बलिउड सुपरस्टार सलमान खान अभिनीत युद्ध–ड्रामा फिल्म ‘ब्याटल अफ गलवान’ को देशभक्ति गीत ‘मातृभूमि’ सार्वजनिक भएसँगै नेपाली कलाकारको अन्तर्राष्ट्रिय उपस्थितिले ध्यान खिचेको छ।

गीतमा नेपाली अभिनेता अनुपविक्रम शाही सलमान खानसँग एउटै फ्रेममा देखिनुले उनको भूमिकालाई लिएर दर्शकमाझ चासो बढेको छ।

गीतमा समेटिएको देशप्रेम र बलिदानको भावनासँगै अनुपविक्रमको उपस्थितिले नेपाली कलाकारले बलिउडजस्तो ठूला फिल्म उद्योगमा पनि अर्थपूर्ण स्थान बनाउन सक्ने संकेत गरेको छ।

सलमान खानसँग प्रत्यक्ष दृश्य साझा गर्नु आफैंमा अनुपका लागि मात्र होइन, नेपाली फिल्म उद्योगका लागि पनि महत्वपूर्ण उपलब्धि मान्न सकिन्छ।

प्रसिद्ध गायक अरिजित सिंह, श्रेया घोषाल र मणि धर्मकोटको स्वर रहेको ‘मातृभूमि’ गीत भावनात्मक प्रस्तुतिका कारण चर्चा बटुलिरहेको छ। यही फिल्ममार्फत अनुपविक्रम शाहीले बलिउडमा डेब्यु गर्न लागेका हुन्।

अपूर्व लाखियाको निर्देशनमा बनेको यो फिल्म सन् २०२० मा भारत–चीन सीमा क्षेत्र गलवान उपत्यकामा भएको सैन्य झडपमा आधारित छ। हतियारबिना भएको उक्त संघर्षले दुई देशबीचको सम्बन्धमा आएको तनावलाई कथावस्तु बनाइएको छ।

फिल्ममा सलमान खान र चित्रांगदा सिंहको मुख्य भूमिका रहेको छ भने नेपाली कलाकार अनुपविक्रम शाहीसँगै स्वर्गीय गायक तथा अभिनेता प्रशान्त तामाङको समेत अभिनय रहेको छ, जसले नेपाली दर्शकका लागि भावनात्मक पक्ष थपेको छ।

‘ब्याटल अफ गलवान’ आगामी १७ अप्रिल (बैशाख ४) देखि प्रदर्शनमा आउने तयारीमा छ।

काठमाडौँ — तमु (गुरुङ) कलाकार संघ, नेपालले तमु ल्होसार २०८२ को अवसरमा आदान–प्रदान तथा स्यो–कैं कार्यक्रम आयोजना गरेको छ।

तमु समुदायले हरेक वर्ष पुष १५ गते पुरानो ल्होको विदाइ गर्दै नयाँ ल्होको स्वागत गर्ने परम्परा अनुसार ल्होसार पर्व मनाउँदै आएको छ। त–ल्हो ल्होसारको अवसरमा आयोजना गरिएको उक्त कार्यक्रम राजधानीको गोंगबुस्थित तमु ह्युला छोँज धीं गुरुङ राष्ट्रिय परिषदको कार्यालयमा सम्पन्न भएको हो।

संघका अध्यक्ष सागर गुरुङका अनुसार तमु समुदायको मौलिक संस्कृति, कला र पहिचानको संरक्षण तथा प्रवर्द्धन गर्ने उद्देश्यले कार्यक्रम आयोजना गरिएको हो। कार्यक्रममा कलाकार, संस्कृतिकर्मी तथा समुदायका अगुवाहरूको उल्लेखनीय सहभागिता रहेको थियो।

अभिनेता दयाहाङ राई र प्रकाश सपूतको पहिलो सहकार्य रहेको फिल्म ‘मिरमिरे’ को टिजर सार्वजनिक भएको छ।
यम शेर्पाको लेखन तथा निर्देशनमा बनेको यो फिल्मको टिजर शुक्रबार ओएसआर डिजिटल मार्फत सार्वजनिक गरिएको हो।

टिजरमा बुवा–छोरीको गहिरो भावनात्मक सम्बन्ध मुख्य कथाका रूपमा देखाइएको छ। आमाको अनुपस्थितिमा बुवासँग बस्ने एक सानी छोरी र उनीहरूबीचको ममतामय नाता टिजरको केन्द्रमा छ। बुवाको भूमिकामा देखिएका दयाहाङ राई छोरी (शाइसा गौचन)को लालनपालन, शिक्षा तथा जीवनका चुनौतीहरू सम्हाल्दै अगाडि बढिरहेका छन्। छोरीले आमाको अभाव तीव्र रूपमा महसुस गरिरहेकी छिन्, र त्यो पीडा दयाहाङकै आँखाबाट पनि झल्किन्छ।

फिल्ममा सिर्जना निङलेखु स्कुलकी शिक्षिकाको भूमिकामा देखिएकी छन्। टिजरले उनी दयाहाङ र प्रकाश सपूतबीचको त्रिकोणात्मक प्रेमकथाको संकेत पनि दिन्छ।
यार्सा फिल्म्सको प्रस्तुतिमा बनेको ‘मिरमिरे’मा दयाहाङ राई, प्रकाश सपूत, सिर्जना निङलेखु, माओत्से गुरूङ, छुल्ठिम गुरूङ, भोलाराज सापकोटा, शाइसा गौचन, दिविशा पन्त, चिराग श्रेष्ठ, नमनराज गजुरेललगायत कलाकारको अभिनय छ।

फिल्मका निर्माता निमु शेर्पा, छोङ्बा लामा शेर्पा र आङ्छिरिङ शेर्पा छन्। सह–निर्मातामा गोविन्द बोहरा र सुदिप कुँवर, र कार्यकारी निर्माता आरआर फिल्म्सका सञ्चालक तथा वितरक रोहित कट्टेल रहेको उल्लेख छ।
लाइन प्रोड्युसर वीरेन्द्र शाही, मुख्य सहायक निर्देशक सुदिप कुँवर, मेकअप सञ्जु थलाङ लिम्बू, निर्माण नियन्त्रक दिलीप पन्त, छायांकन आलोक शुक्ला, र सम्पादन निमेश श्रेष्ठ तथा भूपेन्द्र अधिकारीले गरेका छन्।

फिल्मको देशव्यापी वितरण रोहित कट्टेल र रत्न श्रेष्ठको आरआर फिल्म्सले लिनेछ।