोला माथि बनेको आकर्षक ‘नेटवर्क आर्च ब्रिज’ ले झनै भव्य बनाएको छ। कलात्मक शैलीमा निर्माण गरिएको यो आधुनिक पुलले सडकको गरिमालाई थप उचाइ दिएको छ।

सडकको बीचभाग र किनाराहरूमा रोपिएका बोटबिरुवाहरू अचेल राम्रोसँग हुर्किएर हरियाली छाएका छन्, जसले व्यस्त सहरको बीचमा पनि छुट्टै ताजापन दिन्छ।

साँझ परेपछि पुलका आर्चहरू र सडकमा लहरै बलेका आधुनिक बत्तीहरूले यो क्षेत्रलाई निकै आकर्षक र उज्यालो बनाउँछन्।

उज्यालो प्रकाश र हरियालीको यो सुन्दर संयोजनले गर्दा यो सडक खण्ड काठमाडौंको एउटा गौरव र लोभलाग्दो परिचय बनेको छ।

चलचित्र विकास बोर्डद्वारा आयोजित ‘वृत्तचित्र तथा लघु चलचित्र प्रतियोगिता–२०८२’ मा निर्देशक कमल एक्चै मगर निर्देशित लघु चलचित्र ‘बाछिटा’ प्रथम घोषित भएको छ ।

राष्ट्रिय स्तरको प्रतिष्ठित प्रतियोगितामा देशभरबाट सहभागी विभिन्न लघु चलचित्रलाई पछि पार्दै ‘बाछिटा’ उत्कृष्ट लघु चलचित्रको रूपमा छनोट हुन सफल भएको हो ।

प्रतियोगितामा प्रथम स्थान हासिल गरेसँगै चलचित्रले नेपाली लघु चलचित्र क्षेत्रमा महत्वपूर्ण उपलब्धि हासिल गरेको मानिएको छ ।

पुरस्कार घोषणा पछि निर्देशक कमल एक्चै मगरले खुसी व्यक्त गर्दै चलचित्र विकास बोर्ड, निर्णायक मण्डल तथा सम्पूर्ण निर्माण टिमप्रति आभार प्रकट गरेका छन् । उनले ‘बाछिटा’को सफलता सम्पूर्ण टिमको मेहनत, विश्वास र निरन्तर संघर्षको प्रतिफल भएको बताए ।

‘बाछिटा’ ७औं सिलिगुडी इन्टरनेशनल शर्ट फिल्म फेस्टिभलमा पनि दोस्रो स्थान हासिल गरेको थियो । यससँगै विभिन्न राष्ट्रिय तथा अन्तर्राष्ट्रिय लघु चलचित्र महोत्सवहरूमा आधिकारिक छनोट भई सम्मानित भइसकेको चलचित्र हो ।

निर्माण पक्षका अनुसार ‘बाछिटा’ले हासिल गरेको यो सफलता नेपाली लघु चलचित्र निर्माणमा सक्रिय नयाँ पुस्ताका सर्जकहरूका लागि प्रेरणादायी बन्ने विश्वास लिइएको छ ।