दशैँ नजिकिँदै गर्दा विगतमा नेपाली आकाशमा देखिने रङ्गीचङ्गी चङ्गाको उमङ्ग हिजोआज भने कम हुँदै गएको छ। दशैँको आगमनसँगै चङ्गा उडाउने परम्परा रहे पनि पछिल्लो समय यसप्रतिको आकर्षण घट्दै गएको देखिन्छ।

यद्यपि, काठमाडौँको चोभार पुग्दा भने केही युवा, बालबालिका तथा परिवार चङ्गा उडाएर रमाइरहेको देखिन्थ्यो। खुला आकाशमुनि चङ्गा उडाउँदै गरेका उनीहरूका लागि चोभारको वातावरण रमाइलो गर्ने अवसर बनेको थियो। कोही चङ्गाको धागो सम्हाल्न व्यस्त थिए भने कोही आकाशमा उडिरहेको चङ्गा हेर्दै रमाइरहेका थिए।

दशैँको समयमा चङ्गा उडाउनु नेपाली समाजमा लामो समयदेखि चलिआएको परम्परा हो। वर्षायाम सकिएर मौसम खुल्ने समय चङ्गा उडाउन अनुकूल मानिन्छ। बदलिँदो जीवनशैली र मनोरञ्जनका नयाँ माध्यमबीच पनि चोभारमा देखिएको यो दृश्यले दशैँसँग जोडिएको पुरानो संस्कृतिको झल्को दिन्छ।

चङ्गा उडाइरहेका युवा र बालबालिकाको उत्साहले हराउँदै गएको यो परम्परालाई अझै जीवन्त राख्ने आशा जगाउँछ।

निर्देशक रामबाबु गुरुङको निर्देशनमा बनेको बहुप्रतीक्षित नेपाली फिल्म ‘कबड्डी ५ : आफ्टर द फाइनल म्याच’को ट्रेलर सार्वजनिक भएको छ। निर्माण टिमले मंगलबार ललितपुरस्थित लबिम मलमा कार्यक्रम आयोजना गर्दै फिल्मको ट्रेलर सार्वजनिक गरेको हो।

सार्वजनिक ट्रेलरले काजीको वैवाहिक जीवन, मैयासँगको सम्बन्ध र उसको जीवनमा आउने नयाँ उतारचढावलाई मुख्य रूपमा प्रस्तुत गरेको छ। साथै, अभिनेता विपिन कार्कीको प्रवेशले कथामा थप द्वन्द्व र रोचकता ल्याउने संकेत गरेको छ। यसअघि सार्वजनिक टिजरभन्दा ट्रेलरले फिल्मको कथावस्तुबारे थप जानकारी दिएको छ।

बेरोजगारीबाट आजित काजी, बीके र छन्त्याल मुस्ताङमा ‘शान्ति बाटिका रिसोर्ट’ सञ्चालन गर्ने योजनासहित अघि बढ्छन्। तर, उनीहरूको योजना र व्यक्तिगत जीवनले सोचेभन्दा फरक मोड लिन्छ। सिर्जना गुरुङले निर्वाह गरेकी नयाँ मैयाको प्रवेशले काजीको जीवनमा कस्तो प्रभाव पार्छ भन्ने कौतूहल ट्रेलरले जगाएको छ।

त्यस्तै, काजीको टोली र गाउँमा प्रवेश गरेको विपिन कार्कीको समूहबीचको टकरावलाई पनि ट्रेलरमा देखाइएको छ। यसअघि सार्वजनिक टिजरमा नदेखिएकी मिरुना मगर अर्थात् शान्ति मिसको झलकले समेत दर्शकमाझ उत्सुकता बढाएको छ।

‘कबड्डी’ शृंखलाका अघिल्ला चार फिल्मले नेपाली बक्स अफिसमा राम्रो व्यापार गरेका थिए। विशेषगरी चौथो भागले व्यावसायिक सफलतासँगै दर्शकमाझ बलियो छाप छाडेको थियो। त्यसैको निरन्तरताका रूपमा निर्माण भएको पाँचौं भाग कात्तिक ६ गतेदेखि प्रदर्शनमा आउनेछ।

फिल्ममा दयाहाङ राई, विपिन कार्की, विजय बराल, बुद्धि तामाङ, रिश्मा गुरुङ, सिर्जना गुरुङ, पुष्कर गुरुङ, माओत्से गुरुङ, कमलमणि नेपाल, मिरुना मगर, कविता आले, अरुणा कार्की र शिशिर बाङ्देललगायत कलाकारको अभिनय छ।

बाँसुरी फिल्म्सको प्रस्तुतिमा बनेको फिल्ममा रामबाबु गुरुङ, मणिराम पोखरेल, मधु मिजार र विशाल गुरुङ (एलजी) निर्माता छन्। सागर राज कार्यकारी निर्माता रहेको फिल्मको छायांकन सञ्जय लामाले गरेका हुन् भने सम्पादन सुरेन्द्र पौडेलको छ। फिल्मको नेपाल वितरण ब्यांकटेश इन्टरटेनमेन्ट र टी फल्कले गर्नेछन्। अन्तर्राष्ट्रिय वितरणको जिम्मा सेभेन सिज इन्टरनेसनलले लिएको छ।

काठमाडौं । काठमाडौंलाई तराई–मधेससँग जोड्ने राष्ट्रिय गौरवको आयोजना काठमाडौं–तराई/मधेस द्रुतमार्ग (फास्ट ट्र्याक) निर्माणको काम आधा मात्रै सम्पन्न भएको छ। नेपाली सेनाको व्यवस्थापनमा निर्माण भइरहेको यस आयोजनाको भौतिक प्रगति २०८३ भदौ मसान्तसम्म ५०.०२ प्रतिशत पुगेको छ।

करिब ७०.९७ किलोमिटर लामो यो द्रुतमार्ग ललितपुरको खोकनादेखि बाराको निजगढसम्म निर्माण भइरहेको छ। आयोजनाको निर्माण व्यवस्थापनको जिम्मा सरकारले २०७४ सालमा नेपाली सेनालाई दिएको थियो।

सुरुमा करिब ८५ अर्ब रुपैयाँ लागत अनुमान गरिएको आयोजनाको लागत बढेर अहिले २ खर्ब ११ अर्ब ९३ करोड रुपैयाँ पुगेको छ। भदौ मसान्तसम्म आयोजनामा ९४ अर्ब २२ करोड रुपैयाँ खर्च भइसकेको छ।

निर्धारित समयमा काम पूरा हुन नसकेपछि सरकारले आयोजनाको म्याद तेस्रोपटक थप गरेको छ। अब २०८६ चैत मसान्तसम्म निर्माण सम्पन्न गर्ने लक्ष्य राखिएको छ।

आयोजनाअन्तर्गत सातवटा सुरुङ र ८९ वटा पुल निर्माण गर्ने योजना छ। धेद्रे र लेनडाँडा सुरुङका दुवै ट्युबमा खन्ने काम पूरा भएको छ। महादेवटार सुरुङको एउटा ट्युबमा पनि खन्ने काम सकिएको छ। पुलतर्फ भने जग, आधारभूत संरचना र माथिल्लो भाग निर्माणको काम जारी छ।

निर्माणमा ढिलाइ हुनुको मुख्य कारणमध्ये ललितपुरको खोकना क्षेत्रमा देखिएको जग्गा अधिग्रहण र मुआब्जा विवाद पनि हो। स्थानीयको असन्तुष्टि र ठेक्का प्रक्रियामा भएको ढिलाइले यस खण्डको काम प्रभावित भएको छ।

फास्ट ट्र्याक सञ्चालनमा आएपछि काठमाडौं र तराईबीचको यात्रा दूरी तथा समय घट्ने अपेक्षा गरिएको छ। यसले मालसामान ढुवानी सहज बनाउनुका साथै व्यापार, पर्यटन र आर्थिक गतिविधिमा समेत सहयोग पुर्‍याउने विश्वास गरिएको छ।

तर, आयोजनाको आधा काम मात्रै सम्पन्न भएकाले अबको साढे तीन वर्षभित्र निर्माण पूरा गर्न सरकारले ठेक्का व्यवस्थापन, बजेट, जग्गा विवाद र निर्माणको गतिमा विशेष ध्यान दिनुपर्ने देखिन्छ।

तस्विरः नेपली सेना