‘मिस नेपाल २०२६’ प्रतियोगिताका लागि आवेदन खुला भएको छ।

आयोजक संस्था द हिडन ट्रेजरले बुधबार पत्रकार सम्मेलन को आयोजना गर्दै विश्वभर छरिएर रहेका नेपाली युवतीहरुलाई प्रतियोगितामा सहभागिताका लागि आवेदन दिन आह्वान गरिएको हो।

आयोजक सस्थांले नि:शुल्क दर्ता गर्न सकिने मिस नेपाल २०२६को लागी आगामी जुन ८ सम्म रहेको जनाएको छ।

प्रतियोगिताको ग्रान्ड फिनाले भदौ १६, २०८३ (अगस्ट १, २०२६) मा ललितपुर स्थित द प्लाजामा आयोजना हुने बताइएको छ। कार्यक्रम ‘क्लिन हिमालयाज टेलिभिजन’ बाट प्रत्यक्ष प्रसारण गरिने बताइएको छ।

मिस नेपाल २०२६ मा सहभागी हुन इच्छुक युवतीको न्यूनतम उचाइ ५ फिट ३ इन्च र उमेर १८ देखि २७ वर्षबीच हुनुपर्नेछ। नेपाली नागरिकता भएका युवतीसँगै विदेशमा बसोबास गर्ने नेपालीले गृह मन्त्रालयबाट जारी एनआरएन कार्डका आधारमा पनि आवेदन दिन सक्नेछन्।

यस वर्ष प्रतियोगिताबाट ‘मिस नेपाल वर्ल्ड’, ‘मिस नेपाल अर्थ’ र ‘मिस नेपाल इन्टरनेसनल’ गरी तीन विजेता घोषणा गरिनेछन्। आयोजकका अनुसार अघिल्ला संस्करणका विजेताहरूले विभिन्न अन्तर्राष्ट्रिय मञ्चमा नेपालको प्रतिनिधित्व गर्दै उल्लेखनीय प्रदर्शन गरेका छन्।

प्रतियोगितालाई थप व्यापक बनाउन बिर्तामोड, इटहरी, बुटवल, पोखरा, नेपालगञ्ज र जनकपुरमा ‘मिस नेपालको खोज’ अभियान सञ्चालन गरिनेछ।

पतिको दीर्घायु, सुख–समृद्धि र दाम्पत्य जीवनको मंगलकामना गर्दै मिथिलाञ्चलका महिलाले आज श्रद्धापूर्वक बरसाइत (बटसावित्री) पर्व मनाएका छन्। प्रत्येक वर्ष जेठ कृष्णपक्षको औँसीका दिन मनाइने यो पर्व विशेषगरी विवाहित महिलाका लागि महत्वपूर्ण मानिन्छ।

बरसाइत पर्वमा नवविवाहिता महिलाले बिहेपछि आउने पहिलो पर्व अनिवार्य रूपमा श्रीमान्को घरमै मनाउने परम्परा रहेको छ। पर्वको अघिल्लो दिन नुहाइधुवाइ गरी सात्विक भोजन गर्ने चलन छ भने माइतीबाट लुगा, चुरा, सिन्दूर लगायतका शृङ्गार सामग्री पठाइने गरिन्छ।

आज बिहानैदेखि महिलाहरू रातो, पहेँलो र विभिन्न रंगका परम्परागत पहिरनमा सजिएर नजिकैको वर (बर) रुखमुनि पूजा गर्न पुगेका छन्। वर र पीपल दुवैको उपस्थितिलाई शुभ मानिने भएकाले सम्भव भएसम्म दुवै रुखसँगै पूजा गरिन्छ।

पूजाका क्रममा अंकुरी, फलफूल, नरिवल लगायतका प्रसाद वरको जरामा चढाइन्छ। महिलाहरूले सिन्दूरले वरको रुख सजाउँदै रातो र पहेँलो धागोले सात पटक बेर्ने परम्परा पनि निभाएका छन्। पति–पत्नीले सँगै परिक्रमा गर्ने र जल चढाउने चलनले दाम्पत्य सम्बन्ध अझ बलियो हुने विश्वास गरिन्छ।

धार्मिक मान्यताअनुसार सावित्रीले आफ्नो पतिलाई मृत्युबाट बचाएको कथासँग यो पर्व जोडिएको छ। त्यसैले महिलाहरू दिनभर उपवास बसेर परिवारको सुख, शान्ति र पतिको दीर्घायुको कामना गर्दै श्रद्धापूर्वक बरसाइत पर्व मनाउने गर्छन्।

नेपाली कला क्षेत्रमा आफ्नो छुट्टै पहिचान बनाउन सफल कलाकार हुन् तेरिया फौजा मगर। सानै उमेरदेखि नृत्यप्रति गहिरो रुचि राख्ने उनले अन्तर्राष्ट्रिय रियालिटी शो जित्दै नेपाली प्रतिभालाई विश्वसामु चिनाएकी थिइन्।

उनको आत्मविश्वास, मेहनत र फरक प्रस्तुतीले उनलाई केवल नृत्यमा मात्र होइन, अभिनय क्षेत्रमा पनि स्थापित गराउँदै लगेको छ।

नृत्यबाट सुरु भएको उनको कला यात्रा अहिले चलचित्रसम्म आइपुगेको छ। विभिन्न म्युजिक भिडियो, स्टेज प्रस्तुति तथा अभिनयमार्फत दर्शकमाझ लोकप्रिय बनेकी तेरिया अब नयाँ चलचित्र मितज्यु मार्फत दर्शकमाझ आउँदैछिन्।

जेठ ८ देखि प्रदर्शनमा आउन लागेको यस चलचित्रमा उनले भावनात्मक र परिपक्व भूमिका निर्वाह गरेकी छन्।

चलचित्र “मितज्यु” मा तेरियाको अभिनयलाई विशेष रूपमा हेरिएको छ। यसअघि नृत्यमा देखिएको उनको अभिव्यक्ति र ऊर्जा अब अभिनयमा पनि झल्किएको निर्माण टिमको दाबी छ।

चलचित्रको ट्रेलर र गीतमार्फत दर्शकले उनको अभिनयको झलक पाइसकेका छन्, जसले दर्शकमाझ उत्सुकता बढाएको छ।

तेरिया फौजा मगरको यात्रा नेपाली युवापुस्ताका लागि प्रेरणाको उदाहरण बनेको छ। निरन्तर मेहनत, अनुशासन र सिर्जनात्मकताले उनले आफूलाई बहुआयामिक कलाकारका रूपमा स्थापित गर्दै लगेकी छन्।

अब चलचित्र “मितज्यु” मार्फत उनको अभिनय यात्रा कति सफल हुन्छ भन्ने प्रतीक्षामा नेपाली दर्शक रहेका छन्।